- اليوم الثالث
- اليوم الرابع...
- اليوم الخامس
- اليوم السابع :
أكتب كلماتي وانا خجلانه منكم فمن صفات الكرام رد الجميل بمثله
باختصار انا استفدت من منتداكم الرائع في سفرتي الاولى إلى ماليزيا ولولا الله ثم جهود الاعضاء في المنتدى لما عرفت اصرف اموري في السفر
وعدت من سفرتي ولم أشكركم ولم أكتب تقريرا ولو مبسطا عن الرحلة الان حان الوقت لأشكركم ووالله ان الكلمات لاتفي بحقكم لاكن لاأقول الا جزاكم الله كل خير وفرج لكم ويسر أموركم كما يسرتم اموري
وقبل ما أحدثكم عن احداث الرحلة احب اوضح لكم سبب تأخري في الكتابه لكم وهو انه اصابني عارض صحي اثناء السفر واستمر لايام بعده( آلام شديدة في الاقدام ) لا اراكم الله مكروها
ايضا تقريري على قدي مافي صور ( ما اعرف انزل صور)....................... بسم الله
كانت رحلتنا اخر شهر 7ميلادي تقريبا 22|7 وكانت رحلتنا على (طيران الخليج ) تقييم له لابأس يمشي الحال بس لو أفكر اسافر مرة ثاني ما اختاره زاحمه والكراس مو مريحة
رحلتنا من الرياض ثم ترانزيت في عمان تقريبا 3 ساعات المهم اقلعنا من عمان تقريبا الساعة 2ليلا ووصلنا يمكن الساعة 1أو 2 طهرا بتوقيت ماليزيا الحمدلله كانت الاجراءات بالمطار سهلة وعبينا كرت الدخول (بفضل الله ثم بفضلكم عرفنا ملا هذا الكرت كنت قد نسخت تقرير الماهري الله يوفقه)
كنا دايخين من الجوع ورحنا لبرغر كنج :36_11_15: واتغدينا بعدين شرينا بطاقة اتصال ثم اخذنا تاكسي والى الخيول الذهبية الاجراءات كانت ميسرة ما انتظرنا كثير .. صراحة الفندق عجبنا ان وزوجي هادئ ورايق بس المطعم مو شي ماعجبنا ........ المهم اول ما وصلنا ريحنا ونمناتقريبا ساعتين بعدينا رحنا نكتشف الفندق
اليوم الثاني
رحنا لمدينة الماينز (ماادري كتبت الاسم صح ) وتمشينا بالسوق ورحنا للملاهي المجاورة وشفنا عرض النوافير الموسيقية صراحة ابداع .
اليوم الثالث
لما صحينا فطرنا وبعدين جهزنا الشنط وسوينا تشيك اوت ومشينا للمطار الى لنكاوي ..
لما وصلنا لنكاوي أخذنا تاكسي للفندق كان شيراتون بيردانا ..استقبالهم حلو واخذنا غرفتنا بصراحة الغرفة كانت غاأأألية وكانت في الدور الاول مطلة على الحديقة صراحة تحطمت لما دخلت الغرفة اطلالاتها على الحديقة بشكل مباشر يعني ما اقدر اجلس فيها على راحتي لأن النا س والعاملين بالفندق يمرون من جنبنا وحنا جالسين .. اما الفطور ما عجبني وكان فيه ايضا العشا مجاني بس بعد الاكل يناسب الاجانب اكثر من العرب
المهم ............... ريحنا شوي بعدين اخذنا تاكسي وكان تقريبا على الساعة4عصرا يعني ما نلحق نروح أماكن بعيدة فاقترح علينا السواق مكان قريب للفندق وهو ميدان النسرو رحناقبل تغدينا بماكدونالدز
اخذنا صور في ميدان النسر واشترينا من الاكشاك اللي فيه بعدين رجعنا للفندق واتفقنا مع السواق يرتب لنا رحلة بحرية لليوم الثاني وكان اتفاقنا عند الساعة 9صباحا .
اليوم الرابع...
بعد الافطار كا ن السواق ينتظرنا على الموعد ورحنا لرحلة بحرية كانت حلوة سفنا فيها مزرعة الاسماك وكهف الخفافيش وكانت الرحلة تقريبا ساعتين .. كان السواق ينتظرنا كملنا اليوم معه فرحنا بعد الرحلة إلى شلالات ( وهنا بدأت الآلآم معي ) ... بعد الشلالات رحنا لعالم البحار..وبعدها حديقة التماسيح بعدين حسينا بالتعب اخذنا من ماكدونالدز ورجعنا للفندق وجهزنا الشنط ونمنا بعد يوم طويل وحافل.....
اليوم الخامس
بعد الافطار تمشينا على شاطئ الفندق ثم رحنا لمحطة الفيري وانطلقنا إلى بينانغ ............
كانت الرحلة تقريبا ساعتين ونص ولما وصلنا اخذنا تاكسي الى الفندق ( قولدن ساندس) القندق حلو الغرفة لاباس بها الفطور حلو شاطي الفندق حيوي ( جت سكي / براشوت / و) صراحة بينانغ عجبتني اكثر من لنكاوي رطوبتها أخف والحياة فيها أكثر ندمت لاني مازدت الايام فيها بس معليش الرحلة الاولى للاستكشاف
المهم بعد ما استلمنا الغرفة وريحنا شوي نزلنا للسوق الليلي وكان ملاصق للفندق تمشينا فيه واخذنا فكرة عن المكان بعدين تعشينا ورجعنا للفندق ونمنا ...
اليوم السادس
بعد الافطار اتفقنا مع سائق تاكسي يودينا لاهم الاماكن رحنا لمعبد يقول السواق انه للتايلانديين ثاني مقابل له للصينيين ( لما دخلتهم صراحة حمدت الله على نعمة الاسلام )
بعدين رحنا لمكان قريب منه وهو معرض للمنتوجات الفضية بعدها رحنا لحديقة للحيوان ماعجبتني ... بعدين رحنا للقطار الجبلي صراحة عجبنبي مرة ومنظر الجزيرة مع البحر من فوق الجبل كان خيالي
في هالوقت كنا محتارين كيف نروح لكوالالمبو هل بالسيارة ولا بالطيارة وسألنا عن الاسعار بالسيارة وعن الوقت فقالوا تقريبا 4ساعات فقلنا نسأل عن الطيران فودانا سواق التاكسي لمكتب الخطوط الماليزية والحمدلله تيسرت امورنا وحجزنا لكوالا بس الرحلة كانت بكرا والصبح مبكر 8صباحا
اليوم السابع :
رحنا لمطار بينانغ متجهين لكوالالمبور ولما وصلنا كوالا كان برنامجنا لجنتنج مباشرة فأخذنا تاكسي إلى جنتنج وصلنا لفندق فيرس توورلد وسوينا تشيك ان وكانت الغرفة سيئة جدا صغيرة وباب على الغرفة المجاورة واللي فيها أجانب أصواتهم عالية ومزعجة وفية مروحة للشفط كانت مزعجة اوه ماأبغى اتذكر ذيك الغرفة .. ريحنا في الغرفة بعدين نزلنا نستكشف المكان
اليوم الثامن
بعدالفطور اللي كان زحمة نزلنا وتمشينا بالسوق ورحنا تفرجنا على الالعاب وركبنا قطار يلف على المنطقة كلها يعني عموما جنتنج كانت ممتعة وسياحية بالدرجة الاولى لكن ضاعت فيه الكاميرا
اليوم الثامن طلعنا من جنتنج ورحنا كوالا وكان الفندق ( تايم سكوير )
لما وصلنا وسوينا شيك ان و كان سالفة الاستقبال بمبنى والغرفة بمبنى استلمنا الغرفة وريحنا شوي بعدين نزلنا نكتشف المكان كان الفندق فيه سوق و ملاهي ضخمة ...
المهم
جلسنا في كوالا يومين زرنا شارع العرب كان قريب للتايم سكوير ورحنا للسوق الصيني والبرجين التؤم
وهذي هي رحلتي باختصار
واحب اوضحلكم ان الرحلة كانت قصيرة لانها للستكشاف وكمان كنت تاركة طفلي 4 شهور عند امي لذلك ما طولنا ....
الشي الثاني لم استمتع ذاك الاستمتاع بسبب الآم رجلي الله لايعيدها كانت الام مبرحة الحمدلله على كل حال
وان شاء الله الرحلة القادمة تكون افضل
واكرر شكري لكم واقول :smile001: :smile125:
بس صراحه كانت رحلة شاقة ومضغوطة جدا عشان كذا كانت نتيجة متعبة