السلام عليكم ورحمة الله وبركاته
إخواني اللي رايحين تايلاند ~
ابصراحه صار لي شهرين هنيه ببانكوك وأكثر شيء كرهته عندهم هو تكاسيهم ~
معاناه لاحد لها ~
كل ماأبي أروح للسوق أو للسوبر ماركت أدعي من الله أنه يكون صاحب التكسي خير ~
لأني تلعوزت معاهم وايد كل مايشوفون خليجين يرفضون يفتحون لنا المتر ويطلبون للتوصيله من 300 إلى 400 بات مع العلم أن التوصيله للمكان اللي أبيه ماتكلف أكثر من 70 بات !!
وإن قلت لهم شغلوا المتر وله ماراح أركب يطنشوني وينزلوني من بعد مسافه من أركب كنوع من الاستغلال ~
يعني أول ماأركب أقولهم شغلوا المتر مايطيعون ولما أصر على أنه يشغلونه يكونون ساقوا السياره فهنيه يخيرني بين أدفع له المبلغ اللي يبيه أو ينزلني وسط الشارع ~
وطبعا أنا أكره شيء اسمه الاستغلال فأقوله نزلني وألف غيرك موجود ~
طبعا من العشر تلقى واحد فيهم يشغل المتر ~
وطبعا دائما أقول السبب في طمعهم هم العرب أنفسهم ~ نحن من بدأ العطف والطيبه نقول وحليلهم شو يعني 100 بات تراهم إلا عشر دراهم خله ياخذهم كلهم مع أن سعر التوصيله يمكن ماتوصل 60 بات ~
بس طمعهم وصل حده من غير أنه بعضهم نحيس حتى في المعاملة ~
بصراحه كرهت الركوب بالتكاسي وباقي لي هنيه شهر ~
ماعرف شو أسوي ..
نسيت أقولكم أنه في بعضهم بعد يتلاعب بالمتر ~
يعني مره كنا رادين الفندق وبالعادة ندفع 75 بات كل مره نرجع من هذا المركز لفندقنا ماندفع أزيد من 75 بات
إلا هالمره دفعنا 157 بات !! يعني شيء مايدخل العقل ونفس الوقت ونفس الطريق ومافي أي زحمه ~
بس استغلال لنا نحن الخليجين اللي اتسببنا بهذا الشيء ~