وعليكم السلام ورحمة الله وبركاته ...
مساك الله بالخير اخوي الفيصل
صراحة تراني اعزك واغليك وودي اخدمك بعيوني
لسوء الحظ جات اسئلتك صعبة اوي ولكن نخدمك ياغالي
باللي نقدر عليه وقالوا الجود من الموجود
صراحة ما جربت اي واحد منهم فأخاف افتي فيها .
ولكن جربت فندق اتوقع انه قريب من مستواهم واسعارهم
اللي هو هوليدي فيلا وكان ممتاز وسعره فيه .
ولكن مانردك خايب اخوي الغالي واخواني الكرام ترى
ماراح يقصروا وانت غالي علينا ودائماً معانا
واتذكر اخونا الغالي ابولميس مجرب مارينا وقال فيها رأيه .
اعطيك رابط للمنتجعين واخذ عنها فكرة عامة والاسعار ترى تلقاها
بنفس الصفحة وقت ما تنقر في راس الصفحة عند التسعيرة .
http://www.marimari.com/hotel/malaysia/glenmarie/rebak_langkawi/index.html
موفق اخوي الفيصل بأذن الله والله يجعل رحلتكم سعيدة وهنية
واعذرني على التقصير يا غالي وكان ودي اخدمك اكثر ولكن
العين بصيرة واليد قصيرة
ولك تحياتي وتقديري اخوي الفيصل والسلام عليكم

السلام عليكم
حبيب البي يالشعيبي
لاحد يسمعك تقول على اسئلتي صعبه
انت الواد المخلصاتي بتاع الحته دي .. ( صعبه ماتستصعبهاش )
مااقبل اعذار .. شغل موبايلك ووريني علاقاتك الملاويه
( تراني اتغشمر وياك )
صدقني ونا اخوك .. يكفيني تكرمك ومرورك لي
شاكر لك ومقدر ..
تحياتي لك
اخوك

اخوي الفيصل انا من اسبوعين رديت من ماليزيا وسكنت في Mutiara Burau Bay Hotel Langkawi وبصراحة الفندق كان وايد حلو على نظام الجزيرة الكبيرة ذات المناظر الخلابة والغرف نظام الاكواخ الصغيرة ولكنها لم تكن راقية جدا ولكن لا بأس بها والفطور كان جيد والاسعار ايضا مناسبة جدا وقريب جدا جدا من التلفريك وانا انصح به

السلام عليكم
اختي الغاليه .. محرقيه
يعطيك الف عافيه على مداخلتك وردك .. ذا من ذوقك
اذا مافيه كلفه وغثاثه مني .. طلب صغنون .. اد كدا
ممكن تعطيني اكثر تفاصيل عن الفندق ..
نظافة الفندق بصفه عامه ..
هل شاطئه حلو ..
بالنسبه للغرف .. هل هي غرف مقابله للشاطىء ومباشره على البحر او هي مطله عليه ؟؟
هل الفندق هادىء ويقدر الواحد يستمتع فيه ؟؟
هاتي كل التفاصيل ونا اخوك
بكلف عليك .. بس استحمليني
اشكرك مره ثانيه
وتحياتي
اخوك

اخوي الفيصل لاتوجد كلفة ابد كلنا اخوان واي مساعدة انا في الخدمة .. بالنسبة لنظافة الفندق فالحمدلله كان الفندق بشكل عام نظيف وشاطئه ايضا حلو تنتشر فيه الطاولات المظللة للجلوس والاستمتاع ويمكن استخدام الرياضات البحرية هناك مثل الجي سكي وغيرها ، اما بالنسبة للغرف فهي كما ذكرتها لك على شكل الاكواخ الصغيرة او الشاليهات منتشرة على انحاء متفرقة من الفندق ولكنها ليست مطلة مباشرة على البحر وانما تكون محاطة بالاشجار والطبيعة الخلابة ولكن الشاطئ قريب جدا جدا منها ، والفندق هادئ جدا ومناسب للاستجمام والراحة فهو كالجزيرة الصغيرة ذات المناظر الخلابة... واي سؤال آخر انا في الخدمة ولا تتردد ..اتمنى التوفيق لك
انظر صور للفندق في هذا الموقع http://www.marimari.com/hotel/malay..._bay/index.html

السلام عليكم
تحياتي اختي المحرقيه
شاكر وممتن لمساعدتك لي .. وذا من طيبتك وذوقك
معليش عندي اسفسار بخصوص .. الاكل
كيف فطورهم ..؟؟
واذا حاب الواحد يتغدى او يتعشى عندهم .. هل مطاعمهم طيبه ؟
وهل يوجد مطاعم قريبه بجنبهم .؟؟ وهل جربتيها ؟؟
وسؤال جدا مهم .. الاخوان ذكروا انه بلنكاوي فيه رحلات بحريه ( مانغروف ) هل جربتيه ؟؟
وهل كانت عن طريق الفندق او من مكان ثاني
شي ثاني جدا جدا جدا مهم ابي اصارحك فيه
( تراني ما انعطى وجه )
عارف اني غثيتك من كثرة الاسئله
اعذريني
اخوك

ولا يهمك اخوي الفيصل احنا اخوان وفي الخدمة دايما .. بالنسبة لفطورهم كان جيد ومتنوع ويتشابه مع فطور كل الفنادق اللي سكنتها في ماليزيا ، اما بالنسبة للغداء او العشاء عندهم فلم اجربه والمطعم القريب الذي عرفته بالقرب من الفندق هو كنتاكي وهو قريب جدا اما بالنسبة للمطاعم الاخرى فأخبرونا انه توجد مطاعم صينية ومطاعم اكلات بحرية بالقرب من الفندق ولكن لم نجربها..وبالنسبة للرحلات البحرية (المانجروف) فنعم ذهبنا لها واستمتعنا جدا جدا فيها وهي عبارة عن استئجار طراد (قارب) خاص لك لمدة 3 ساعات يذهب بك لمزارع السمك وتطعمهم بالطعام الخاص لهم ثم تذهب لمشاهدة كهفين الاول تشاهده من الخارج اما الثاني فتنزل له وتدخله ويكون مملي بالخفافيش وكل ذلك في البحر وتذهب ايضا لمشاهدة النسور واطعامها وكذلك القردة وتشاهد المحيط والمناظر الخلابة الرائعة وتكلفك 200 ريجنت وهذه الرحلة ذهبنا لها عن طريق التاكسي الذي قمنا بتأجيره طوال اليوم وهو الذي دلنا على هذا المكان فهذه الطريقة ارخص من الرحلات عن طريق الفنادق ..واي استفسار آخر انا في الخدمة

السلام عليكم
اختي المحرقيه
عاجز عن شكرك .. وممنونك على معلوماتك القيمه
يعطيك العافيه وتحياتي
اخوك

لا شكر على واجب اخوي الفيصل واتمنى اني ساعدتك واي استفسار آخر انا في الخدمة ولا تتردد