مرحبا للموجودين واعضاء بوابة مصر.. اولا بصراحة انا اول مرة بنشر موضوع في بوابة مصر لاني من اعضاء بوابة سويسرا لكن لي بعض المشاركات في بوابة مصر.. ثاني شي اللي بكتبه لكم مو تقرير انا بقص عليكم قصة حياتي في القاهرة اللي كانت فعلا من اروع ايام حياتي.. سنة 2000 كانت اول زيارة لي في القاهرة مدة الرحلة كانت اسبوعين طبعا اول ما وصلت المطار تحطمت نفسيا من مطار القاهرة قلت حق اختي يا سلام هذي بدايتها شكلة الوضع بالخارج زي هنا كله منج ضاعت العطلة علينا, وبعد ختم الجوازات ورفع المعنويات من الموظفين بالمطار (دنتي ملكة يا لهوي اي ده ربنا يحميكوا ربنا يحفظكم) خذينا كلام يجنن... المهم جانا سواقنا حمدي اللي مستحيل ننساه بيوم من الايام وانا متأكدة ان الكل يعرفه المهم طلعنا للفندق وبطريج اختي اتحلطم احنا شجايبنا شنو هالمناظر ماكو ولا عمارة جديدة يالله توهقنا المهم وصلنا الفندق (السميراميس) رحنا بنسوي الشيك ان والاحداث الحلوة واللحظات الحلوة بلشت معانا شيك ان اول شي شفنا الفنان عبدالله رويشد وعقبها اعلان حق حفلة للفنانة نوال الكويتية وعقبها شفت خالد سليم قنا يالله على الفندق العسل هذا شكلة ستيديو مهو بفندق غير ان سكان الفندق كله خليجيين... صعدنا الغرف اللي كان مستواها بذاك الوقت جدا عادي بس يالله على الموقع الخيال شي ولا الحلام النيل المسبح الهيصة الاغاني الحناتير والناس والزيطة هذا هو ذوقي هذا الجو اللي يشرح القلب المهم مابي اطول الموضوع لان لو اقعد العمر كله ما راح اخلص كتابة.. القاهرة كانت اروع مكان ازوره بحياتي والله وبدون مهايط سافرت حتى اليابان ماكو مكان مارحتله بالعالم نفس القاهرة ماكو ..
المهم من اول يوم لنا في الفندق تأكدنا ان الديرة هذي عذاب رحنا بشكل مختصر وايد اماكن, وقتها ما كان فيه سيتي ستارز ، زرنا الاهرامات, الحسين طبعا كل يوم ,, بواخر الباشا السرايا البلو نايل ’فرايديز, كشري طارق وكشري التحرير , شارع الجامعة, ملحق الهلتون, وسط البلد , وزرنا متحف فيه مومياء محنطين اف متنا رعب, وزرنا ملاهي وايد حلوة اسمها دريم لاند اعتقد , وحركات حمدي السواق ودانا حق فرح شعبي لكن مستحيل مانزلنا الوضع تحفة ,غير مراكب النيل واللنشات والكرتات والهيصة آآآآآآآآآآآآآآه المهم ماقدرنا نزور اماكن كثيرة لان الوقت كان قصير 14 يوم فقط وكانوا من احلى ايام حياتي عشت لحظات لايمكن انها ترجع من حلاتها كان كل ما يقرب وقت رجعتنا نكتئب ونبكي لي درجة ان وقت رجعتنا والله انا وخواتي قعدنا نبكي والسواق يبكي معانا ... وعقب هذي السفرة ولمدة 5 سنوات كل ما يجي الصيف على طول نحجز للقاهرة واكتشفت ان الموضوع صار ادمان خصوصا بعد افتتاح سيتي ستارز وعقب ال 5 سنوات يعني من 2005 الى هذي السنه مازرت القاهرة والله ان قلبي متعذب على شوفتها بس شسوي الكل ودة يغير واللي انشغل بحياته واللي مل واللي ..... وانا صرت ضحية الموضوع لكن معزمة ان شاء الله على العيد بروح وناطرة العيد على نار بس ادعولي ان الموضوع يمشي معاي واقنع اهلي بالسفر للقاهرة ... واللي حاليا بمصر اجيبلي مية نيل اشربها عشان ارجع لها .... وسوري طولت عليكم بس كنت حابه اقصلكم مختصر قصتي مع القاهرة حبي الاول والاخير .. وسلامتكم