وعليكم السلام ورحمة الله وبركاته
اخي بومحمد اتمنى لك رحلة سعيدة
عندي بعض الاقتراحات وامل انها لا تكون ثقيلة
الذهاب الى اسبانيا (ماربيا، برشلونه، مدريد)
الانتقال من مدريد الى كان او نيس اتوقع ست ساعات بالقطار وهناك عروض من الخطوط الفرنسية على بعض المقاعد وهي محددة اي بعد الحجز وشراء التذكرة لا يمكنك تاخير او تقديم الرحلة
الانتقال من كان الى باريس خمس ساعات بالقطار 130 يورو للشخص
الانتقال من باريس الى بروكسل وهي ساعة ونصف تقريبا او الذهاب الى جنيف وزيارة مدينة منترو السويسرية اذا رغبت
الانتقال من بروكسل الى امستردام ساعتين تقريبا
الانتقال من امستردام الى لندن اتوقع ثلاث ساعات
امنياتي برحلة سعيده برفقة العائلة

مشكور أخوي سعودي 00 .. لكن رحلتك حلوه .. إذا شلنا منها أسبانيا .. لأن أسبانيا بروحها ( قارة ) لول
تحياتي وفي إنتظار باقي الآراء

1. ومنها تطلع بالطائره الى بروكسل ..( الطائره أوفر)


2. بروكسل ( 7 ليالي )

بومحمد
أول شي ودي أقولك .... مريم بتركب الطياره وانته بتركب وراها .....
وبعدين اذا هي ما رضت توديك وتسفرك السنه يكون الشور عندها .... وما تقدر تقولها لا ... تعجبني مريوم
تبى الصدق يا بو محمد .... اذا انته مسافر وراسم في بالك انه البنت بتكون عبئ عليك وما ودك توديها صدقني ما بترتاح .... اما اذا كنت حاط في بالك انه مافي مجل للسفر من دونها و ناستك بوجودها معاكم صدقني بتحس أي أمر يمر عليكم بتاخذونه بكل سهولة ....
بس من قبل ما تسافر حط في بالك انك لازم تاخذ أحتياطات البنت كامله مثل :
1/ دواء خافض للحراره ... ( لا سمح الله يمكن تحتاجونه ).... وانشالله لا .
2/ عربانه مريحه في الحركه والتنقل .... ويكون معها الواقي من الامطار .... وبتلقون الأفضل في مذركر ... وبعد بتلقون في محل شيكو في سيتي سنتر قطر موجودات .... يوم بتاخذ العربانه تأكد أنها تنزل لمستوى النوم ... يعني لو تنام البنت تقدر تنزل الكرسي لأخر شي وتاخذ البنت راحتها .....
3/ لا بد من قدر طبخ كهربائي صغير ... ( وكيس عيش) .... تدري انته عيالنا لا بد من العيش والروب ..... لأنه لو ماخذتوه معاكم بتتوهقون ولا بتلقون لها أكل وبتجتلون البنت من اليوع .
4/ غلاية ماء كهربائيه صغيره جدا ... بتلقى في الجمعيات أحجام صغيره سعة 250 مل ....عشان تفورون الماي حق حليب البنت .... لا تعتمد على الغلايات الموجوده في الفنادق سلامة البنت من متعة السفر .
5/ في طلعاتكم في السفر لا تاخذون تاخذون لها الروب بالفراوله والروب بالفواكه .... بتلقونه متوفر في السوبرماركت هناك ....
6/ اذا كنتوا مستثقلين تاخذون لها حفاضات .... ترا نفس الحفاضات الموجوده عندنا موجوده عندهم ... يعني خذوا كميه بسيطه تكفي ل كم يوم .
بعد شو ..... المهم انتبهوا على البنت وديروا بالكم عليها .... مب تاكلون وتشبعون وتنسون انه البنت تيوع ومحتاجه أكل ...
ثاني شي بالنسبه للسفر ... عرفت من ردودك وبعض مواضيعك انك راعي مدن يعني ما تحب القرى ... راعي كافيات وسوق ومطاعم ...... واللي عرفته بعد ما تحب التنقل وايد وتحب تستقر شوي في المكان اللي تمر عليه ... يعني الافضل ما تاخذ اقل من 5 ليالي في المكان الواحد
ومثل هذي الاشياء متوفره في المدن أكثر
نصيحتي لك .... ( على اساس انه الرحله بتكون شهر )
لو كنت على الخطوط الفرنسيه ... والله مب متأكده اذا تطلع عندكم الخطوط الفرنسيه والا
تاخذها
الدوحه ... باريس(ترانزيت) ... برشلونه .
برشلونه (6 ليالي)
برشلونه الى مدريد بالقطار ....
مدريد ( 5 ليالي )

ومنها تطلع بالطائره الى بروكسل ..( الطائره أوفر)

بروكسل ( 7 ليالي )

بقولك الحق بروكسل وحدها لا تستحق 7 ليالي .... لكن لأنه مدن بلجيكا قريبه وايد من بعضها لصغر مساحة الدوله ....ممكن تستغل السكن في بروكسل وهي في منتصف بلجيكا وتطلع .... انتورب ... وبروج ...... الأفضل في بلجيكا انك تاخذ لك سياره طبعا لأنه السواقه فيها سهله ... وعلى فكره بتلقى كتاب مثل المجله في الريسبشن في الفندق ... فيه كل الأماكن اللي تقدر تزورها في كل مدن بلجيكا .... وهذا بيفيدك في التجول .
وبعدين ترجع بالسياره اللي مأجرنها لين باريس ... طبعا تقدر تمر في طريقك على lille الفرنسيه .... المهم يوم بتوصل باريس سلمهم سيارتهم ...... وروح الى حبيبة قلبك اللاديفانس .... وأيلس في اللاديفانس كم تبى .... بس على شرط ما تطلع لين ما تكون خلاص فاج الوله منها ...
أنشالله يعجبك المخطط ..... لأني رسمته على حسب ميولك وأهتماماتك اللي عرفتها من ردودك ...

والله مخطط وايد حلو ..
بس الخط وايد صغير .. ويعور العين لول
بس مستحيل أقعد أكثر من 20 يوم .. وايد أوله على هلي في الدوحة .. ما أحب الغربه .. حتى لوكانت سياحة
هذا العيب الي فيني
تحياتي أختي ( الأخت سفريات ) ..

أنزين شو رايك
برشلونه ( 5 ليالي)
مدريد ( 4 ليالي)
بروكسل ( 5 ليالي)
باريس ( 6 ليالي)
كلها 20 ليله .....

احم احم انا عندي اقتراح انك تروح اسبانيا وتنقل فيها
بدال البهدلة مع الياهل من بلد لي بلد وفرنسا وبلجيكا
اعتقد انك رحتها فليش ماتغير هالمرة .

هلا بالغالية غموض الغد . شلونج أن شاء الله تمام
والله أنا خاطري أروح أسبانيا .. لكن فرنسا معارفي فيها أكثر .. يعني لو صار شئ ولا شئ .. لاقدر الله أقدر أتصرف .. لكن في أسبانيا .. ماعرف حد .. وخاطري اروح لها ..
أعتقد أن كفة فرنسا وزيارة الجنوب الفرنسي والشرق الفرنسي هي الأرجح .. ولا أيش رايكم ؟؟

اذا فرنسا بتخليك مطمن من ناحية بنتك الاموره
فخلاص اهم شي الراحة النفسيه وفرنسا خصوصا خارج باريس فيها اماكن تحفة
وان شالله تنبسط فيها بس نصيحة لاتنقل وايد خلها ثلاث او اربع مناطق بالكثير.

هلا اختي غموض
والله كلامج صحيح
لكن أنا حاط أكثر من منطقة في عيني مثل كان ونيس وستراسبورغ وأنسي ودام وصلت انسي لازم امر على جنيف وضاوحيهاوباريس بالإضافة إلى لندن الي العالم كلها زاروها إلا أنا مازرتها ..
.. بس أهم شئ أني أجر لي سيارة .. وهذا الموضوع حاطه في باريس ان شاء الله ..