1. دبي - الكويت


2. ( موقف ما ينسي ابدا ابدا ابدا )

كانت الرحلة على الخطوط الجويه الاماراتية
كانت الرحلة الكويت - دبي
دبي - هونج كونج
هونج كونج - دبي

دبي - الكويت

( موقف ما ينسي ابدا ابدا ابدا )

اول رحلة من الكويت لي دبي كانت ازعاج بصراحه ورانا هندي لي اليوم اتذكر ضحكته كان يسوولف مع شباب وازعجونا بصراحه ! ، وصلنا مطار دبي وقعدنا ترانزيت بالمطار ، كنا نتمشى انا وزوجتي بالمطار ونشوف من محل لي محل ، وقتلها الطياره متى تطير ؟ قالتلي الساعه الفلانيه قتلها بتوقيت الكويت ؟ قالتلي اي ! ، المهم قعدنا نتمشى وقربت الساعه على الطياره وقلنا نروح للبوابة ، رحنا البوابه ولا يقولون لنا اصلا البوابه مالتكم تغيرت وانتوا متأخرين يمكن الطياره طارت ( اتضح بأن زوجتي غلطانه اهي تطير بتوقيت دبي مو توقيت الكويت يعني احنا متأخرين ساعه )
انا بصراحه انصدمت ، ويصير فلم كوميدي تخيلوا شكلي وانا ماسك العربانه واركض واركض واركض واهي تركض معاي والناس تشوفنا احسهم يقولون شفيهم شلي لاحقهم :P وماشاء الله مطار دبي وايد كبير ولما ركضت المارثون بنجاح وطلعت روحي وصلت ولا البوايه ما فيها ولا احد وعرفت ان الطياره طارت عنا
بهالوقت عصبت بس مسكت اعصابي بصراحه قلت مابي اخرب السفره على زوجتي رحت وسألت قالولي تدفع 100 درهم وباجر الصبح فيه طياره ، قلتهم وجناطي اشلون بنبدل ملابسنا قالولنا لو تبون الجناط تنطرون 4 ساعات قلت لا ما نبي نتحمل يوم ، وقعدنا نفتر بدبي على فندق كل الفنادق Full الى ان حصلنا شقق فندقيه واخيرا بس وصلنا قعدنا نضحك على عمرنا وما سمعنا غير شخيرنا خ نمنا على طول . . .
تابعوني في باقي الرحلة

نكمل ويانا يا حلوين . . .
بعد ما قضينا يومنا في دبي الاكثر من روعه ، رحنا دبي مول وامارات مول والاوت ليت يعني عوضنا الطياره الي طارت منا ( غلطة المدام = لا تأمنون بالبنات يا شباب ههه لالا اتغشمر ههه
)
قعدنا الصبح ورحنا مبجر عشان لا تطير عنا الطياره بعد ههه دخلنا الطياره وارتاحت نفسيتي لاني بروح هونج كونج اخيرا
عصير البرتغال والبسكوت بالطياره يم يم
قعدنا نسولف ( او ) قعدت اسولف مع نفسي واشوف افلام لان زوجتي العزيزه نامت وخلتني وكنا محظوظين لان الكرسي الي يمنا فاضي فتقدرون تقولون اخذت راحتها بالنومه وخلتني انا سهران:P
وجبة سريعه لليوع القاتل
وبعد ساعات من الانتظار الي ما حبيته ..وصلنا هونج كونج .. الرحلة من دبي الى هونج كونج اخذت لها 7 ساعات .
وصلنا مطار هونج كونج ، والله بصراحه استغربت من الي يشغلون هناك ، اول شي نصهم ما يتكلمون انجليزي ( وهذي المشكله الي قابلتنا بسفرتنا ) ، وبعضهم احسهم يعرفون انجليزي بس ما يبون يتكلمون يعني تخيلوا معاملتنا بالاشاره
انا وزوجتي نشوف الناس وين تمشي ونمشي وراهم ههه ، وصلنا لختم الجواز وعبينا استمارة الدخول سألنا الموظف اول مره تسافرون لهونج كونج قلناله اي ، قالنا شنو السبب من الزياره ، خربطنا عليه وفهم انها سياحه ههه
ومرينا ... ونزلنا لتحت ولا نشوف ناس شكثرهم متيمعين عند شيء شكله نفس القطار واول ما فتح الكل قام يركض
احنا قلنا شسالفه ههه
هذي صورته واهو فاضي
طلع عشان يوصلنا من مكان لي مكان بالمطار والله تطور ! ، والضحك اول ما تحرك ولا زين ما طرنا من سرعته ههه
طلعنا منه ولا نشوف اللوحات نبي نعرف وين اماكن التكاسي ولا نشوف اللوحه اخيرا ! TAXI
وهني بده اللغز
، شفنا تكاسي لونها ازرق ! وتكاسي لونها اخضر ! وتكاسي لونها احمر ! ، مسوين كوكتيل
،
سألنا وحده واقفه ووريناها بطاقه الفندق وقالت لنا ركبو التكسي الاحمر ، ولا التكاسي على حسب المنطقه واحنا منطقتنا كولون
ترقبوا الجزء الياي

ما شاء الله رحلة مليانه مغامرات من أولها
المهم الحمد لله على السلامه و تعيش تحكي لآحفادك إن شاء الله
أرجو أن تقبلي مروري

kenken
نورتني يا غالي بمرورك ونورت صفحتي
تسلم

تقرير مضحك في البداية
بس شكله روعه
موفق في اكمال التقرير

تقريرمرة حلو من بدايته وخيرة التاخير تمشيتوا بدبي..
بانتظار باقي التقرير..

ههه
والله الحريم مشكلة.........بس مالنا غنا عنهم..............
موضوع شيق ومن المتابعين....
ممكن تفيدنا بنوع الكاميرا المستخدمة في التصوير.؟
ترا الصور وايد حلوة وواضحة!!!

1. وهذي كانت غرفتنا الحلوه

شكرا لكل الي ردوا على الموضوع
منوريني والله
نكمل وياكم التقرير
وصلنا للفندق من بعد ما اخذنا التكسي الاحمر الي يودي لمدينه كولون ، وشفنا سحر هونج كونج بالليل من الجمال والبنايات الطويله والبحر الي يسحر ووصلنا الى الفندق وكان فندقنا
الفندق وايد زين ونظيف وخدمته وايد زينه والغرفه مريحه اول ما وصلنا ما عطلونا بسرعه عطونا مفتاح الغرفه والي كان رقمها مميز بس يعطونها لاصحاب الزيارات الدائمه لهونج كونج احم احم >>> جذاب هذي اول زياره له لهونج كونج ههه

وهذي كانت غرفتنا الحلوه

وعقب ما وصلنا وحطينا اغراضنا وكل شي كان الوقت متأخر تقريبا الساعه 11 بتوقيت هونج كونج وقالت المدام تبي تتمشى في شوارع هونج كونج ، طبعا بالاول قتلها مو حلوه نتمشى بالليل وبين الشوارع بس اصرت وقلت يالله نتمشى ، نزلنا وكنت اشوف شيء غريب ، تكرمون كل واحد يمشي وياه جلب وكل جلب يخرع اكثر من الثاني ! ، وريحة شوارع هونج كونج مقرفه ! اكلهم غريب وريحته اغرب ! ، طبعا هناك الواحد ما تشجع ياكل غير ماكدونالدز وبيتزا هت غيره ماكو ، والمشكله اكلهم الي ريحته خايسه منتشر بكل هونج كونج لازم كل ما تمشي لك خطوتين تشم ريحته
وهذي صوره لشارع هونج كونج الي تمشينا فيه والي فيه بقالة 7 المنتشره بكل هونج كونج
قالت المدام انها شافت ماكدونالدز بالطريج وكنا ندوره ، وكل ما اسأل احد ما يتكلم انجليزي ! شعب كامل ما يتكلم انجليزي شي يحير ! ، وفيه موقف يضايق والله ، داخل بقاله 7 المدام حبت تسأل وحده صينيه عن ماكدونالدز بس حاجتها ولا الصينيه تخترع بطريقه هيستيريه وتبعد عنا ( لان المدام محجبه ) م اتوقع انهم ما يحبون المسلمين ، قلنا بلا مذلتهم نروح الفندق وناكل من مطعهم
وردينا الفندق وسكرنا علينا الباب وطلبنا من مطعم الفندق وكلينا ونمنا
والتقي وياكم باجر ان شاء الله برحلة الى ساحة نجونج بينج 360 والبوذا الضخم
تصبحون على خير

abu ali11
خ هلا ابو علي
التصوير كان بكاميرا المدام كانون نسيت موديلها اييبها لك باجر
حياك الله نورت