والله يالمديونير شكلها رحلة جميلة..
وسلوبك رهيب ماشاء الله ذبحتني من الضحك.. ننتظر التكملة عجل علينا ونبي صور لو امكن..

حياك الله اخوي الشهاب وبانتظار تفاصيل رحلتك القصيره إلى القاهره واتوقع انها مليئه بالمواقف
ودامك شربت من مية النيل فحترقع تاني ;)
وحياك مرة اخرى في منتدى العرب المسافرون وفي بوابة مصر

لاطول علينا على شان
ماننسى المشهد الاول
وشكلها رحلة مليئة بالمغامرات
والمواقف الطريفة

يعطيك العافيه اخوى الشهاب....ماشاء الله عليك روعه فى الاسلوب...وشوقتنا لباقى الرحله..

مشكور اخوي على المقدمة الجميلة وخفة دمك
وبانتظار البقية
بس لاتنسى المواقف الحلوة

ايش حكاية المفلسين اللي ماشين في البلد اليومين دول
ترى ننتظر التكملة يمكن لاقي لك كنز فرعوني ولا شي

الإخوة الأفاضل/
أبو معاذ
مشكور على مشاعرك الجميلة..وياني مصور صور ..بس للأسف الشديد..غشيم في الكمبيوتر ولاعندي سنكرز اللي يدخلون به الصور
أبو ملاك
والله اللي قال (اللي يشرب من مية النيل لازم يرجع ثاني) ماكذب ..ناوي هالأيام أزرق للقاهرة والاسكندرية..ومشكور اخوي على مرورك
المشاغب
اذا نسيت الحلقة لاأولى ..تراهم يعيدونها بالليل لاتفوتك.ومشكور على تشريفك لنا
Nova
شرفت الموضوع أخوي ...وصدقني إن روايتي هذه لو أطبعها وانشره ابتآخذ جائزة نوبل(في الفشل)
ابو احمد
ابشر أخوي..ومشكور على كلامك الحلو وتعقيبك المشجع
Navigator
في الانتظار على المدار...وشكراً على مرورك (وانتظارك)
SaudiMfls
هلا والله بأخي (في الإفلاس)...وتوأمي (في الطفرة)..ومشكور على إفلاسك(أقصد تعقبيك

اعذروني ياشباب إذا تأخرت عليكم..فأنا وكما تعلمون(بزنس مان)...وأصحاب البزنس أوقاتهم مو ملكهم ..خاصة إذا كان (بزنس مان ناجح) أمثالنا.:rolleyes:
المهم رحنا للمطار متأخرين..الرحلة الساعة ثلاث ..وإنا ماحركنا للمطار إلا الساعة2.15 والسبب خويي أخرنا(ماقلت لكم إنه مهوي)..
وصلنا المطار..دخلنا على الكاونتر ..وقصينا كرت صعود الطائرة(..لاحظوا إني ماقلت بوردينق..لأني ماعندي انهزامية وأعتز جداً ..ب ماي لانق ويقmy language )
وبعدها ختمنا الجوازات..وبسرعة البرق(الله عليك كذا التشبيهات ولا بلاش)...وصلنا للبوابة ..ودخلنا الطائرة في اللحظات الأخيرة ..كنا آخر راكبين ..نصل الطائرة..
جلسنا على مقاعدنا..ودقايق إلا والطائرة تتحرك..لاحظت قلة المسافرين على الطائرة وقد عزوت ذلك(حلوة عزوت هذه مسوي فيها مثقف;)) لبداية الدراسة وانتهاء الإجازة
أقلعت الرحلة في تمام الساعة 3.10..كانت الطائرة من عشيرة (بوينغ) واسمها(جامبو) وهي أكبر العيال
وهي قديمة متهالكة مجددة بعض الشيء..بس الحق ينقال ..إنهم جزاهم الله خير ماقصروا (كلها سبعة مطبات وعشرة اهتزازات وتسعة اختلالات جوية بس)
استغرقت الرحلة قرابة الساعتين ..وانقضت كنها دقيقتين(مو من زين الرحلة وفخامة الطائرة...لكن خويي كان يروي لي قصة طويلة بدأ بها في الرياض وأنهاها في القاهرة (دخل موسوعة جينيس في أطول قصة مختلقة )
لما اقتربنا من القاهرة..بدت عمائرها القديمة..ومبانيها العتيقة..ومعالمها الشهيرة...(وغبي والله اللي مايقعد بجنب الدريشة)
وصلنا مطار القاهرة الجوي..أو كما يسمونه(من الدلاخة) ميناء القاهرة الجوي(على بالهم فيه سفن تطير)
كانت الساعة عندما وصلنا تشير للساعة5.20 مساء..والمطار عموما لايبدو عليه أنه حديث أو جميل
وقفت الطائرة عند خرطوش الركاب(أو خرطوم الركاب..والسبب في الاختلاف أن قبيلة جرهم بن حمير الطائي تنطق الشين ميم..يعني بوش ..عندهم ينطقونه ...بوم)
أول ماوقفت الطائرة قمت عشان أنزل فأمسك خويي بتلابيبي (والتلابيب ثياب باكستانية تصنع في تل أبيب فنسبت إليها)
وقال لي : ليش العجلة ..كلنا نازلين نازلين..وهي حكمة عظيمة..ونصيحة مفيدة(وبعدين اكتشفت السبب ..خويي يبي يكمل لي سالفته اللي بدأ بها في الرياض)
المهم خرجنا من البوابة ..وأول ما يواجهك في المطار هذه الآية(ادخلوا مصر إن شاء الله آمنين)وهي معلم من معالم المطار والقاهرة(تشوفونها دايما في الأفلام)
..مشينا واجتزنا السوق الحرة ..ولفت نظري محل كبير كله خمور (والعياذ بالله)..وهو منظر لم اعتد عليه في الرياض (حرسها الله) وصلت أنا وخويي (حفظني الله) إلى الجوازات ..فهالني عدد الطوابير والزحمة اللي فيها ..وقلت لخويي: عز الله مانطلع من هنا إلا وش الفقر(وجه الفجر ..خلاص بدينا نتكلم مصري)..المهم خويي قال لي ولا يهمك أنا بكمل لك سالفتي العجيبة وقصتي الغريبة ..ولا بتحس بالوقت(والله الرجال شكله جايبني معه عشان يعطيني من الرخيص وأنا أسمع)....خفّت الزحمة ..ووصلنا عند موظف الجوازات (وهو مادن بوزه..مايعرف يبتسم كعادة الموظفين في الدول العربية)
وختمنا الجوازات ..وخرجنا من الصالة..و...
وهنا أدرك شهاب زاد الظلام...فانثبر وسكت عن الكلام