وعليكم السلام ورحمة الله وبركاته ،،
حمد الله على السلامة وسمعت الكثير عن هذا الفندق
ننتظر تكملة الموضوع بكل شووق لأني على خير أنا والوالدة
راح نزور دبي على 20 نوفمبر وودنا بسويت أو شقة مانبغى غرفة وحدة
ولك كل الشكر والتقدير
أخوك / ماهر السعودية /

هلا فيك اخوي ماهر الله يحفظك . انا الحين الصور كلها انتهينت من رفعها وثواني وشوف الموضوع بإذن الله الفندق راح يعجبك وموقعه وايد حلو قريب جدن من الامارات مول . وخلف فندق سيتي ماكس المعروف ..

1. لقطتين حلوين عالسريع

كان الإقلاع الساعه 6:55 صباحا . يعني صلينا الفجر وعلطول رحنا المطار الحمدلله وصلنا مبجر وخلصنا كل الاجراءات وباقي ساعه على موعد الإقلاع ، فاكتشفنا أن في ردهة مطاعم صغيره جديده بالمطار ،, فيها مطعم تشيليز ومطعم ايطالي وكافيه ذا كوفي بيين وسينابوون ،, تريقنا من تشيليز ،،بصراحه ريوقهم كان وايد حلو وطلع حسابنا شخصين بالغين 5 د.ك

لقطتين حلوين عالسريع

قبل ماأتكلم عن الفندق بصراحه كانت سفرتي مقسمه على فندقين ، أول ليلتين بهالفندق ،، وآخر ليلتين بفندق جراند الامارات ،، ولايخفى عليكم جمال هذاك الفندق وموقعه بشارع الشيخ زايد ،، ومع أني كنت محصل عرض رخيص حيل من عرب لينك تخيلو كان سعر الليلة 425 درهم للشقة بغرفة نوم ،، بس سبحان الله مادري شاللي غير رأيي و خلاني أكنسل فندق الإمارات جراند وأمدد الحجز في كورب ،، ربما وجدت الراحه والهدوء في هالفندق المهم ،،
وصلنا الفندق تقريبا الساعه 10 وكلمت الريسبشن عشان نسوي جيك ان مبجر بس ماكان فيه مجال فاضطريت اني اقعد بالكافيه اللي عند اللوبي اسمه (( كافيين )) المكان حلو ومرتب ومريح جدن
الريسبشن كان فيه ناس وايد يسوون جيك اوت فماحبيت أصورهم . فأخذت الصورة بالليل مافيه أحد
طبعا وانا انطرهم يجهزون الغرفه قلت خل اخذ جولة حول الفندق من الخارج ،،واكثر شي عجبني بالفندق السوبر ماركت هذا مقابل الفندق مباشرة .
هذا السوبر ماركت فيه كل شي حتى حاجيات الأطفال من حفاظات وحليب وغيرها . يوصل لي باب غرفتك . وهذي شغلة وايد حلوة وخلتنا نرتاح ،، تبي أي شي دق على الرسبشن وأخذ رقم السوبر ماركت وقولهم رقم غرفتك وبس حتى لو طلبت بطل ماء فقط راح يجيبونه لك مطعم ايطالي جدام الفندق ،، بس ماجربته بصراحه وماعندي معلومات عنهقسم خاص للرجال وقسم خاص للنساء والصراحه أيضا مادخلت وماعندي فكره عن اسعارهمواحنا نمشي ونسولف فجأة أشوف وجه مرتي جذي
ههه شايفه صالون نساء
وهم ماجربته ولا عندي معلومه عنه
بريك وراجع لكم بإذن الله

بالنسبة للجدول كان ممتاز جدا بفضل الله ثم الأخوة بالمنتدى الله يعطيهم العافية،،
اليوم الأول
الامارات مول بكل مرافقه
اليوم الثاني
ابن بطوطة
سوق مدينة الجميرا
ممشى الجميرا
اليوم الثالث
دبي مول بكل مرافقه
اليوم الرابع
ميركاتو مول
شاطئ جميرا
اتلانتس
اليوم الخامس والأخير
المردف سيتي سنتر
ومباشرة إلى المطار
أكتفي بهذا القدر اليوم وأي سؤال انا حاضر ،، باجر أنزل صور الشقة بشكل متكامل بإذن الله ،، فديتكم

تقرير بطل
نستنى صور الغرف

وحيدة اهلها
مشكورة اختي وحياج الله انشاالله باجر راح تنزل الصور من داخل الغرف

حمد الله على سلامتك ابو سليمان استمر في التقرير المشوق وابيك تركزعلى الفندق لأني حاجز فيه يوم 26 اكتوبر لمدة 5 ايام وطلع علي ب 3200 تقريبا غرفتين وصالة وكيف الأثاث نظيف والنت متوفر ابي كل التفاصيل لاهنت *

ياهلا وغلا اخوي المحنك. الله يسلمك من كل شر.
الفندق جدن جميل ونظيف واثاثه جديد وراح تشوف هالشي بالصور اللي بحطهم بعد شوي بالموضوع
بالنسبه للانترنت نعن كله مجاني طبعا باللوبي وبالكافيه فيه انترنت وايرلس وسريع
أما بالنسبة للغرف مافي وايرلس ولكن في كيبل توصله على اللابتوب مجانا وأيضا سريع
الفندق ممتاز جدا لاتحاتي راح يعجبك بإذن الله
وأي سؤال اخر انا بالخدمة حتى لو ماحصلتني بالموضوع ارسل رساله خاصه واخدمك بعيوني فديتك

يعطيك العافية اخوي ابو سليمان وماتقصر بيض الله وجهك وفي انتظار التقرير