انا راح اتكلم عن منتجع باب الشمس, استعدوا
الفندق يعتبر من الفنادق الفخمة في دبي وهو تابع لنفس ادارة برج العرب ( حسب ماسمعت)
فكرة الفندق مميزة وتكمن في تصميم فندق خمس نجوم ( ويمكن اكثر علشان الفخامة :24
في صحراء دبي ( عاد لاتتوقعون انها بالربع الخالي :109 , هي قريبة من دبي تقريبا 45 كيلو
بس لحظة قبل لا انسى التكاسي مو متوفرة ( علشان الفندق يعتبر في مقطعه :110 يبيلك تكلم الريسبشن يجهزونلك تاكسي قبل ساعة , طبعا اذا عندك سيارة وانت دليله شي ثاني, عن نفسي مرة لطعوني اكثر من ساعة ما وصلت دبي الا والناس نايمين
الفندق ممتاز للناس اللي يحبون البر ( بالنسبة لي انا نص بر ونص بحر)
بس طبعا رحت علشان صاحبي ماسكه معاه الا يجرب الفندق ( صراحه شكلهم كانوا مسوين عرض وصاحبي مسوي نفسه راعي مزاج :109
الفندق فيه كوفي شوب باللوبي وسويمنج بوول ( فيها كوفي شوب بعد)
صراحة اهل بر من جد اول ما دخلنا اسقبلونا بالقهوة والتمر
الغرف فخمة والديكور حقها تراثي و صحراوي
فيه مطعم اوبن بوفيه حلو حق العشاء ( كل اللي شغلاين فيه مصريين كنك بالقاهرة)
ياخذونك بالمايكرو باص من غرفتك لحد ما يوصلونك لطاولة العشاء
وبالرده يفضل انك تجي مشي علشان تهضم
اللي عجبني بالفندق كل غرفة مطله على طعس (علشان يعطونك جو بر من قلب)
صراحه كان شي جديد خصوصا اني متعود ومليت من كل ماأفتح البلكون اشوف بحر
فيه كوفي شوب حلو قريب من البحيرة , هذا احسن شي فيه الشاي المغربي والمعسل ( انا ما ادخن بس صاحبي كان داش جو بالمعسل :109
واحسن شي قبل المغرب بشوي تروح تركب الابل والخيل , بس ديروا بالكم يا جماعه ترى ما تسوى عليك اذا طحت.
( بالنسبة للفرسان مثلي طبعا ما عنده مشكلة :11ight
وعندهم بعد استعراض بالصقور ( ما يبيلك الا حبارى علشان تستانس)
وفيه رحلات سفاري بعد ( انا ما رحت بس يضبطونك :24
يعني الجماعه مغطين كل فعاليات البر ما بقى الا يحطون فقع حول الفندق
الشي الحلو بالفندق انك راح تنسى شي اسمه رطوبة ( اذا كنت مسافر بالصيف :112 علشان الفندق بعيد عن البحر
صراحة فكرة حلوة كان زين يطبقونها بالدمام
واذا ما طبقوها طق لك مخيم علشان تفتك
وانا اتوقع ان احسن وقت للفندق هو فبراير علشان موسم الربيع واعتدال الجو ( منو يخاويني )
انا رحت له في 2005 تقريبا والسعر على ما اذكر كان 900 ريال للغرفة ( هذا ومسوين عرض بعد :105
الحين اكيد السعر دبل
اللوبي حقه صغير فيه الريسبشن وكم محل صغير حق الشوبيينج الخفيف
ارجو اني اكون عطيتكم فكرة بسيطه عن الفندق وعذرا من التقصير
دمتم سالمين

هلا فيك اخوى الرصاصى من شفت نكك عرفت ان فيه فايده كبيره لانك كريم جدا بالمعلومات وفعلا الاسعار اختلفت ودبلت اكثر من اول انا باذن الله باكون فى دبى بالاجازه ودى اطلع يوم للبر بالذات مثل ما قلت شهر فبراير ربيع لكن انا محتاجه غرفتين نوم لان معى عائلتى معناها ميزانيه مو بسيطه ليوم او يومين بالبر الف شكر لك واتمنى من اللى يعرف عن منتجع المها لا يبخل علينا مثل اخوى الرصاصى بيض الله وجهك

يقولون أن كل غرفة لها بركة سباحة خاصة بها. هل هذا صحيح؟

اهلا بك ..
باب الشمس ومنتجع المها جميعها فئة خمس نجوم افضل وقت للزياره شهر يناير . فبراير او مارس
هذي بعض الروابط لها ..
موقع منتجع المها موقع منتجع باب الشمس http://ar.jumeirahbabalshams.com
وهذي بعض الروابط تفيدك كثير ...
لقطات بالفيديو لمنتجع باب الشمس ( السيده درجه اولى ) دعوه على العشاء منتجع باب الشمس ( الدار ) https://artravelers.com/p/re/51010
كان من المفروض ازور منتجع المها العام الماضي لكن تعبت البنيه الصغيره والغيت الزياره ..
لكن اذا المسئله تغيير جو .. ممكن ازور المنتجع كم ساعه على الغداء او العشاء لانه بصراحه الاسعار
مبالغ فيها بإعتبار الاجواء مناسبه والاجواء ماطره .. والخواجات عندهم هوس بالاشياء الصحراويه لذلك
الاسعار مرتفعه .. ( الاخبار الان الرئيس بوش يزور مناطق في صحاري الامارات )
انا ممكن ارشح فندق قصر الامارات في ابو ظبي كتغيير جو .. وازور المنتجع كم ساعه للغداء او العشاء
وارجع .. ( المكان بعيد وقد يمل الواحد بسرعه .. خصوصا اذا الواحد مقيد بجروب سياحي ولا هو حر
نفسه او معاه اطفال ) .. هذا ليس تقليل من المنتجعين فهما قمه في الفخامه .
هذا بوشور لمكتب سياحي سبق ووضعته في تقرير سابق ( ينظم رحلات بالساعه للمنتجعات في دبي )

تحياتي ...

هلا اخوى فهد وشرفنى مرورك والف شكر لتعليقك وانا معك مليون بالميه ان الاسعار مبالغ فيها جدا لدرجه تلغى الرحله وتكتفى بالمشاهده فقط من جد شغله ممله انا رايحه مع عائلتى يعنى اقل شى غرفتين نوم والتكلفه اكثر من 4 الالاف بالليله من غير الوجبات ولا السياره اللى تجيبك وترجعك ولا اى شى ؟؟؟؟؟؟؟؟الحمد لله احنا فى خير لكن فيه شى معقول وفيه شى لايعقل وعلى ايش الغلا مع احترامى للمنتجعين من جد جنوب افريقيا رحله سفارى حقيقيه مع سكن خمس نجوم باقل من نص التكلفه فى دبى حرام ودبى بلد عربى خليجى ويكون فيه الاسعار اللى كثير ناس انحرموا يستمتعون فيها ويروحون لاخر الدنيا بارخص تكلفه بينما دبى مو قادرين يستمتعون فيها ارجو ان كلامى لا يزعل احد والامارات بلدنا ولكن العله فى الشركات اللى تدير السياحه وتمتص دم العالم مو كل الناس امراء والا اغنياء ولا كل الموظفين يستلمون بالدولار الالاف مالها حد وبدلات تفوق دخل امير سامحونى انعلت لانى اخطط لرحله اسبوع فى دبى طلعت التكاليف اغلى ثلاث اضعاف رحلتى لاوروبا الصيف الماضى والمسافه بين الرياض ودبى ساعه ؟؟؟ حلوها الله يخليكم وبالرغم من ذلك انى رايحه لحبيبتى الامارات الشكوى لله والسموحه من الجميع ومنك اخوى فهد لانى خرجت من الموضوع و قصر الامارات فعلا رائع لكن سبق زرته فى اول سنه افتتح وسكنت فيه انا وزوجى ما يصلح الا للزوجين فقط لانه منتهى الرومانسيه ورحلتى هذى نص رومانسيه علشان بنتى وولدى معنا فافضل الصحراء والف شكر لاقتراحك