السلام عليكم ورحمة الله وبركاته
حبيت تشاركونى رحلتى للقلعة وحديقة الأزهر لأنى استمتعت بيها وأنا معروف عنى انى مش أى حاجه بتعجبنى
بس عجبنى قوى الخلط ما بين التاريخ من خلال رحلة القلعة والطبيعه الجميلة من خلال حديقة الأزهر
أولا علشان تستمتع برحلة زى دى لازم تكون فى مجموعه ومش لوحدك لأن هناك تفاصيل كتير الفرد الواحد مش بيقدر ياخد باله منها لكن لو مجموعه بتلاقى كل واحد بتعجه حاجه بيلفت نظر الآخر ليها فبيكون فى إلمام أكتر بالمعلومات
كمان يفضل أنه يكون معاك عربية خاصه علشان تنتقل بسهولة من مكان لآخر وخصوصًا إن القلعة وحديقة الأزهر جنب بعض فبيكون أحسن ان الواحد يزورهم فى يوم واحد . طبعا الواحد المفروض يزور القلعه الأول علشان بتقفل بدري لكن حديقة الأزهر بتفضل مفتوحه لوقت متأخر عن القلعه .
أولا خرجنا من البيت على الساعه 9 صباحًا وكان معانا ميكروباص علشان يقضى العيلة
نبتدى بقى نتفرج على الصور وسامحونى لو كان فى صور مش واضحه لأنى صورت بالموبايل
أولا دا المطلع بتاع القلعه وممنوع طلوع أى عربات خاصه فيه إلا طبعا اتوبيسات الأفواج السياحية واحنا طبعا طلعنا على رجلنا وكان طويل وعالى ولكنه كان ممتع لأقصى حد والصورة دى بعد ما طلعنا وبتشوف فيه القاهرة القديمة من فوق منظر غاية فى الروعه
ولو وقفت فى نفس المكان ولفيت هتلاقى الباب الرئيسى لدخول القلعة وشباك التذاكر
ودا منظر الباب من مسافه قريبه
وهنا صورة لتذكرة الدخول ب 2 جنية للفرد
و دى الصورة بعد الدخول من الباب الرئيسى و هو ممر طويل وجميل وعلى شمالك وانت ماشى فيه هتلاقى مساحات خضراء
و فى الممر ده لفت نظرى اليافطه دى
ومع نهاية الممر بتلاقى المنظر البديع ده
وبنلف مع الممر علشان نبتدى مرحلة الأستكشاف
أول حاجه بتقابلنا هو مسجد غير مشهور ولكن أنا مجرد ما دخلته و وقفت فيه حسيت انى هقابل حد من العصر ده ويكلمنى . فعلاً احساس رائع وده منظر القبله فيه لأنه مسجد بدون سقف إلا منطقة القبلة
و فى نهاية الممر بلاقى نقطة بتتفرع ل 3 اتجاهات الأولى القلعه ودى ظاهرة فى الشاشه ولو انت واقف فى نفس المكان هيكون المكان الثانى وهو متحف الشرطه القومى على اليمين ووراك المتحف الحربى.
احنا فى البداية دخلنا متحف الشرطه القومى ودى صورته من برة.
وبعد الدخول من البوابة دى بتلاقى نفسك واقف على سطح كبير وشايف القاهرة من فوق وكان منظر رائع
ومعلش اعذرونى فى صور للمكان ده مش هقدر اعرضها علشان فيها أفراد من العائلة ولكن فى بعض الصور هنزلها لكن بصراحه مش هتقدر توصف المكان الرائع ده
وبعدين دخلنا المتحف ودى بعض الصور من المعروض فى الداخل دا اللبس اللى كان بيلبسه أفراد الشرطه المصرية زمان
ومش هقدر أوصفلكم جمال التصميم وتناسق الزى وكمان التماثيل كانت من الشمع فبتحس انك لو كلمت التمثال هيرد عليك . ومش هخبى عليكم انا لما وقفت قدامه خفت ليبصلى ويتحرك فمشيت من سكات ....
و دى بعض الأدوات الحربية
و دى صورة ريا وسكينة الحقيقية
و دول أفراد الشرطة المصرية يتفاخرون فى القبض على أفراد عصابة ريا و سكينة ودى الجثث
لسه الموضوع مخلصش ... كمل لتحت
نيجى للمتحف الحربى القومى
والمتحف ده جزء منه داخلى معمول فى قصر لو فضلت أشرحلكم من دلوقتى لأسبوع مش هقدر أخلصه وجزء خارجى
أولا القصر كبير جدا تعبنا على ما لفينا فيه ويا ريتنا خلصناه !
هعرض لكم بعض الصور للمتحف الخارجى
ودى صور للقصر من الداخل
وهنشوف صور لبعض الملابس الحربيه والرتب والماكيتات التى تمثل العصور المختلفة و الصور المرسومه باليد
نيجى بقى لجامع محمد على
أكتر حاجه خليتنى طايرة من الفرحه ان وقت دخولنا للمسجد كان أذان الجمعه بيأذن فدخلنا وصلينا الجمعه
فى جامع محمد على
وانا حاسه انى مكنتش حاسه بالخطبه من كتر ما كنت مذهوله ومبهورة بالمسجد
ايه العظمة دى .... ايه الجمال ده ...... ايه التحفه المعماريه دى
المشكله انى وقت الخطبة مكنتش قادرة أصور المسجد وبعد الصلاة كانوا بيخرجوا الناس علشان كان فى وفد سياحى داخل فمعرفتش أصور التفاصيل
وعلى العموم مهما صورت مش هينفع لأنى هظلم المسجد لأن الصور مش هيبان فيها حاجات كتير