السلآم عليكم ورحمة الله وبركاته
بعد طول انتظار وانقطاع عن النت لما يقارب عشرة أيام.. أخيراً ولله الحمد صار عندي نت.. وحبيت أشرككم معي في بعض مجريات رحلتي لبريطانيا..
طبعاً الرحلة كانت بتاريخ 3/3/2009
من مطار الملك فهد بالدمام..
أنا + أخوي + زوجته
الخطوط الجوية القطرية
موظف الحجز حق المكتب قالي الوزن المسموح 20 كيلوا للشخص داخل العفش و40 كيلوا شنط اليد.. ولما رحت المطار انصدمت
ان الواقع مو كذا وان شنط اليد بس سبع كيالوا.. طبعاً الوزن كان 62 كيلوا للعفش وشنطة اليد كانت 14 كيلوا.. فموظف الحجز رفض رفضاً باتاً وتبعاً لذلك قال حتى 2 كيلوا الزايدين
شيلوهم واضطريت ارجع شنطة مع أهلي البيت وكانت للأسف الشنطة الي فيها شنطي وجزمي (الله يعزكم)
بعد وداع حار ومؤلم مع الوالد والوالدة واخوتي الأعزاء دخلنا الصالة الداخلية نترقب الإعلان عن اقلاع الرحلة
هذي الطيارة صايرة من على جنب قاعدين يجهزوها بس مو باينة مرة
المهم.. ركبنا الطيارة وبعد وصولنا للدوحة غيرنا الطيارة وكانت جداً ممتلئة وورانا مجموعة اطفال مدري اسبان مدري ايطالين بس الزبدة فجروا راسي..
وصلنا مطار هيثروا الساعة خمس ونص مساءً.. اخوي وزوجته عدوا من على الكاونتر بسلام.. وأنا استوقفني الموظف وقالي هل معك تقرير طبي او اشعة..
وكنت ولله الحمد جايبة تقرير واشعة.. قلت ايه .. قال عطيني التقرير وليس الأشعة وعطيته وكتب كلام وعطاني ورقة وقال روحي العيادة.. ورحت العيادة انتظرت دوري وسلمتهم التقرير
حق الأشعة وطاخ طاخ ختموا كم ورقة وقالوا روحي اعبري من كاونتر رقم ستة
المهم خلصت وطلعنا اخذنا تكسي وعلى الفندق الي كنت حاجزة فيه من خلال موقع بوكنق
الفندق عادي جداً غرفه صغيرة.. عادية ويمكن أقل من عادية.. اللهم انه نظيف وقريب من السنتر ويقع في بادنقتون وهي المحطة الي قبل محطة ادجوار رود..
هذا عنوان الفندق:4Sussex Gardens, Hyde Park, Paddington
London, W2 1 TP
+442074020704
أخذت الغرفة السنقل ب 54 باوند والدبل 69 باوند
طبعاً شاملة الإفطار.. إفطارهم مايتغير يومياً نفس الشي
الفندق خطوتين منه في مطعم هندي لذيذ وجنبه بعد مطعم شاورما لذيذ وبطاطسهم ألذ والإثنين حلال
هذا الشارع المقابل للفندق
وهذا خطوتين من الفندق
أول يوم ريحنا لأن ماخلصنا من المطار الا سبع وشوي وبما اني عندي غرض في الملحقية الثقافية فكان يوم ثاني الصبح
موعدنا معهم عن طريق الأندرقراوند
اذا نزلنا من الفندق خطوتين وبنلقى محطة الأندرقراوند.. ناخذ تكت سنترال.. نطلع على الدستركت لاين ونوصل محطة "إيرلس كورت" وننزل
نبدل القطار وناخذ القطار المسمى ب ريشموند.. نركب فيه وااذا وصلنا محطة جونرسبري ننزل وطبعاً هذي المحطة القريبة من الملحقية
خفت اصور من قريب ويمسكوني
طلعت من الملحقية ورحت يسار ورجعت لتقاطع المحطة وقطعت الشارع وأنا بالجهة المقابلة امشي
اشوي والمحطة والملحقية راح يكونوا وراي طبعاً مشيت كذا مسافة ربع ساعة الى عشر دقايق.. ولقيت
بنك HSBC دخلت وفتحت حساب وخلصت اموري ورجعنا الفندق نريح بعد المشي الي مشيناه
الف شكر يا اختي على التقرير
بخصوص حساب البنك اطلبي منهم يفتحون حساب امانه
كذلك أطلبي منهم يفعلون خدمة الانترنت ،، انا فعلتها وتقدرين تدخلين على حسابك عن طريق موقع البنك
فيه خدمات حلوة يعني مثلا ً تشوفين كم في حسابك و أعتقد إذا تبغين تحولين من حسابك لحساب ثاني
وممكن فيه غيرها من الخدمات
مع خالص أحترامي ،،