1. حديقة الحيوانات:


2. حديقة الطيور:


3. معبد الهندوس:


4. الحشره المضيئه :-


5. منطقة جنتغ :


6. لايفوتك منتجع افوموسى :


7. منطقه بيننج او بياننج:


8. الفنادق:-


9. منطقه بياننج او بيينج


10. جزيرة لنكاوي ........::


11. العوده ؟؟؟؟؟ مع نفس الخطوط وين بتروح بعد ؟؟؟ ياروح مابعدك روح

وسع صدرك بماليزيا--- مواقف - مغامرات
اغسطس 2003
من وين ابدا .... سوالف كثيره وموقف حلوه ومقالب بس بصراحه رحله ممتعه تسجل بالتاريخ ولاتنسى ابد والرحله عائليه طبعا ؟؟ وهذي اول مشاركه لي بالمنتدى اللي استفدت منه قبل السفر
طبعا الرحله واقعيه لكن من باب الامانه زدت عليها بهارات لتكون القصه حلوه لكن 95 بالمئه ثابته وحاصله والهدف منها اخذ فكره ومعلومات وتسليه ووسع صدرك ؟؟؟؟؟
فكرة السفر ... العائله مصره على سفره هالسنه بس اذا كان وياك جريره اقصد عوايل يحتاج الى ترتيب الوضع والميزانيه ؟؟؟ والحال ميسور ولله الحمد نوعا ما بس مو لدرجة اني اصرف تذاكر بقيمة اربعين الف لا طبعا ... المهم اللي .. شجعنا على السفر لقيت عرض على الخطوط القطريه عرض خيالي من احد المكاتب بالبحرين وحنا سكنا بالشرقيه ماتفرق يعني اهل الشرقيه عندنا مطارين الدمام والبحرين . العرض اللي نزل سعر التذكره 1330 ريال أي والله صدق او لاتصدق بكيفك ممكن تسئل الخطوط ؟؟؟ بلغت العائله المصونه وتاكد السفر وانتشر خبر السفر للاهل كلهم .. يوم رحت اشتري التذاكر قالوا لي المكتب نفذت وخلصت يعني صرفوها لمعارفهم ؟؟؟؟ افا مايصير غير بدل ؟؟؟ المهم مانقدر نتراجع عن السفر.. فشله؟ عزمنا ولقيت على الخطوط التايلنديه 2100 للتذكره للشخص الواحد واشترينا وعزمنا ؟؟ ومضطر اسافر في هالوقت ما يحتمل التاخير عشان الاجازه قصيره ؟؟؟ بس واحد خوفني من الشباب قال لي احد يروح على الخطوط التايلنديه ؟؟ قلت اشفيها ؟؟ قال هذي توصل ما توصل انت وحظك ؟؟ وقال اذا ركبت الطياره التفت على يمينك تلاقي اثنين حق الصيانه معهم العده لو اختربت الطياره جاهزين ؟؟؟ المهم عزمنا وتوكلنا على الله واشدراهم الاهل عن أي خطوط راكبين ؟؟ الوالده بتركب وتحسب انها راكبه قطارمن الدمام الى الرياض ؟؟ المهم توصل ؟؟ جاء وقت الاقلاع وتاخرت الرحله ؟؟؟ طرا على بالي كلام زميلي ؟؟؟ والتفت على الوالده واقولها كثري من الدعاء ؟ قالت اشفيك انت مو طبيعي ؟؟ قلت بلاك ماتدرين وش بيصير الحين ؟؟ والتفت على يساري الا هذا يوسف اخو صديقي اللي ماذينا بالحاره ومعه 2 اظنهم من حارة جبله بالدمام اللبس غلط وكل شي غلط فيهم بيروحون لبانكوك مع ان السعوديين ممنوعين من دخولها بس يمكن فيه طرق ملتويه ؟؟ المهم يوم شفت شلة هالشباب اللي اذا شفت وجيهم ما شفت العافيه ولا توسمت بخير ؟؟ جزمت ان بنطلع في السي ان ان --- سقوط الطائره في المحيط الهندي؟؟؟؟؟ اقلعت الطائره بعد تاخر عن الموعد 40 دقيقه ؟؟ جاء وقت الاكل ؟؟ شو تاكل الحين ماتدري هاللحوم والشحوم والزيوت خنزير او لا وتوقع سلطه محشيه بعقارب ومحشي حيات بالفرن ؟؟ عاد الحين من زين التورع بس ودك باكل نظيف وحلال ؟؟ مشت الامور وصلنا بانكوك -تايلند لان الرحله ترانزيت وبمطارها جلسنا 6 ساعات وقت طويل بسطناها قهوة الوالده صج انها بايته بس لها نكهة واللي يمر مايشتري يتفرج عبايات وغطاوي كنك قاعد بسوق واقف بالبحرين صرنا فرجه بس انا كاشخ كرفته وشغل عدل الاستغراب واصل حده يمكن بمايزيا اهون شوي ديرة مسلمين ؟؟؟ جاء وقت الاقلاع الى مايزيا ؟؟ وادور احد اخواني ؟؟ ما شفته ؟؟ اثاريه نايم تحت احد الكراسي ؟؟ وكنه يقول في نفسه خلوني في بانكوك واذا جيتوا راجعين برجع معكم ؟؟؟ هيه بلد الحريه ... شاب مراهق 17سنه ؟؟ قلت يالله يا ؟؟ قدامي والا ترجع لديرتك ؟؟ اقلعنا من بانكوك مع التاخير طبعا في الموعد كالعاده وهي سمه تتميز بها هذي الخطوط ويشغلونك فلم رقص وهز بس زين الكل نايم الا اخوي التفت عليه مسوي روحه نايم عين مغمضه وعين نايمه ؟؟ وصلنا بتوقيت ماليزيا 7 مساء يوم الثلاثاء وحنا مقلعين من البحرين الساعه 11مساء الاثنين ؟؟؟ عليك الحساب؟؟؟ قلت هيه وينك يالخطوط السعوديه اول ماتركب تسمع دعاء السفر يطمئن قلبك وتاكل وتشرب وانت مطمن )الله يعز الحكومه( المهم اخذنا سيارتين تاكسي ويالله كفت وعلى كوالمبور ؟؟اخذت ارقام السواقين من هذا المنتدى بس السواق اللي جانا ما يتكلم عربي ؟؟
بس بقول نصيحه اذا انت حاسب ميزانيه للرحله قد بقد ومحدوده ترى تذاكر السفر والفنادق كوم والتكاسي والمطاعم كوم بمعنى مصروف التكاسي والمعيشه كثيره بالحيل؟؟؟ المهم سواقنا اللي كلمته من السعوديه ضبط لي الفندق اللي بنسكن فيه اول ليله وبعدين انا بشوف على راحتي الفنادق اول فندق سكنا فيه اسمه نوفتيل لاباس به بس بصراحه انا ما اعتمدت على مكاتب السياحه والبكجات قلت اجرب واشتغل بنفسي ؟؟ بس فيها تعب شوي والتلفون ما يوقف بس نصيحه اذا معك عائله كبيره خذه بحجز كامل ترتاح؟؟؟ لكن انا تعبت شوي والعائله معي ماشين معهم مطوف حملداري فاهم ؟؟؟
كوالمبور جلسنا فيها 6 ايام ؟ ؟؟ بس بصراحه يقولون الديره بلد اسلامي والله ماتشوف من مظاهر الاسلام الا اسمه خاصة العاصمه وتعال بالليل امشي باحد الشوراع تلاقي مسخره صحيح شارع العرب اللي فيه مطعم الطربوش ما تستوحش لان كل اللي فيه يمشون وجالسين بالمقاهي عرب سعوديين وخليجيين يعني كنك طالع تتمشى بشارع منفوحه العام بالرياض
او كنك بشارع الرقه بدبي واذا عندك مبزره ويهال وبالليل افضل شي البلايستشن والعاب الكمبيوتر احفظ لهم ؟؟؟
بس للامانه الماليزيات احسن حال شوي تلاقي الحجاب متقيدين فيه ومتمسكين فيه حتى العاملات بالمطار؟؟
وتوفقت بسواق يتكلم عربي اسمه ناصر وحرصت ان يكون معنا هو وسواق ثاني مو بس يتكلم عربي اعتبره مرشد سياحي وامين الرجل واخلاق عاليه والزين فيه كل ما تدور عليه تلاقيه قاعد بمسجد يقرا ويصلي ؟؟؟ تطمن لما توكله مع العائله طبعا معهم محرم اكيد ؟؟؟ السواقين اللي يتكلمون عربي كثير لاتهتم من هذي الناحيه ؟؟؟؟
مشكله ثانيه واجهتنا ان جلوسنا متعودين نجلس بدري من الساعه 6.30 لكن في هالوقت كل شي مسكر الا المطعم الفندق للفطور يكون فاتح لكن ودك تروح تزور اماكن سياحيه مايفتحون الا الساعه عشر وفوق حتى الاسواق؟؟؟

حديقة الحيوانات:

انا اشوفها عاديه ما فيها شي مميز ثيران وبعارين وقرود ما كثر الله من الثيران والقرود اللي عندنا - مستغنين ؟؟؟ بس يمكن نظامها انها مفتوحه بدون اقفاص مطلقين الحيوانات بينك وبينهم مجرى مائي ؟ بس اللي شد انتباهنا اكثر هي

حديقة الطيور:

: كمكان حلو وهادي مصممه تصميم غريب وتشوف الطيور بانواعها والطاوس يتجول بكل مكان يعني لو كنت متزوج بشهر العسل تاخذ الحرمه على جنب وتتشطر بعيد محد يشوفك وتجلس امام احد الشلالات وتسمع زغزقة العصافير والطاوس يدور من حولك والاشجار الخضراء سبحان من ابدعها تضفي جمال على جمال للمنظر ؟ والتفت عن يميني والاقي رجال شايب مع زوجته من دوله خليجيه جالسين بروحاتهم وضحك وكركره الله يهنيهم سمعت تقوله يا ابوعدنان يووز عن هالغشمره وصور تذكاريه بس مالها داعي هالصور شو بيتذكر شو بقى من العمر يالله حسن الخاتمه بس ضربوا اروع الامثله في الرومانسيه ؟ تعلم ياجافي يا جلف ؟؟
حديقة الفراشات :
انا اشوف اللي في بيننج احلى من اللي بكوالمبور من ناحية توافرالفراشات بكثره وتقدر تصور معها؟؟؟
حديقه الزهور :
ماله داعي الروحه لها ماتستاهل بس الاسم جذاب قلنا بنشوف زهور اشكال والوان ما شفنا شي مميز ويذكر اللي بحديقة بيتنا اجمل واحسن .

معبد الهندوس:

هذا ودك تحط تحته دناميت وتزلزله من اوله لاخره بعضنا دخله من باب الفضول والبعض لا ؟؟؟؟ ترقى هالدرج اللي يتكون تقريبا من 257 درجه صاعد لاعلى داخل جبل وماتشوف الا اصنامهم وآلهتهم وطقوس عباداتهم لما تشوفهم تقول الحمدلله على نعمة الاسلام والعقل ؟؟
شلالات تلبربارك بكوالمبور اشوفها عاديه جدا وبعدين تحتاج الى صعود لاعلى اللي ركبه ماتشيله لايروح احسن
حديقه الويندرلاند حديقه هاديه بالمره تشوف تماثيل الحيونات في كل جانب وتشوف الاضاءة بالليل بالحديقه احلى وفيها ملاهي للاطفال وفيه سوق حلو حولها واسعاره زينه

الحشره المضيئه :-

زرناها بس مشوارها طويل وتمر على مزراع ونخيل واشجار الزيت يهيأ لك انك بمزارع القطيف والحساء ؟ المشوار كله ساعتين رايح وساعتين راجع وتشوف الحشرات لمدة ربع ساعه في نهر بالليل والجو مظلم بالمره وانت بالقارب بس بصراحه منظر جميل للحشرات وهي مضيئه سبحانك ربي اضاءه واصوات تقول انك داخل عرس ؟

منطقة جنتغ :

خوش منطقه توصل لمحطة التلفريك وينقلك الى فنادق ومنتجعات المنطقه ؟؟ بس التلفريك لحاله روعه 20 دقيقه وانت محلق على ارتفاع عالي والضباب من حولك والجو بارد نوعا ما والدنيا خضراء من حولك بس انتبه لو خرب التلفريك وطاح فيك ترى اسد بانتظارك ؟؟ لا لاتخاف الوضع امن ؟؟ مدينة الالعاب بجنتغ تستاهل اكثر من ثلاث ايام للي عنده اطفال؟؟ الكبار حنا قمنا نلعب مثل المهابيل أي رزانه أي ثقل ؟؟ اخر وناسه ؟؟ وطبعا عندك اسواق ومطاعم بهذي المنطقه ؟؟؟؟
اكيد عندك منارة كوالمبور والبرجين خصص لهم زياره عن النفس والخاطر بدون تفصيل ؟؟

لايفوتك منتجع افوموسى :

ماادري هو اسمه افو موسى او افو عيسى نسيت ؟؟ بس المنتجع يستاهل صج المشوار طويل ساعه ونصف واكثر بس بتنبسط اذا حضرت العروض - رعاة البقر الكوبوي وعرض القرود وعرض الطيور والحديقه المائيه ؟؟؟
الامن ؟؟ الامن هناك مستتب نوعا ما والسائح له مكانه خاصة واهتمام من الدوله لكن مشكله الصينيين خذ حذرك منهم نفوسهم في خشومهم الفطسه؟؟ شين وقوي عين ؟؟ بس الحذر بالليل بشكل عام ؟؟ وقدامنا صار موقف سرقه حرمه سعوديه تمشي مع زوجها وحاطه الشنطه)ماركة كريستنديور( على الكتف وهي راجعه للفندق ويجي اثنين بالدباب وينزل واحد ويلطش الشنطه وعينك ماتشوف الا النور ولا ينفع البكاء ولا العويل يقول زوجها فيها فلوس 5000الاف ريال تو صارفينها ؟؟ دام عليك عباءة حطي الشنطه تحت العباءة؟؟ ما ينفع حذر من قدر ؟؟؟ ويا كثر الدبابات هناك اخف عن الزحمه من كثر الازدحام بالمدينه تعاف نفسك؟؟ مثل سياكل ربعنا سيكل صتي وانت ماشي ؟؟؟
الجو بكوالمبور:
وقت روحتنا حار على رطب وبعض الاحيان تعاف نفسك بس الامطار والغيوم تلطف الجو ؟ بس مو مثل حرنا الله يجيرك من النار عندنا نار تلظى ولواهيب تشق الوجه وغيظ تلسع وتصلى ولد الناقه من شدة الحر ؟؟
اما المساج:-
شغلة من لاشغله عنده مثل بياعين الجوالات عندنا منتشرين بكل مكان انسدح بس وماتشوف نفسك الا مسمكر عدل مع ترصيص الكفرات اقصد مساج الرجول الطبي يفرك اصبعك الكبير للقدم واذا قلت آي قال عندك الطحال خربانه
واذا توجعت من باطن القدم قال عندك البنكرياس ملتهبه واذا توجعت من مؤخرة القدم قال عندك اللوز فيها احتقان ؟؟ وفي الاخير بيطلع كل شي عندك خربان

منطقه بيننج او بياننج:

قل اشلون رحنا لها حجزنا على الخطوط الاسيويه سعرها حلو نص السعر عن الخطوط الماليزيا بس مجرد تشوف الطائره تقول يازينك يالخطوط التايلنديه اسياتها ) مقاعدها( جلد كنك راكب داتسن غمارتين والاصطاب اقصد اللمبه مكسوره والكراسي من سبق لبق واصلا ما فيه شي اسمه تذكره وبوردنق لا كل الشغله ورقه صغيره كبر الاصبع هذي تركبك الطائره؟؟؟ والمضيفه اللي بالطياره وحده بس وهي اللي قطعت لنا التذاكر في المطار ؟؟ مدة الرحله ساعه ؟؟ وعلى بالك فيه خدمه لا ؟؟ تشتري الماء بفلوسك ؟؟ احمد ربك راكب بمئتين التذكره ؟؟؟ هذي اللي توصل ما توصل ؟؟؟ طارت زين ما فيها شي بس يوم حطت بالمطار كنه واحد مزنط لك وشال بك فوق ودق بك بالارض هذا اللي صار ؟؟؟؟

الفنادق:-

سكنا بفندق نوفتيل ثم فندق فيدرال اربع نجوم ثم توفقت بفندق راقي جدا اسمه استانا خمس نجوم السويت فيه بسعر زهيد جدا مسوين عرض عرفت ذلك بسبب تعاملي بمكتب عبير للسياحه بماليزيا الاخوان هناك افادوني كثير خصوصا هم من مواليد السعوديه واذا سولفت معهم كنك قاعد مع شباب اهل الحجاز بحي المسفله بمكه المكرمه ياواد ياهو سيبك من الهرجه هادي

منطقه بياننج او بيينج

منطقه هاديه ورومانسيه وجميله تصلح للعرسان واللي متهاوش مع زوجته يوديها هناك يغسل شبدها وترجع راضيه ؟ منتجعات خضراء فنادق خمس نجوم على البحر باسعار حلوه بس بالليل ماحولك شي ولا في مكان تروح الا المطاعم العربيه علي بابا و القصر بالاس وبامكانك اللعب عند الشاطيء ركوب البراشوت جرب حلو وممتع والتقط صور تذكاريه لك الدبابات البحريه والسكاي وقوارب الصيد وغيرها
سكنا بفندق بارك رويال الملاصق للهوليدي ان افخم منه بس سعره اغلى شوي من الهوليدي ان القديم
ممكن تروح لجبل بييانج تجد فوق حديقه تركب القاطره بس انا مليت من طول المده والبطء في الصعود صحيح الارتفاع عالي والجو منعش بس الامر عادي جدا
حديقة الفواكه ::
؟؟ حلوه بيستانسون كبار السن عليها بيشوفون شجر الدارسين القرفه والقهوه والكاكاو والاناناس واصغر ليمون بالعالم وشجر البهارات والمخدرات جوزة الطيب وشجر القشطه والبرشومي الناعم مو مثل حق الطايف شوك ؟؟؟؟؟؟

جزيرة لنكاوي ........::

الجزيره حلوه بس اشلون بتروح لها اذا ركبت البوت يخت الله يعينك وهذا اللي صار لنا ركبنا قدام وبعضنا اول مره يركب بوت مستانسين الربع ؟؟؟ هو مشى ؟؟؟ الا كل حاط يده على قلبه ؟؟ الرجال حاط رجله داعس على البنزين ولاهمه احد ؟؟؟ والبوت يشيل بنفسه فوق ويحط على الماء والامواج تتلاطم انا خفت من خوف الناس ؟؟ طبعا العامل باليخت يوزع اكياس اول ماركبنا ؟؟ عرفنا ليش بعد ما مشى ؟؟ الله يكرمكم للاستفراغ والتطريش ؟؟ هو بقى احد ما استفرغ ؟؟؟ وتوبه ما اعيدها هالنوبه لسان حال الراكبين ؟؟؟ بس العوده ركبنا وراء صار اخف بكثير جدا ؟؟؟ ويمكن الذهاب لها بالطائره ؟؟
تزور عالم الا سماك اول مره بتشوف عينك اسماك كبيره بتندهش وانواع واشكال حلوه تستاهل الزياره وحديقة عالم الثعابين يعني مو الى هناك ؟؟؟ بس رجعنا بنفس اليوم لا شفنا ولا ابصرنا مع ان الجزيره هاديه واللي معنا يحبون الصجه واللجه ؟
واذا تبي التسوق وتبي من الهدايا الخرده والخربشه لاتنسى تمر السوق الصيني بس ماركات مقلده اذا قالك السعر 200 ريجنت قوله بخمسين يذكرك بسوق الغنم الشريطيه ينشبون فيك تقول يالله الفكاك؟؟
من الاشياء المهمه انتبه من الاكل اللي يباع في الكشكات كشك فواكه او غيره كلها وساخه وغير نظيفه ومتعودين يشيل الاكل بيده ويحط لك من زين هاليد ؟؟؟؟

العوده ؟؟؟؟؟ مع نفس الخطوط وين بتروح بعد ؟؟؟ ياروح مابعدك روح

طبعا التاخير هي السمه الواضحه ومرينا على بانكوك بس زين ما طولنا لكن الغريب والمضحك والمدهش والمفاجيء ان طريق عودتنا بعد اقلاعنا من بانكوك هبطت الطائره بمطار ابوظبي شو دخل ابوظبي بالسالفه التكت عندي مافي شي اسمه ابوظبي لكن يالله تحمل انت على الخطوط التايلنديه ونزلو ركاب ونزلنا نصف ساعه في السوق الحره وركبو معنا ركاب رايحين لبانكوك
واخيرا وصلنا للبحرين وعن طريقها للجسر ولله الحمد والمنه والى اللقاء في السفره القادمه الى اندونيسيا
COLOR]