السلام عليكم ...
احييكم من مكة الطاهرة التي قد بدأت في استقبال ضيوف رب العزة والجلال بكل
شوق ومحبة وتقدير .....الله يعزك يا مكة .
قلت في نفسي اكتب لكم عن خطة رحلتي القادمة ان شاء الله ,لعل وعسى
ان اجد من يشجعني او يشاركني او تعجبه فكرتي ,واحب لأخيك ما تحب
لنفسك .
مدة رحلتي :70 يوم .
التكلفة :من 12 الى 15 الف ريال .(قحروطي ولا صاحب توفير)
الهدف :دراسة اللغة الانجليزية ومنها تمشية واكتشاف لأماكن جديدة
ومعرفة خير بأذن الله .
الشرح :
ان بأقولكم اللي ودي اسويه ..ودي احجز مكاني في معهد (els) من هنا
واعرف تاريخ بداية دراستهم لمستواي اللي غالبا يكون في بداية كل شهر
افرنجي..واحجز سكني من هنا اللي حيكون شقة خاصة في مجمع سكني نظيف
عليه حرس وبها مصلى وتوجد بها اغلب الخدمات (مجمع ملتمنيا السكني)
وحيكلفني السكن لمدة شهر في غرفة خاصة مكيقة بخط انترنت (680)ريال
ومعاها (100) لاجل الباص اللي يشيلك في الصباح وينزلك هدفك ..ومصاريف
المعيشة تختلف من شخص لأخر...عاد جيراننا اغلبهم طلاب و ناس في سنك
ومتعلمة يعني ممكن تكون علاقات الله يجعلها طيبة ...نداوم اسبوعيا من الاثنين
ليوم الجمعة...قبل صلاة الجمعة استئذن ولا عاد ارجع لهم الا يوم الاثنين
ان شاء الله ..اصلي الجمعة واشيل شنطثي الرياضية واوراقي المهمة واخلي
عفوشي الكبيرة في سكني واتجه لأي وجهة في ماليزيا ...كلنتان او ترنجانو او لانكاوي
او بورت ديكسون او ملاكا ...الخ المهم اخلي اليومين رحلة لا تنسى ....
وان كانت الوجهة بعيدة انسق قبلها من فترة واشتري التذاكر واحجز الفنادق.
يصير اسبوعيا 5 ايام دراسة ويومين تمشية .
ولا تشيل هم عفش ولا غيره لانك راكنه في سكنك الخاص .
وما تدري ممكن تكون صداقات في السكن ويعزمك في زواج او يعزمك
في ديرته ...شهرين بأذن الله على هذه الحال وتبقى لك عشرة ايام اتجه فيها
لأماكن سابقة عجبتك او لأماكن ما مداك تزورها .
صحيح تكاليف دراسة لشهرين في (els) يكلفك 4000 ريال .
يعني 4000 معهد و 2000 سكن و3000 تذكرة والبقية معيشة وتمشية
وانت لوحدك ما معاك احد .
بالله وش رايكم في الفكرة...عصارة تفكير لمدة 3 شهور .
وان احد عجبته الفكرة ووده يستزيد او يستفسر تراني خدام...وان احد عنده
اقتراح او انتقاد يا ليت والله قبل ما اتوهق
تسلموا والله ولكم جميعا كل تحية وتقدير والسلام عليكم .