يسعد مساك اخي محمد
اهلا وسهلا فيك راح تنور الأردن
فيك تنزل الرويال في الدوار الثالث او الشيراتون في الدوار الخامس بجبل عمان الاتنين ممتازين بالاضافة الى الفخامة يقدمون كافة الخدمات
راح اضيفلك رابط فيه كل الفنادق مع احداثياتها لتطلع على تفاصيل الخدمات المقدمة
وهناك العديد من الرحلات التي تزخر بها البوابة ممكن تطلع عليها لتشوف كيف تحب تقضي وقتك
اهلا وسهلا

مرحبا اخ محمد 44
انا افضل فندق الهوليدي ان , ارتاح فيه نفسيا اكتر من اي فندق 5 نجوم وحتى اسعاره حلوة ومعقولة
وموقعه جميل يبعد عن الشارع الرئيسي 5 دقايق مشي

فندق الرويال فخم و موقعه حلو...

بالنسبة لفندق الهوليدي ان فهو فندق ممتاز وموقعه ممتاز ايضا
طبعا في فنادق كتيرة فايف ستار وحلوين كمان وخدماتهم ممتازة بس بيعتمد على السعر برضو اللي حابب تدفعو
يعني متلا الرويال فخامة وروعة بس سعرو اغلى من غيرو
بالنهاية اوتيلات الفايف ستار خدماتها فايف ستار وهاد شي اكيد
بالنسبة لنزول عمان ل3 ايام وكبرنامج مقترح لها
هو غير كافي ولكن بامكانك تقوم بالتالي لو حابب اقترح عليك برنامج معين
اكيد اولا بامكانك التمتع بمرافق الفندوق اللي نازل فيه وممكن اقترح عليك عدة افكار حلوة متلا
بالنسبة لاول يوم فاكيد حيكون في تعب وصعب تقوم ببرنامج متعب لذا بنصح بانو يكون التجوال بعمان نفسها
بامكانك الذهاب لعدة مناطق حلوة : متل شارع الرينبو متلا في جبل عمان
انا بعتير هاد الشارع جميل للغاية وخاصة انو شارع راقي وهادئ وسياحي واجواءه تعتبر الاجواء القديمة الهادئة
وبتلاقي فيه هناك عدد كبير من السياح
ومن الافضل التجوال فيه ليلا بكون احلى
بامكانك تجرب هناك مطاعم عديدة وكافيهات ايضا طلاتها حلوة
متل كافيه اسمو دربكة وبيجو طلتو عالية على وادي وهيك وكتير قعدتو حلوة ولكن مسبقا يجب الحجز
وفي كمان كافيه اسمو ميجنا كتير حلو بنفس المنطقة برضو وعند الذهاب هناك اسأل عن مكانهم وما بتوه اكيد وفي برضو كافيه اسمو les artistes بتم فيه الرسم وهو عبارة عن معرض لوحات فنية وكافيه بنفس الوقت
وفي مطعم صغير كتير ولكن يقدم فطاائر لذيذة وشهية ومعروف اسمه فططري قعدتو قديمة وانتيكة
بالاضافة الى انك ما لازم اتضيع على حالك فرصة تذوق بطاطا بصوص التوم من كشك بطاطا مشهور برضو هناك
هذه بالنسبة للذهاب لهذا المكان والتمتع بالمأكولات في تلك المنطقة ونصيحة انك تروحها وما تضيعها على حالك

ايضا بامكانك الذهاب الى شارع الوكالات في منطقة الصويفية
القعدة هناك والاكتفاء بالجلوس في هذه الاجواء بحد ذاته مريح ومسلي خاصة ليلا وفي هنالك كافيه حلو كتير كتير للقعدة والاراجيل اسمه la saison بنفس شارع الوكالات
بنصحك فيه
واكيد ما تنسى تزور دوار عبدون واجواءه كتير حلوة والمناطق اللي بجنب عبدون مول
كلها اشياء معروفة لو بتسأل عنها اي تكسي بيدللك عليها واكيد احنا موجودين للمساعدة
طبعا حاول انك اتخصص برضو وقت قصير لزيارة وسط البلد ازا كنت من عشاق التراث والاجواء الانتيكة
والذهاب للتجول في تلك المنطقة فقط لو كنت من عشاق التراث
واهم شي انك بس تروح على وسط البلد تسأل عن موقع حلويات حبيبة الاصلي وتتذوق كنافة عالواقف
بتاكلها وانت واقف من غير قعدة كتير اجواءها حلوة وتعتبر من اشهى انواع الكنافة خاصة تلك المكان الاصلي
بامكانك ايضا تخصيص 3 ساعات من وقتك تقريبا لزيارة حدائق الملك حسين بس ما تكون يوم التلاتاء وذلك لزيارة متحف السيارات الملكي
لانو بكون مسكر يوم التلاتاء ...وهناك بتم فيه التجول بين السيارات الملكية للملك حسين الله يرحمو وعروض فيديو لبعض السيارات اللي كان يركبها خاصة منها اللي بتكون بتمشي على الارض عادي ويتم الدخول فيها بالماء لتتحول كقارب ...عروض جميلة وسيارات اروع تستحق الزيارة والمشاهدة
كمان ازا كان معك اطفال بامكانك زيارة متحف الاطفال بنفس المكان الموجود فيه كتحف السيارات الملكي بالقرب منه فهو ممتع ايضا

طبعا سواء كنت مسافر وحابب تستأجر سيارة او تعتمد على التكاسي فلا تنسى بزيارة شارع الاردن فيه قعدات حلوة بس يا ريت ما تزورو بوقت العطل لانو ما رح تنبسط
بس ممكن تجربو طلتو واجواءو حلوين
وانا لو مكانك بخصص ليلة ابات فيها بمنتجع بالبحر الميت خاصة الموفمبيك او الكمبسكي او الانتركونتينينتال والتمتع باجواء المنتجع والبحر الميت ايضا وخاصة انو مشوارو مو طويل ممكن ياخد ساعة او ساعة ونص للوصول للمكان
او مش شرط المبيت بامكانك زيارة المنتج والتمتع باجواءه والرجوع للمبيت في عمان
طبعا في عدة مطاعم بنصحك بزيارتها
متل فطور في ابو جبارة روعة وجلستو اروع
ويارة مطعم ريم البوادي
ولو رحت هناك ما تنسى تاخد صورة في الاستوديو الموجود هناك واللي بتم فيها التقاط صورة بزي اردني تقليدي واجواء حلوة
وننتظر التقرير منك
ازا بتحب اي معلومات اضافية احنا جاهزين للمساعدة
عذرا للاطالة

يسعد مساكي كروزة
ماشاء الله عنك شرحتي واسهبتي
شكرا كتير الك
بتمنى دايما تتواصلي معنا وتساعدينا بخدمة زوار اردننا الحبيب
مشكورة عالاهتمام
ربي يسعد حياتك