مرحبا
وحشتوني كلكم .. ووحشتني مغامراتكم
مثل ما استفدت منكم وساعدتوني في وايد اشيا لما رحت تايلاند
حبيت اشارككم مغامراتي في تايلند يمكن في اشيا تستفيدون منها
اول شي مشكورين كلكم على تقاريركم الحلوة ومساعداتكم
بصراحه مع اني رايحه اول مرة ومع زوجي.. وبروحنا بس حسيت ان انا مليون مرة ييت تايلند
وانشالله انزل لكم الصور عن قريب ..
اول شي كانت سفرتي تاريخ 13/10/2010 .. في الليل عن طريق مطار البحرين الدولي
الساعه 8:15 اتوقع..
وصلنا تايلند بتوقيتهم الصبح .. الساعه 6:20
مطار بانكوك روعة وايد عجبني ووايد حلو ومرتب وايد وايد
طبعا اول ماوصلت هناك.. كل الي هناك لابسين شورتات قصيرة !!
حسيت روحي شاذة بينهم مع اني كنت لابسة ثياب وشيلة ! خ
بس بعدين تعودت على الوضع عقب ساعتين ههه
كنا من البحرين اوردي حاجزين تذاكر من بانكوك لي شنغماي دايركت في تاريخ 14-10-2010
عن طريق طيران اسيا وطلعت علينا التذاكر 50 دينار
بما ان احنا اول مرة .. وماكان عندنا فيزا فاستخدمت فيزا رفيجتي عشان احجز كمبدئيا تاكيد لحجز بانكوك شنغماي
لان كنا نبي نروح شنغماي في نفس اليوم ومانبي نتوهق
فضمان لنا حجزنا من البحرين وعلى اساس يمكن يطلبون منا الفيزا هناك واحنا ماعندنا ومانتوهق
حجزنا بس حق شنغماي
لان رحلتنا كانت جذي.. بانكوك - شنغماي - بوكيت - بانكوك
والوقت عندنا قصير كان 9 ايام بس.. عشان جذي ماكنا نبي ايامنا تضيع.. لان ماعندنا اجازة بس كنا حابين نغير جو
لما وصلنا مطار بانكوك.. خلصنا الاجراءات ورحنا ستاند اسيا اير.. كان فيه مشين تسون منه جيك ان .. مايحتاي تروحون على الكاونتر.. كان سريع وحلو .. والاحلى ان مايبون فيزا ولا شي يتاكدون
فمرة ثانية الي يبي يحجز.. يحجز من دولته دايركت لانهم اساسا مايطلبون فيزا ولا شي( ولا حتى في الفنادق الي رحناها طلبو منا فيزا مع ان كنا حاجزين كل الفنادق بفيزا من البحرين)
كانت رحلتنا الساعه 12 الظهر حق شنغماي... وبما ان عندنا وقت
رحنا ندور تذاكر من شنغماي لي بوكت ومن بوكت لي بانكوك
تذكرة شنغماي - بوكت كانت وايد غالية فوق تصوراتنا!! كانت 110 دينار !!! طبعا حق شخصين
بس تذكرة بوكت بانكوك - حصلناها 40 دينار على طيران ون تو قو .. طبعا لشخصين بعد
الاحلى من هاي من البحرين كنا مقسمين الفلوس كلها من البداية ومصنفين كل واحد بروحه
فلوس التذاكر الداخلية بروحهم
فلوس الطلعات والمواصلات لكل منطقه بروحها
وفلوس السياحه والرحلات لكل منطقه بروحها
وفلوس الشوبنغ الي في بانكوك اهم شي بروحهم حق كل شخص ههه
وحتى الاكل بعد كنا مقسمينه
فأبدا ابدا ما صادنا نقص في الفلوس.. حتى مع ان تذاكر السفر مال شنغماي بوكيت كنا حاطين له 100 دينار احتياط
يعني كنا ماخذين احتياطاتنا ونقصنا 10 دينار حق تذكرة بوكيت.. خذيناها من مصروف الشوبنغ.. وبعد مانقصنا في الشوبنغ ورجعنا منهم.. وصرفناها بحريني.. وياحظنا كان مرتفع
.. ركبنا طيران اسيا باتجاه شنغماي ..
( شنغماي وما ادراك ما شنغماي .. للحين احن لها وابي ارجع واحلى مكان قعدت فيه بصراحه روعة احبها احبها احبها)
وصلنا شنغماي
وطبعا في المطار كلهم يبون يوصلونا ب 150 للشخص !
واخر شي طلعنا برا المطار .. ولقينا واحد وصلنا اثنينا ب 70 بات !!!!!
وصلنا الفندق وخلينا اغراضنا على طول.. و طلعنا واول ماطلعنا من الفندق طق مطر وايد
كان حلو حلو حلو.. وكنا ماخذين معانا امبريلا من البحرين كنا متوقعين يطق مطر لان طالعنا حتى الويذر عندهم شلون
ورحنا حجزنا عند وحده يم فندقنا( ماعرف شسمه كان وايد وايد صعب خ بس عند النايت بازار بالضبط بالضبط )
قعدنا نقاصص ( كلمة بحرينية ههه معناتها مادري شنو بس ان نحاول ننزل السعر) معاها وايد وطلعنا بشي حلو
خذنا الرحلة للشخص الواحد 700 بات ( هاللرحلة وايد استانست فيها ) كانت حق يوم (15-10-2010)
كانت عبارة عن .. حديقة الفراشات + ركوب الفيلة (كنت خايفه يطيح فينا الفيل ونطب في النهر)+ ركوب البامبو + غداء + الرافتنغ قوارب مطاطية (كان احلى شي)+ الشلالات روعه
عقبها افترينا في نفس اليوم وحجزنا حق فلايت اوف ذا جيبون flight of the gibbon ( شي مو طبيعي) حق تاريخ 16-10-2010
عبارة عن غابة كبيرةةةةةةةةة وكله اشجار وحركات .. حلو وايد.. (نفس طريقة الحصن ) الي يعرف الحصن بيعرف شنو اقصد
وتقدرون تكتبون في قوقل عنها وتجوفون لان لو شنو اوصف مابقدر.. وكانت الرحلة حق شخصين بسعر 3300 بات .. هاي اقل سعر حصلناه
على فكرة flight of the gibbon >> في مثلها بعد جانقل فلايت jugle flight >> هذي ارخص منها بس مو سيفتي ولا عالمية مثل فلايت اوف ذا جيبون..
تاريح 17 - كنا بنطلع بنروح بوكيت ( الي ماحبيتها وايد)
رحنا عن طريق اسيا اير.. كان الظهر..
اول مانزلنا مطار بوكيت .. استلمنا باص.. وقالنا بيوصلنا الشخص 150.. وهالباص النحيس !!
خلانا نندم ان ركبنا معاه ههه
اخر ناس وصلنا احنا !! ولا قبلها بعد ودانا مكتب سياحي.. عاد هالحركات مو علينا عبالهم اغبية
يقول لازم تنزلون يجيكون لكم .. @@ واصلا اهمه يبون يسوون لنا عروض حق السياحه يغرونا خ
انا اقولكم ابدا ابدا لا تاخذون منهم لان اسعارهم مرتفعه.. احنا قلنا لهم ان احنا حاجزين من المطار وخلصنا عشان نركب الباص بسرعه
وفي ناس معانا بعد كانو فاهمين السالفه وخلصو روحهم مثلنا فماتاخرنا وايد وايد في المحل
ووصلنا الفندق .. بوانمبوري... هالفندق الي بالغصب قدرت احفظ اسمه ههه
اهو الفندق حلو وايد...
بس فيه مبنى 1 و 2 .. واحد يديد وواحد قديم .. واحنا عطونا القديم وكلش ماعجبنا
اليديد يطل على المسبح وكان روعة .. القديم عادي اي احد من برا يدخله !!!
بس قلنا يلا معليه كلها يومين( واشوا مو اكثر)
لان ماعرف شلون تحملت بوكيت وبياخه بوكيت !!
سكننا في الباتونغ بيج( كله من ربع ريلي قالوله روح باتونغ !)
انا كنت ابي اروح كارون بيج.. قالوله كارون بيج مافيه شي لا تروح ولما مرينا عليه كان فيه كلشي .. بس يمكن قصدهم مراقص ومساجات مافيه!! خ الله يغربلهم
كل ماطلعنا من الفندق .. البنات مال المساج مقططين على الشارع !!.. مساج
وكل مايجوفوني يسون عمدا ! ماعرف ليش .. ولا بعد يقولون لي مساج .. تبون تسوون لي مثلا مساج وتاخذون ريلي تسوون له شنو؟ ولا بعد اهمه يستانس لين ينادونه ويتدلعون و انا اغار !!!
ويعه تشيلكم كل وحده مرفعه لي تنورتها الي يزعم كلهم نفس اللباس!! ويع ماحبيتهم الله ياخذهم