مسافرة متحمسة
30-03-2022 - 11:05 pm
السلام عليكم ورحمة الله وبركاته
حنا ان شاءالله راح نجي لهونغ كونغ في زياره قصيره لمده 4 ايام وقمت ادور واقرأ في البوابه والاخوان والاخوات ماقصروا بس عندي كم سؤال ياليت الي عنده خبر يعلمنا
اولا..لقيت في موقع اكتشف هونغ كونغ عن تور لمدة 4 ساعات (dolphin watch) شاهد الدلافين حوالينك وانت بالبوت ,,فيه احد جربها؟؟تنصحون فيها والا لا؟؟
وفيه تور ثاني (marine parks) وهو عباره عن رحله لاربع جزر محميه ويمكن للشخص ان يقوم بعده نشاطات منها السباحه والغوص وركوب الزوارق والغطس,,فالي جربها او سمع عنها تنصحون فيها والا لا؟؟
ثانيا ,,مطعم جمبو العائم اكلهم زين والا تكرم النعمه ما يسوى عنوته؟؟
ثالثا,,, الاوت لت حقهم وين موجود وكيف اسعاره واذا احد منكم عنده موقعه عشان اعرف الماركات الي موجوده فيه,,لاني دورته ومالقيته
رابعا.. جزيرة لانتاو مافيها الا هالبودا الكبير يعني؟؟اذا الدعوه كذا نستفيد من يومنا بشي ثاني والا فيها اشياء ثانيه حلوه
خامسا..وش اكبر واهم شوبينق مول عندهم؟؟langhamham place ؟؟او هاربور مول؟؟
ومتاسفه على الاسئله الطويله بس مثل ماقلت لكم الايام قليله وودي اعرف من الحين وش الي يستاهل العنوه والي مايستاهل,,وشاكره ومقدره لكل شخص مر على موضوعي وساعدني ولو بشي بسيط
وعليكم السلام ورحمة الله وبركاته
سفراً سعيداً وعوداً حميداً
وقتكم محدود جداً والخيارين حق الدلافين والجزر " بالنسبة للدلافين " هي تجربة جيدة لمن يحب الاطلاع اما الجزر وبما أن الشعب الخليجي محافظ قد لايستفيد من السباحة والغوص
ولكن هناك بديل للحجز على " سفينة تأخذك بجولة بحرية وتوقف في بعض الاماكن لمشاهدة بعض من الصناعة التقليدية التراثية والفللكور الصيني ويتخللها وجبتي غداء وعشاء حتى منتصف الليل
زيارة البيك ترام من منطقة هونق كونق ومشاهدة عجيبة وقت الغروب والمساء للجزيريتن هونق كونق وكولوون ... هناك مطل في جوء براد ومنعش " الله يعينكم على الطوابير " لاتخافون تسير بسرعة وانتظام
طريقة الذهاب " بدل التاكسي الغالي جداً " تذهبوا عند طرف جادة النجوم هناك عبارات تتحرك كل عشر دقائق ... يوجد مكائن للبالغ 2 دولار والاصغار 1دولار حسب عددكم يكرر الضغط على الزر بحسب العدد تحدد المكينة السعر تضعوها في فتحة النقود ترد الباقي وبطاقة تشبه النقود المعدنية .. تذهبوا للمسار هناك بوابة كل فرد يضع قطعته تفتح البوابة لكل فرد ... وعند الوصول للطرف من جزيرة هونق كونق لاتاخذوا تاكسي هناك باص دورين مكشوف " مكتوب عليه بيك ترام " اصعد وا في الجزء المكشوف للفرجة هو يوصلكم لنفس المنطقة ... والعودة بنفس الطريقة ... لوحة مكتوب عليها فكتوريا هاربر رخيصة جداً
وهناك جادة النجوم " كورنيش " الساعة الثامنة يبدأ عرض الليزر من الابراج المترامية على طرفي الجزيرتين
اليوم الثاني " الذهاب ل دزني لاند من الساعة الثانية عشر لبداية المساء " تستحق الزيارة سعر الدخول 300 دولار للبالغ وومخفضه للاطفال والمسنيين
طريقة الذهاب " التاكسي غالي جداً وتدفعون رسوم الطريق غير العداد " الانتقال عن طريق المترو ...
تنزلوا من محطة الشارع القريب لسكنكم " طريقة سهلة جداً هناك مشين " ماكنة " تضغط على وجهتك في الجهاز .. يحدد لك السعر " وخريطة كم محطة واسمائها . وسوف تبدلون المتروا ثلاث مرات " وأي محطة تنزلون منها " بعلامة برتقالية " هنا تخرج وتركب في المترو الاخر ... وهو يتوقف اثناء وقوف المترو الاخر في نفس الوقت ... متعة وأمن والتجربة جميلة وسعر التذكرة رخيص ربما 8 ريال ولكم الخيار
مطعم الجامبو عالمي " وهو مطل على البحر مباشرة خيارات الطعام البحري أفضل ... واطلبوا الاسماك مشوي أفضل " لانهم يستخدمون زيوت ودهون الخنزير في كل طبخهم " وبالهناء والشفاء
جميع الماركات التي تعرفينها ستجدينه " مع موديلات وماركات لا نعرفها في منطقتنا ولم نسمع بها
مع الموديلات الحديثة جداً بس بصراحة غالية جداً جداً " شريت عطر للمدام ب 3000 ريال شميته بغيت أنصرع " مدري من زين ريحته او غلاء ثمنه المهم شريته " من انتاج شركة سويسرية لم اسمع بها
جزيرة البوذا " لا تستحق الزيارة " بالنسبة لي لايهمنا الله لا إله إلا هو
langhamham place هذا السوق تحفة معمارية وخاصة السلالام المتحركة التي تدوخ من طولها يستحق المشاهدة فقط عباراة عن مقاهي الدور الاول والثاني السوق لم يعجبني فيه بعض الماركات ولكن حجمه صغير لكن زيارته للمشاهده رائعه وخاصة في مقهى ستار بوكس " أنا اعتبره مقر إجتماع الرومانسيين " الحبيبه عندي صور لم انزلها هنا للسوق
هاربر مول او ستي هاربر " أضخم سوق وتعدد الماركات وأنا ضعت فيه واصبحت لااقدر على المشي ستة ابراج ضخمة
مفتوحة على بعض .. والله اني مادري اي بوابة دخلت وكيف خرجت " ضرورة زيارته " هو في منطقة كولوون
هناك سوق أخر في هونق كونق ستانلي ماركت و ليدي ماركت يستحقون الزيارة
على العموم هونق كونق " غالية جداً وبعض الماركات موجودة عندنا وارخص بنصف القيمة من تجربة خاصة
الله يسهل سفركم ويسعدكم " وفي الخدمة "