ريان
يا عزال هلك فيك
قول حق اهلك يعطونك دواء كحه عشان ترقد بالطيارة ولا تغربلهم
ولا تنسى الحفاظات والحليب والسيرلاك
والعربة عشان يدزونك فيها
ام
والاحسن طيعني ولا تروح
وش حادك على طيران 7 ساعات
وحر
انا مجربة وديت ولدي الصغير يوم كان عمره شهرين ونص القاهرة ومعزمة اقعد شهر
قعدت اسبوعين ورجعت
ومن عقبها تبت
توبة أودي يهال صغار معاي

تبي نصيحتي ابو ريان لو تخلي ريان هالمره خصوصا ان عمره 10 سنوات توه صغيره ولا راح يفهم وينبسط
ان شاء الله اذا كبر توده انت و ام ريان
وخصوصا اول مره. روح وانبسط انت وام ريان بدون صجت بزران ولا تنسون تجيبون له هدايا واجد

والله يابو ريان انا مثلك عندى ولد عمره سنه وبخلييه عند جدته . لانه راح يتعبك فى السفر خصوصا بلد مثل ماليزيا يعتمد على التنقل الكثير بين المدن.... لكن أسمع نصيحتى وخله

خلك عاقل مثلي!!!!
أنا ولد المحتار وعمري ثنتين (سنتين)
يعني أكبر منك بيوم ....
ترا الثفر(السفر) لماليزيا مو مثل الثفر لغيرها
يبغا مثاوير وروحات وديات
احثن لك كون عند يديده
ابن المحتار

عين العقل يا ولد المحتار
شاطر

يا ريان حبيبي خليك زي ولد المحتار .....
تراه شاطر ....
أخي أبو ريان الله يخليلك ريان .....
لا يخطر على بالك تاخد ريان معاك راح تندم خاصة إنو صغير و ما يفهم راح يتعب و يتعبكم معاه ....

شكرا لكم على ثرعة الرد
لكن اهلي مايقدرون يخلوني عنداحد (ياحظي مهم)
لكني سمعت بابا يقول لماما حجزت لريان كرسي بلحالة(يعني بروحي اتبطح على كيفي)
وث رايكم يعني انارايح رايح اللة لايعوق بثر
بث لو ثمحتوا ابيكم تعطون اهلي كل انثايح عثان مايتعبون معي
يعني كيف انام وكيف اكل واثرب واذا سويتها
وهل اجد حليب مثل حليبي وحفايض مثل (بانبرس)
وهل تنثحون بابا يطعمني(اح) عن الافلوانزا وغيرها(انابثراحة تهمني صحتي)
واخيرا دولو امين(اللة يحفظ بابا وماما ويحفظكم اجمعين)

أنا استغرب من الاخوة اللي يسافرون وما يأخذون اولادهم معاهم كيف يستمتعوا بالرحلة من دون الاولاد حتى لو كان الطفل عمره يوم يعني حرام طفل عمرة سنة او سنتين او ثلاث ما يروح الاطفال تعبوا من الخادمات ومن الجدات ومن اهل الام واهل الاب يعني الطفل يفارق اهله في اغلب الاوقات يعني اذا الام مشغولة تودي الطفل عند جدته او معزومة او مرتبطة بمواعيد ( حتى السفر ما تأخذونهم حرام ) ويا ابو ريان توكل على الله وخذ ريان معاك وراح تلقى الرحلة حلوة كثير والله سوف يسهل امورك والنية هي فوق كل شئ وبعدين اهم شئ للاطفال هو دواء للحرارة وما غير ذلك من تجهيزات وامه فيها البركة راح ما تقصر ولا راح تنسى اي شئ .

السلام عليكم... انا انصحك يا بو ريان لا تخليه ترى الاطفال هم حلاوة السفره اسال مجرب... مهما تعبكم ترى راح يسليكم...وخاصة اذا كان اول مولود ماراح تقدر تصبر عن شوفته وتشتاق له.. اخذه معك وتوكل على الله ترى حنان الام والاب مو مثل غيرهم.