عليكم السلام ورحمة الله
لانشى و شيشنى هذه مدينتين فيها مصانع كثيره للملابس كما ذكرلي
واذا عزمتي باذن الله راح نوفر لك المعلومات اللازمه
وربي يوفقك

مرحبا لمار
افضل مدينتين للملابس هي لانشي وشيشني وافضلهم لانشي لانهم يصدرون لاوربا ويعتمدون على المواصفات الاوربيه والايزو لصناعه الملابس .
نصيحه من صميم تخصصي في مجال الملابس :-
اذا كنت مبتدأ ممكن تشتري ملابس استوكات الغير مضروبه تطلع عليك القطعه اقل من 2 دولار لكن اذا تشتري اكثر من 2000 قطعه راح يطلع عليك الاجمالي من 700 الى 1000 دولار تقريبا والسبب الكميه كل ما زاده قل السعر
اعرف دائما اذا كنت تبي تبتكر لتصميم ملابس على ذوقك لهم شروط
1- ما نوع الخامه
2- ما هي الجوده
3- الكميه وهذي جدا مهمه ( كل ما زاد العدد قل السعر )
4- 5000 قطعه واكثر للموديل الواحد
اخوي لمار
اذا كانت كميتك اقل من 5000 قطعه انصحك بالتعامل مع محلات الجمله
اما اذا كانت اكثر انصحك بالمصانع ( اذا ما تبتكر الموديل اما اذا ابتكرت فلهم شروط السابقه )
واذا تبيني مصانع تتكلم معاهم اعطيك تيلفوناتهم وتباشرهم بنفسك احسن لك تاخذ الزبده منهم
والله يوفقك

اباجوري
الف شكر لك اخي الكريم
اعرفك ماتقصر انا حاليا باتعامل مع محلات جمله بس نفسي اصمم شئ بنفسي في كم فكره في راسي ابغى انفذها ههه
ولو عندك معلومات انا في الانتظار وشكرا مره اخرى

salsabil
الف شكر للاهتمامك وردك اخي الكريم
انا حاليا باتعامل مع محلات جمله لكن صادفتني بعض المشاكل اولها المقاسات !! اللارج في الصين مايجي مقاس بنت تلبس سمول احيانا ههه
والشئ الثاني اختلاف الفصول انا من سكان جده وابيع فيها يعني مانعرف شئ اسمه برد او فصل شتاء ! واحتاج ملابس صيفيه طول السنه !
بالنسبه لعدد القطع انا صراحه لسا في البداية وافكر اكبر المشروع والاعداد صراحه موعارفه احددها الى الان اقصد الكميات !
احب اسال
كم الفتره الي ياخذها المصنع في التصنيع ؟؟ مثلا 100 او 200 قطعه مايقبلوا ؟؟؟
وفين المدينتين دي ؟؟ بعيديين عن كوانزو ؟؟؟ كم ساعه ؟؟ بالسيارة ولا طياره ؟؟
معليش كثرت الاسئله بس اعذرني انا من اول نفسي اعرف احد يتاجر في ملابس من هناك عشان اهريه اسئله ههه
اختك لمار

1. مرحبا اختي لمار


2. 4- مشي يكون عمرك 51 سنه على ما توصلين لها

مرحبا اختي لمار

بالنسبه للمقاسات تطلبين المقاسات الاوربيه وتقدرين تقولين تصدير ( للشرق الاوسط ) وهم عارفين الشي من تقولين الشرق الاوسط يتذكرون الكينيين واحجامهم مع انهم مو من الشرق الاوسط لكن نفس الاجسام .
اما بالنسبه انك تحتاجين ملابس صيفيه طوال السنه هذا من حسن حظك ( ادري تقولين شلون - طولي بالك ) اذا كنتي متابعه ومهتمه في الملابس لازم تتابعين دور الازياء ونفس ما تعرفين في الشتاء يعرضون ملابس الربيع والصيف وبالطريقه هذي تسبقين العالم بعرض موديلاتهم في عز الشتاء عندكم ( ايوه ياجده سابقه العالم بسنه مثل نيويورك سابقه العالم بعشرين سنه والسبب لمار ماعلينا ) واخذي من الماركات وانسخي عليهم لكن من الافضل تحطين اسم مستعار بدل اسم الماركات ، اخذي من الماركات الالوان الجديده والموديلات الحلوه لكن فكري صح شنو اللي راح يضرب بالسوق من الماركات وخاصه الالوان مثلك عارفه (كونك بنت ) وشلون كل سنه لون معين وستايل ملابس معين والوان ماركه معينه وتقدرين تحطين اسم مستعار لك مثلا ( لمار ) ( وصارت ماركه باسمك منو قدها ) .
اما بالنسبه لعدد القطع ومو عارفه كم تخددين ( مالي خلق ارجع واعدل الكلمه افهميها معناها تحددين )
من الافضل والمهم جدا ان تدرسين السوق الخاص فيك واهم شي الزبائن وقدرتهم على الشراء وكم ربحك الصافي بيكون من القطعه بعد خصم الايجارات والرواتب ولازم تعرفين الالوان المفضله لدى الزبائن ( وليس لديك) واحجام الملابس اللي عليها طلب ( انا اقولك الخليج كله مقاس caw size ) وهذي راح تعانين منها .
اما بالنسبه انك تطلبين من المصنع 100 او 200 قطعه راح يطلبولك شاي اخضر او ماي حار ( عاده عندهم يشربون ماي حار ) ويخلونك تشوفين بالكتلوجات من الموديلات على ما يجي تاكسي ويودونك الفندق والتاكسي على حساب المصنع لا تخافين ويقولولك لا تجين مره ثانيه ههه امزح معك لا تزعلين
اما بالنسبه لسؤالك عن لانشي وشيشني هما في مقاطعه زودجان ( ادري ما مره عليك لكن اقولك انها بالصين ههه ) ويسمونها الصينيين جنه الارض وعلى فكره هي اغنى مقاطعه في الصين وجدا جميله
وبالنسبه للبعد عن غوانغ زو فهيا تبعد :
1- بالطياره ساعتين تقريبا
2- بالباص 18 ساعه ما جربتها ولا راح اجربها لكن هذا اللي سمعته
3- بالقطار 24 ساعه ( وانصحك بالقطار ) عشان ما تروحين مره ثانيه لها وتصيرين سيده اعمال وتنافسينا ههه

4- مشي يكون عمرك 51 سنه على ما توصلين لها

اخيرا انصحك بالاستمرار والتجربه ولا تخافين من الخساره ما في تاجر الا وخسر ( شرايك مثل توني طلعته ) وبامكاني ان شاء الله اقدر اساعدك باللي اقدر عليه من النصايح ( على باله كريستن ديور ) ومن معارفي في الصين اذا احتجتيهم .
سلسبيل

salsabil
اهلا مره ثانيه اولا احب اشكر الرد الي من جد فتح عيني على حاجات كثير
انا بصراحه سالت قريب لي تاجر ملابس من زمان ونصحني نفس نصيحتك اني ازور ايطاليا وفرنسا قبل عشان اشوف اخر خطوط الموضه واصنعها في الصين !
بالنسبه للاعداد اعرف ان 100 او 200 يعتبر قليل في الصين لكن انا ماحب اشرب مويه حاره ههه يعني حاضطر اكثر الكميه وامري لله
كم اقل شئ ممكن يصنعوه ؟؟ وتقريبا كم يكلف كمتوسط كتنفيذ بجودة كامله ؟؟؟ اعرف انها اسرار تجار بس الارزاق بيد الله وان شاء الله المعلومات الي تساعدني بيها ماتضيع عند الله كل مايكبر مشروعي حاقول في احد اسمه او اسمها سلسبيل من الكويت علمني اصول التجارة
وعندي طلب كمان هل سهل الوصول للمصانع ؟؟
طبعا لي رجعه بعد اشوف ردك

تحية معطرة اختي لمار
وكل عام وانتي بخير
تسمحيلي ابدي وجهة نظري في الموضوع؟
اذا ناوية تشتغلين في الملابس وبالكميات اللي ذكرتي فطريقك ليس الصين..!! طريقك ياسيدتي هو المعارض الدولية المتخصصة في الازياء..ومنها تكون البداية والانطلاقة لعدة اسباب:
اهمها انه يتم عرض الجديد وماسوف يطرح للموسم القادم.. لا ماهو مطروح وموجود في الاسواق
ثانيها ان المصانع الصينية الكبيرة تكون متواجدة في هذي المعارض..وعليه يمكنك زيارتهم والتعرف علي الاسعار والجودة والكمية الممكنة.. بل يمكنك عمل طلبيات منهم في نفس المعرض
ثالثها انك تختصرين علي نفسك الجهد في اللف في اوربا للتعرف علي الموضة الموجودة اصلا في الاسواق والتي في حال تنفيذها ونزولها للاسواق تكون قديمة ساعتها ..ومن ثم العودة للصين للتنفيذ والتصنيع..وكذلك تختصرين الوقت والمال
يوجد عدة معارض دولية متخصصة في الازياء والموضة في منطقتنا ويشارك بها رواد الموضه في العالم ..مثل معرض موتيكسا في دبي وكذلك معرض بيروت
مجرد راي لا اقل ولا اكثر
تحياتي لك..وبالتوفيق

اولا :
الشكر لله ولا شكر على واجب
ثانيا :
لا انصحك ان تزورين ايطاليا او فرنسا لا راح تزيد التكلفه عليك ولا تستفيدين شي بمعنى اخر ( لورحتي باريس
وسكنتي فندق ورحتي كذا دار مثل ديو او لويس فالنتينو وغيرهم او شارع سانت فيليب او شارع مونتاجين اللي فيه سان
لوران او فالي فيلاج او la vallee او برنتان او سان ميشيل وسان جيرمان ) احسبي خسايرك وشنو تستفيدين ( ولا شي )
انا اللي اقصده تابعي المواقع المخصصه لهم وتابعي مجلات الموضه واقصد الاجنبيه بالطريقه هذي راح تستفيدين تاخذين
من الصور وتفصلينها في الصين ( اعرف المصنع اللي يفصل عنده ايلين صعب ) وهذي المعلومه عشان تعرفين شنو
مستوى المصانع هناك .
ثالثا :
بالنسبه لاعداد القطع المصنعه تختلف من مصنع لاخر لكن اقلهم 5000 قطعه . في طريقه ان تقولين انا ابي اجرب معكم
راح اخذ كدفعه اولى 3000 قطعه لي 6 موديلات اذا استلمتهم بالجوده المطلوبه ووافقوا عليها جمارك السعوديه راح اكمل
الاعداد الاخرى من الموديلات نفسها طبعا انتي تبين 3000 قطعه كل موديل 500 قطعه وراح تطنشينهم من تستلمين البضاعه
اما بالنسبه للاسعار تاقف على :-
القطعه كم متر تكلف - كم سعر متر القماش - وكم شك فيها مثلا او الزيادات الاخرى لكن متوسط السعر تطلع القطعه 8 دولار
تقريبا
( ملاحظه يختلف القماش بختلاف نوع القطعه يعني قماش الاطفال غير بدل السيدات وغير فساتين السهر وغير اللانجري الخ )
رابعا :
انا اعلن الارزاق بيد الله لكن تذكري دوم ان التجاره اسرار ( ولازم تحطين السر بالبير ) صحيح ما اضحك - اذا احد عرف طريقه
تجارتك راح ينافسك فيها عشان كذا لازم يكون فيه شي اسمه خط احمر ممنوع الاقتراب وسرقه الافكار مالها شغل بالارزاق والمنافسه
اذا احد سرق خططك في التجاره يعني تجارتك ضاعت ( للمعلومه فقط )
خامسا :
انا ساعدتك والله مو علشان شي وانا بفضل من الله مستقر ماديا ولا اخاف من المنافسه لاني بنيت اسم كبير في الكويت .
سادسا:
بامكاني اساعدك بطريقه التصنيع وذلك بطريقه وضع قطعك المصنعه مع اعداد قطعي المصنعه وبالطريقه هذي راح يكون كانك طالبه
كميات كبيره بالعدد اللي انتي تبينه حتى لو 50 قطعه ويكون موديل خاص فيك وليس لي اي قطعه فيه .
سابعا :
في شي يسمونه ( الاسرار الخفيه للتجاره )
لكل تجاره سر خف محد يعرفه الا اذا استمر في نفس التجاره ومارسها .
لكن مقدر اعلنها على الملا .
ثامنا :
اسمه وليس اسمها سلسبيل
تاسعا :
بالنسبه للمصانع سهل وبنفس الوقت ماهو سهل ( اللي يجي بالساهل يروح بالساهل )
والمصانع اذا شريتي منهم راح يدفعولك تكاليف الفندق بس مو 100 قطعه .
( 100 قطعه مويه حاره ههه )
واي سؤال او استفسار حاضر
اخوك / سلسبيل

اخواني الاعزاء
نحن في شهر فضيل وان شاء الله اخوان والموضوع مجرد سوء تفاهم
فجميعنا هنا لنفيد ونسنفيد والاختلاف لا يفسد للود قضيه !
اخي فهد
شكرا لاهتمامك وردك واعلم ان نيتك كانت المساعده وانا هنا بحاجه للاطلاع على جميع الاراء والخبرات لان المعلومه مهما صغرت فهي مهمه لدي وثانيا اتمنى ان لا تأخذ الموضوع بشكل شخصي فكلنا هنا اسماء مستعاره ولا يوجد معرفه مسبقه بيننا ..
اخي سلسبيل
لا اعرف كيف اصف لك شكري للمعلومات القيمه التي زودتني بها ولا يسعني الا ان ادعوا الله ان تكون في ميزان حسناتك واتمنى ان لا يكون سوء الفهم الذي حصل سببا في توقفك عن مدنا بخبراتك
و بلنسبه للاسماء المصانع اتمنى تزويدي بها ولك الشكر