عسى الله يحيينا وإياك على طاعته
وجعلك ما تموت بالسفر
شئ راجع لك أكيد.. بس سفرك لوحدك يبيلك تراجع فيها التفكير
لأسباب كثيرة: يهمني منها الوناسة والإستمتاع ولا قدر الله لو إحتجت مسااعدة
وبما أنكم عزّاب فأتوقع من تجربة 9-12 يوم مناسبة
لأن حسب تجربتي في أماكن كثيرة مناسبة لزوجين أو عائلة
مو معنات كلامي ما فيه شئ يصلح للعزاب..
أنا رايح مع خويي وفليناها آخر فلّه..
الله يسعده أسعدني كثير في هالسفرة..
وبالنسبة للملاهي فأحسنها اللي في قنتنق مناسبة جدا وحلوة وجميلة
لكن الله يفكك من الزحمه
وللمكاتب إسأل وقارن بعد أن تخطط..
أتمنى منك تزور هالرابط..
https://artravelers.com
ورحلة موفقه وهنيئه بإذن الله

مشكور اخوي (الجمال) وهذا مو غريب على اهل الرياض (ههه) لكن بالنسبة لملاهي قنتنق وين في اي مدينة وين مكانها وبالنسبة للمده ماتحس انها شويه ( لاتنس ان الطياره 9 ساعات ) وياخي ضيقت صدري في مسألة انك تقول انها للعوائل احسن بكثير انا كمان سمعت اكثر من واحد يقول ان ماليزيا حقت عوائل ؟؟؟ مافهمت يعني الاماكن الموجوده في ماليزيا للعوائل فقط ممنوع دخول العزاب ولا كيف ؟؟؟ اشرحلي اكثر الله يخليك وبالنسبة لخطوط الطيران وش رايك ؟ وميزانية الصرف ؟ اما عن اني ابسافر لوحدي فهذي عادتي حتى مااسافر مع اهلي لاني احب الوحده ( مو على كل حال عاد) بس توني مخلص من ( السمر كورس ) وحبيت اروح لها ( واذا فيه وجهه ثانيه تنصحني فيها مو مشكله بس ماتكون عربيه ) والله يخليك مره ثانية ( وبالنسبة لنكي الموجود : اموت بالسفر يعني احب السفر من مات يموتو فهو فرحانو ) ههه

هلا باموت بالسفر
ماليزيا يكفيها 12 يوم
السكن تقريبا في فنادق خمس نجوم حوالي 100دولار لليلة شاملة الافطار تزيد او تنقص قليلا
ماليزيا تصلح للعزاب وتصلح للعوائل ولا يوجد بها محلات للعوائل فجميعها للجميع
في كوالا مدينة العاب مائية وكهربائية حلوة انصحك بزيارتها تذكرة دخول جميع الالعاب 39رنجت (39ريال)
وكذلك ملاهي جنتنق والتي تبعد عن كوالا حوالي ساعة بالسيارة وفي جنتنق تلفريك تذكرة الركوب 4رنجت
تحتاج الى اللغة الانجليزية حتى ولو القليل منها
لا اعلم عن الخطوط الجوية فانا من محبي الخطوط السعودية

انا نسقت رحلتي عن طريق مكتب العميقان على طريق الملك فهد شمال الجوازات
من الممكن ان تكلفك الرحلة 6000ريال شاملة التذاكر والتنقل والسكن والمأكل ودخول الملاهي

أما إسمك فمعناه معروف بس( أتغشمر) وإياك..
وبالنسبة للأماكن أنا قلت لك ما أقصد إن ما فيه أماكن للعزاب
كل الأماكن تصلح للشباب ، واللي أقصده فيه أماكن مافيها إستمتاع بدرجه كبيرة
إلا لما يكون معك زوجه(أماكن رومانسية)
أو يكون معك أطفال يتونسون بالمكان(حديقة الفراشات)
أما حنّا يالعزاب فحدنا حديقة التماسيح عشان التماسيح على أشكالها تقع..
أخوي الغالي.. بالنسبة للمدة أنا جلست هناك 10 أيام صافية ما خليت شئ قريت عنه وأعجبني إلا رحت له..
وإن كان الميزانية عندك مرنة فرح للأماكن الرئيسية حتى ولو ما كان فيها ما يشدك يكفي إنك بتصير مستكشف لها وبتونسك..
عندك العاصمة كوالا وعند بينانغ وعندك لنكاوي ولا يفوتك فيها الجولة بالقارب و سباق السيارات وأيضا قمة جنتنق
وإذا عن خطوط الطيران... أحسن شئ نشخص فيه حنّا السعوديين ونرز روسنا هي الخطوط السعودية.. طبعا الرحلات الدولية وليس الداخلية.. وبالنسبة للدوليه إسأل مجرب.. روعة السعودية
والميزانية يا غالي ما أدري وش بتسقر عليه من أماكن وأيام لكنها في حدود 8000 شامله سكن وتذكرة وتنقلات ووجبات ورسوم تذاكر ما عدا التسوق ما أظمن لك يدخل فيها..
إنت بس تصفح المواضيع وضبط برنامجك ووافنا فيه وكل واحد منّا أكيد بيعطيك رايه..
وبتكون رحلة ما فيه أزين منها..
سلاماتي

مشكور اخوي (سكوربيون ) ياخي ياصعب نكك غيره عقدني (ههه) وانت يالملح كله اقصد الجمال اشكركم من اعماق قلبي (بسم الله علي) ;) وان شاء الله راح اقولكم عن قريب وين حجزت وكمان وين ابروح وعلى اي خطوط وعاد تعطوني رأيكم ان شاء الله ... بس حبيت اسألكم ( تراني ثقلت عليكم ) تعرفون عاد انا طالب وطفشان ماخذ صيفي تكفون عاد (ارحموني) ههه بالنسبه للجو في اخر اغسطس واول سبتمبر كيف ( حر برد مطر رعد برق صواعق ...) بسم الله علينا ...