- اليوم الثاني
- اليوم الثالث
السلام عليكم ورحمة الله وبركاته
اشكر كل عضو كتب موضوع في هذا المنتدى وأفادني وأفاد غيري به
صراحه ما اعرف اكتب تقرير لكن هذا الي قدرت عليه وبنزل باقي الايام ان شاء الله وبعدين راح انزل الصور بعد ما احل مشكلة رفع الصور لاني رفعت الصور بس طلعو كبار على الصفحه وانا ابيهم اصغر شوي
بداية الرحلة كانت يوم السبت الموافق 28-10-2006 على طيران الخليج موعد الإقلاع الساعة 9 صباحاً بتوقيت الكويت خط سير الرحلة كويت بحرين القاهره ذهاب وإياب السعر :128 د.ك .
واعذروني ما اعرف اصور اول مره اخذ معاي كامره راح تشوفون اني توني مبتدأ في التصوير .
طلعت من البيت الساعة 7 صباحاً للمطار اخذت البوردنق ختمت الجواز انتظرت في مقهى لغاية الساعة 8:30 لتبدأ الصدمة إعلان :يعتذر طيران الخليج عن تأخير موعد الإقلاع والمتوقع أقلاع الطائرة المتجهة للبحرين الساعة 10:50 قلت يمكن تكون خيره الساعة 9:30 كلمونا مره ثانيه نروح للترانزيت قالوا لنا طيارتكم اللي بتطلع من البحرين للقاهرة مراح تلحقون عليها بنطلعكم على الطيران المصري غيرنا البوردنق الطيارة المصرية تطير الساعة 1:20 الظهر وصلت الطيارة المصرية نزلت ركابها وركبنا طارت متأخرة 30 دقيقه
وصلنا بحمد لله لمطار القاهرة القديم نزلنا وركبنا باص ودخلنا المطار خلصنا من الجوازات ومن الجمارك مريت المكتب حق التاكسي قالي 107 جنيه ماركبت وياه طلعت مشيت تقريبا 300 متر ركبت مع تاكسي ابيض واسود بسعر 40 جنيه بيجو نظيفة جداً الجو كان حلو معتدل على الزمالك يا أسطى وصلت الزمالك قبل أذان المغرب بقليل المغرب يأذن الساعة 5:10 بتوقيت القاهرة نزلت عند سائق تاكسي اسمه صلاح دازني عليه ابن عمي وراني ثلاث شقق ثنتين حلوين وشقه وسط اخترت شقه أخذتها بسعر 400 جنيه قلت للبواب الشقة لا يدخلها وانا مو موجود اي شخص ( قلتله ها الكلام لان البواب دخلني شقه كانوا ساكنين فيها سعودين وكانو طالعين اكتشفت بعد ماطلعت قالي الشقه هذي تفضا بكره)
السكن بدون تامين ( هذي تعلمتها من المنتدى جزاه الله خير الي نورني بها المعلومه ) وافق على شروطي سويت عقد لمدة 5 أيام دفعت المبلغ كامل 2000 جنيه
بالنسبة للسائق سيارته بيجو ابيض حالتها فوق المتوسط بسعر 100 جنيه + يسوي لي الفطور إذا طلبت منه وينظف الشقة أي وقت اطلب منه قلتله ودني سوبر ماركت مترو واشتريت كل إلي احتاج له من شاي وسكر واجبان وكل لوازم الفطور ولوازم النظافة بسعر 320 جنيه وشريت خط فودا فون من محل قريب من سوبر ماركت مترو بسعر 190 جنيه مشحون 95 جنيه ( سوبر دردشة ) سعر الدقيقة 39 قرش .
الساعة 8 اتصلت بصاحبي يدرس بجامعة حلوان وواعدني بقهوة عشان مباراة الانتر وميلان بيشوفها طلعت على شارع احمد عرابي رحت لقهوة اسمها ( مارش ) قهوة عاديه جداً وصلتها على الشوط الثاني طلبت شيشة وشاي قعدت فيها انا وصاحبي تقريبا ساعة وطلعنا على مطعم اسمه ماي كوين بشارع جامعة الدول العربية أكله حلو لكن مشكلته أكله كله تيك أوي أكل وأنت بالسيارة تعشينا واستأذن صاحبي يبي يروح وبعدها رحت لقهوة اسمها ( اكسبرسو ) بشارع شهاب قعدت فيها ساعتين قهوة حلوه وبعدها طلعت على الشقة .
مواصفات الشقة في الزمالك في شارع ابو الفدا تتكون من ثلاث غرف نوم وصالتين كبار وثلاث بلوكونات ثنتين منهم يطلون على النيل ووحده تطل على شارع فرعي وثلاث حمامات ومطبخ مجهز وطاولة طعام .
بالنسبة لشارع ابوالفدا الشارع على النيل لكن مشكلته انك ماتقدر تقعد على النيل كله أملاك خاصة أو حكوميه فيه نادي المستشارين والقضاة ونادي طلائع الجيش ومادري شنو أخر شارع أبو الفدا يوجد فندق أم كلثوم الجهة المقابلة لشارع أبو الفدا يفصل بينهما النيل هي امبابه منطقه شعبيه أخذت لها صوره وأخذت صوره لمسجد فيها اسمه الكتكات .
اليوم الثاني
صحيت الساعه 9 صباحاً اتصلت على السائق وصل الساعة 10 هو ساكن بشبرا حضرلي الفطور ونزلت على رمسيس هليتون اول شي دخلت للملحق عادي جداً واسعاره مبالغ فيها وخاصه محل جلابيات اسمه الدكان بالدور الارضي لفيت فيه ساعه وطلعت منه على الفندق جلست باللوبي لوبي حلو شربت معسل +كبتشينو بسعر 51 جنيه بعد ساعة طلعت على الكورنيش ومشيت من الكورنيش المقابل لفندق رمسيس هيلتون إلى الكورنيش المقابل لمستشفى القصر العيني قرابة 6 كيلو متر تقريبا وبعدها ركبت مع السواق مريت هارديز ورحت للشقة .
الساعة 5:30 بعد صلاة المغرب طلعت مره ثانيه للجراند حياه حجزت بالمركب بسعر 231 جنيه مع العشاء بدون مشروبات ورحت قعدت باللوبي طلبت كبتشينو + شاي بسعر 51 جنيه
الساعه 8 ركبت المركب صراحه للامانه مركب مايستاهل حتى 50 جنيه وجهة نظري الشخصيه بعكس اللوبي حق الجراند حياه اللوبي افضل من لوبي هيلتون رمسيس الساعه 10 نزلنا من المركب طلعت اتمشى على الكورنيش وصعدت كوبري قصر النيل ووقفت عند كازينو قصرالنيل وركبت مع السواق من هناك على الشقه لتغير الملابس وبعدها طلعت على الحسين تمشيت في الحسين وخان الخليلي وقعدت في قهوة الفيشاوي لمدة ساعه ونص ولاحظت اغلب روادها خليجين وبعدها رحت لشارع جامعة الدول العربيه وشربتلي كاس من فرغلي عدلي مزاجي ورحت للشقه .
اليوم الثالث
طلعت من الشقه على صالون حلاقه اسمه سيد المصري بشارع جامعة الدول العربيه الدخله الي قبل فرغلي مباشره 100 متر يكون على اليمين الحلاق اسمه ياسر لكن اكتشفت ان الصالون مسكر رحت ادور صالون حلاقه ثاني لقيت واحد جنب النبيله كايرو قلته متى يفتحون الحلاقين عندكم بالعاده قالي يوم الاثنين اغلب صالونات الحلاقه مايفتحون عطله عندهم 95 % مسكرين حلقت عنده اسمه اعتقد سيد الصغير الصالون تعبان وانصح محد يحلق عنده بعد ماحلقت طلعت على الدقي شريت شيشة معسل كامله ورحت على قلعة صلاح الدين التذكره 2 جنيه القلعه فيها متحف الشرطه ومسجد اسمه صعب اعتقد اسمه قلاوون والمتحف الحربي لفيت بالقلعه ساعتين وصورت كم صوره المتحف الحربي رسوم الكامره 1 جنيه وبعدها رجعت على الشقه وعزمت صاحبي يدرس في جامعة حلوان يجي يتعشى عندي ,
