- سجلوني معكم!
- قلت انا ايه ترى خربت ... فلان معنا ... والله وننبسط
السلام عليكم
بصراحة من زود الوناسة قلت ابي اكتب موضوع عن سفرتنا ان شاء الله إلى المغرب
حنا مجموعة تتكون من 7 أشخاص (شلتنا أكبر ولكن ربي كتب لسبعة بس يروحون) ماعمرنا اجتمعنا بسفر ... نجتمع بكل محل وبكل شي الا السفر ... ماقد سافرنا سوا ...
الا استغفر الله مرة سافرنا حايل بالسيارة نحضر زواج واحد ونرجع بنفس اليوم (فاضيين)
المهم السالفة بدت مني انا وثنين معاي ... بدون أي مقدمات قال واحد: هاه المغرب العيد؟ هذا الكلام كان قبل أسبوعين تقريبا ..
التفتنا على بعض: هاه؟
انا قلت طيب والسيارة اللي بعدلها؟
الثاني قال طيب والسيارة اللي بشتريها؟
تدري؟ لاحقين ...
هاه وشلون؟
ابد نمشي كذا ونقعد الى كذا الا انت مداوم بعد العيد
والله شغلك مضبوط يبو
عاد انا من محاسن الصدف اني ماقد سافرت بحياتي ابد برا السعودية ... البحرين وبس
قلت انا والله وتغيرت الدنيا ... ابسافر ... ووين؟ المغرب ...
المهم ونشوف خوينا الرابع ... هاه يبو؟ معنا؟ وين؟
المغرب!!!!
هاه؟ قدام!!!
بعدها بأيام شافنا خامسنا طالعين من مكتب الحجز ... على وين النية ان شاء الله؟
المغرب!!!!!
قال وش جمعكم؟ قلت مدري ... تجمعنا!!!
طيب 5 دقايق وادق عليك ... والله ويسكر ... أي خمس دقايق؟ وربك دقيقتين الا هو متصل ...
هاه وش تبي؟
سجلوني معكم!
قلت انا ايه ترى خربت ... فلان معنا ... والله وننبسط
المهم مرت الايام تقل تمشي على بيض ... طيب وين نروح بالمغرب؟ من اقادير الى الرباط الى مادري وين ... وصلنا سوريا من كثر مانغير ... بس الحمدلله رجعنا مرة ثانية واستقرينا على مراكش ... شدينا العزم على مراكش
بعد هالايام جالس سادسنا معنا يقول ياعيال الذينا انتم ماقد تجمعتو الا بهالبران ... بتروحون المغرب؟
قلنا له يلا اخلص علينا ... مابقى الا اسبوع على السفرة
ويغمض عيونه الرجال (انا خفت) ... قال مشينا مكتب السفريات ... والله ويطق التذكرة ...
من جده هذا يبو؟
اي والله من جده
السابع درى بالسادس ... قال انتم ستة ماينفع عدد زوجي ... لازم فردي ... معكم!!
وسبحان الله تجمعنا
انا ادري ان مالكم بهالسالفة بس اني مبسوط
اول مرة اسافر وللمغرب .. يالله متى يجي بعد بكرا ...
سفرتنا ان شاء الله 8 أيام بنقضيها كلها في مراكش ان شاء الله
5أكتوبر صباحا بإذن الله حنا بمطار محمد الخامس
عاد مادري انا اسوي لكم تقرير ولا لا ... ابفكر وابشوف
امزح
يلا موعدنا ان شاء الله بمراكش
وتحياتي لكل المزعوطين
تبي السراحه والله قصه حلوه
والله يوفقكم يارب بالرحله
تصدق انا ماقد جيت المغرب مع اني درت الدول العربيه كلها وامريكا وبريطانيا حتى لاس فيقس جيته
ولكن مااجمل سوريا تصدق سنه كامله على وجهها جلست هونيكوالله يوفقكم بامغرب