ابو حمدي
01-05-2022 - 09:36 pm
السلام عليكم ورحمة الله وبركاته
بدايةً أتقدم للمنتدى ولأعضائه على جميع ما يقدمونه لنا من معلومات سياحيه وكذالك تعليميه
واخوكم ابو حمدي يتمنى منكم مساعدته وارشاده وان شاء الله ما تقصرون معي
أود دراسة كورسات للغه الانجليزيه في ماليزيا وأتمنى من لديه معلومات أن لا يبخل علي بها
سأورد ما أُريد معرفته في عدة نقاط
أولاً : لا أُريد الدراسه في أوروبا أو أمريكا خاصة بعد الأحداث الأخيره وأرى أن ماليزيا بلد هاديء وبعيداً عن المشاكل .. فهل دراسة اللغه الانجليزيه في ماليزيا تغنيني عن السفر لهذه الدول ؟؟
ثانياً : مدة الدراسه التي أريدها ( ثلاثه أو أربعة أشهر ) فما هي المعاهد التي تنصحوني بالدراسه بها .. سمعت عن المعهد البريطاني وعن معهد ال els ولكن ليس لدي معلومات كافيه عنها ..
ثالثاً : كيفية السكن في ماليزيا ,, وهل بالإمكان السكن مع عائله تجيد اللغه الانجليزيه كما هو الحال في أمريكا ونيوزلندا وبريطانيا .. واذا كان يمكنني ذالك فكيف يتم التنسيق مع العائله ... عن طريق المعهد أو بالتنسيق مباشره مع العائله ؟؟
رابعاً : أسعار الدراسه والسكن مع العائله ؟؟
أتمنى أن أستفيد منكم ولكم جزيل الشكر مقدماً
أخوكم / ابو حمدي
حياك الله اخوي ابوحمدي وابشر باللي اعرفه يا اخوي .
كلامي ما يغني عن كلام الاخوة والحبايب بالمنتدى وخاصة اخوناالغالي ابو غدي
اللي انت موجه له الاسئلة .
1- في نظري اشوفها تغني ...طبعاً ما حتكون مثل كندا او بريطانيا
او نيوزلندا ولكن حتستفيد كثير ...وفوق هذه دولة اسلامية وآمنة
وناسها طيبين ورخيصة كمان ...الراحة النفسية عندي فوق كل شيء
اعيش وسط ناس يقدروني ويحترموني وانا ابادلهم نفس الشعور
صدقني بعدها حيكون طلبك للعلم متعة في حد ذاته .
2-3او4 اشهر يعني 3او4 مستويات ان كنت مجتهد وخلصت
كل دورة في وقتها المحدد ...صدقني في شهرين فقط حتحس بالفرق
فما بالك بأكثر من ذلك ...وانا عن نفسي درست في els مستواه
قوي يا اخوي وشهادته معتمدة ...واتمنى انك تختار فرع كوالالمبور
لانه عدد العرب اقل شوي فتضطر لاستخدام الانجليزية اكثر واكثر .
3-اما تسكن في فندق وانا اشوفها ضياع فلوس وكأنك تحرق
متعتك في طلب العلم ...انا اخذت في هوستيل روعة اسمه ملينيوم
كورت ...وعندك اخر بأسم غراند بارك ...ميزته انه معاك طلاب
جامعات وطلاب لغة عرب ...مثل الملينيوم اغلب الطلاب يدرسون
طب في جامعة ملايا وتلقى عرب من اهل المعهد والكليات الاهلية
اما بارك فأغلب الطلاب يدرسون فنون ...وتلقى من كل الجنسيات
وصراحة متعة ما بعدها متعة وتضطر لاستخدام الانجليزية للتعارف
فيما بينكم وبذلك تلقى التطبيق سهل بسكنك ...بالنسبة للسكن مع عائلة
يوقرون لك سكن مع عائلة صينية ولكن ما اتوقع للان طالب عربي
وافق يسكن مع عائلة صينية لان اهتمامهم بالنظافة جداً سيء
وتلقى بيوتهم وسخة وما تضمن اكلهم ...اما عائلة ملايو مسلمة
على يدك يا سيدي لو كان موجود الاسبوع الجاي ان شاء الله ان بماليزيا
والتنسيق مع العائلة الصينيه عن طريق المكتب اللي يخليك تزوره
اول لاجل ان ما عجبك البيت تختار خيار اخر .
بعض الشباب يستأجرون شقة لحالهم ...مثل اذكر اخ ساكن في شقة
مع 3 اشخاص 1صيني و1 تايلندي و1 الماني وكانوا يتقاسمون
الايجار لكن هذه بدري عليها اتوقع متى تكون هناك صداقات حتبدأ تتحرك
مثل هالتحركات .
الدراسة بالشهر=1250 ريال .
السكن =غرفة مكيقة مشتركة400 ريال .
غرفة لحالك مكيفة 800 ريال شهرياً .
غرفة غير مكيفة مشتركة 200 ريال .
العائلة 600 شهرياً
المواصلات 100 شهرياً تكفي وكعابي ممكن .
الاكل 400 شهرياً تكفي .
ان بغيت تجلس فوق 3 شهور تحتاج لفيزا وتحتاج لتأمين
صحي وتفتح حساب عندهم .
ان كنت بغيت شهرين وكنت من اهل الخليج ما تحتاج تأشيرة ولا غيره
وتدخل كأنك سائح وهذا اللي سويته ...وتصير عندك حصانة سائح
ممكن ناس حيقولون يا عمي سيبك من ماليزيا تراها ما تصلح
ارد عليه قبل لا اعرف من هو اللي وده يسألني عطني يا عمي البديل
على يدك يا عمي ...انت شايف الدنيا كيف من حولنا ...حتى سنغافورة
صاروا ما يعطونا وجه ...احس اللي بقت ماليزيا ونيوزلندا نوعاً ما لانه
الشباب خبروني انهم مبسوطين هناك ...انا شهادتي مجروحة يا سيدي
اموت في شيء اسمه ماليزيا اخاف انه عاطفتي هي اللي تجرك لماليزيا
اعرف اخوان ما يعرفون الفرق بين J و G وصاروا اليوم يتكلمون الانجليزية
وبطلاقة ... اتذكر واحد من الشباب يقول على لغتهم OKLA
السر كله في LA يا سيدي يعني قصده مشي حالك ...اشوفها اكثر
من مشي حالك ...وان وصلت لدرجات عليا وقتها من نفسك حتبحث
عن دولة اخرى غير ماليزيا ...لكن هذه بعد سنتين ان شاء الله .
قابلت بالسكن شاب سعودي له قرابة السنتين ووصل لدرجة عالية باللغة
لدرجة اكتب خواطره وشعره بالانجليزي واخبرني انه ناوي يبحث عن
دولة اخرى يكون لغتها الام الانجليزية لاخذ الفائدة اكثر ...سألته وش بها
ماليزيا ...قال فيها تعلمت ولكن ودي اطور نفسي واحس اني حتوقف هنا
بماليزيا ...ومستواه اشوفه افضل من مدرس لغة انجليزية بمدرسة ثانوية .
كتبت لك NOVEL يا سيدي .لأني في يوم من الايام كنت مثلك
كالتائه ودي اسئل ذاك وذا ...واشعر بشعورك اخوي وابغاك تستفيد
لاقصى درجة عشان ربنا يبارك لنا كلنا والدنيا توسعنا كلنا ...بغيت
اي شيء تراني في الخدمة من الى ...وخلك جاد وعزيمتك قوية
وخل عنا اللعب ولا تسوي مثل بعض الشباب الله يهديهم يقلبونها
تماشي وبعدها يقولون ما استفدنا .
وترى بالمنتدى شباب كرام كانوا زملائي بالمعهد ...اتمنى انهم
يشاركونا بأرائهم وهم اهل خبرة وتجربة ...وان فزعتم لأخونا
تراه عشمنا فيكم ويجي منكم اكثر ياالكرام .
اسفين طولنا عليكم واسف اخوي ابو غدي اني دخلت على الخط لكن
انتم كرام وحنا ودنا ندلع عليكم
والسلام عليكم ورحمة الله وبركاته .