1. السلام عليكم ورحمة الله وبركاته

السلام عليكم ورحمة الله وبركاته

اخواني واعزائي المشرفين والاعضاء في المنتدى أروي لكم قصتي بالمختصر في شهرين ونصف عشتها في ماليزيا "مغترب" طالب
حضرت هذه الدولة في يوم 17/12/2005 وكان اول يوم لي فيها استقبلني صديق لي في المطار وانزلني عنده يومين لحد مالقيت سكن جزاه الله الف خير بعدها توجهت الا معهد اسمه إي أل اس واقدم فيه واختبر ويقبلوني ويطلبون مني حق اربع شهور مقدم انا بصراحة تخوفت يوم قالو كذا لاني ما احب ان احد يفرض علي شي وانا ما ابيه عاد قلت ما عندي الا حق شهر قالو اوكي وبعد الشهر هذا اذا ناسبك الوضع ادفع حق اربع شهور قلت ماعندي دفعت لهم حق شهر 1350 ورسوم كتب 100 ريال ورسوم اختبار 100 ريال ورسوم تسجيل 100 ريال ابتزاز على كيفكم طيب ومتى تبدأ الدوره قالو بعد اسبوعين اللي هو يوم 3/1 للسنة الجديدة
جيت اول يوم واداوم وكل شوي عيد عندهم : عيد السنة الجديدة هذا اول يوم كان بعدها باسبوع عيد الأضحى وهذا عيد المسلمين هنا طبعا الين خلص الكورس على راس عيد الصينيين وهي تسعة ايام كاملة
ترا هالبلد كلها اعياد عنصرية بمعنى الكلمة كل احد له عيد لحال والكل بعد كذا يتعطل
عاد جا اخوكم بعد ما خلص كورس رايح يجيب نتيجته المسكين الا ويتفاجئ انه ريبيت وطرطع.. وعلى اللي يقعد عندهم ذول بعد كذا.. لانهم رسبوني في مادة الاستماع والمادة هذي مو مكثفه علينا قد ما كان الاختبار صعب فيها طبعا هالمعهد يركز على الرايتيج بنسبة كبيرههذي ميزة والمدرسسين فيه صينيين وماليزيين والله لايبلاكم تسمعون لكنتهم في الانجليزي
خذيت بعضي واروح لمعهد اسمه بريتش كونسل يبعد عن سكني 15 كيلو اذا مو اكثر بس معهد جبار وقوي وامكانيات عالية فيه ومدرسين اصحاب خبرة واصحاب اللغه قبل كل شي واسجل فيه ولا ياخذون مني غير رسوم الاختبار وكانت 60 ريال شوفو كم الفرق 40 ريال وهو الافضل بعد ورسوم الدورة قالو الاسبوع الجاي قبل ماتبدأ بيوم أدفع حق اسبوعين فقط .. الدفع كل اسبوعين فقط من جد فله
ويوم اطلع بالليل والله لايكتبه على مسلم مثل هاليوم طبعا موب لحالي كان معي واحد من زملاي هنا ونتعشى ونرجع الا وحنا قريب من السكن يتعرضون لنا عصابة المافيا على ما اظن ويوقفون قدامانا وينزلون ومعهم عصي مثل حقت السكيورتيه اول ما لي انا قال جوازاك قلت في البيت واثناء ماهو يسأل يفتش بالجيوب انا توقعته بصراحه بوليس او مباحث او شي عاد المهم لحسن الحظ هذاك اليوم ما ادري وش اللي خلاني ما اخذ معي فلوس ولا جوال ولسوء الحظ والحمد لله على حكم ربي ولا اعتراض في حكمه سبحانه كنت ما خذ معي جهاز ام بي ثري شريته من هنا 600 ريال شاريه علشان اسمع فيه اغاني انجليزيه المهم الا ويشيله من على رقبتي ويلبسه طبعا انا معلقه ويكمل تفتيش .. والله ما كمل اسبوع عندي راحو لزميلي خذو منه جواله ولقو 5 ريال والله خذوها بعد وحوش بشرية ويطلعون دباباتهم ويحركون وبمنتهى الوقاحة والانحطاط عيني عينك بعد مافيه ذكاء ولا سياسة ولا شي لا وعلى فكرة لو قاومت طقوك وبيقتلونك بعد علشان الخمسة هذي والاكبر من ذلك ان مالقو معك شي ليه ؟ مايلقون مو قد التوقيفه وتنطق وحال .. جايبين الاجرام بعباطه
عاد اخوكم بعدها حلف يمين مايقعد هنا ولا له قعده هنا لو وش يصير يصير ما يقعد لانه يا اخواني كله يرجع من مال او اي شي الا كرامة الواحد انه يروح حقه وهو يتفرج وياويله يفك فمه ما اعتقد احد من كم يرضاها صح ولا لا ؟ بعدها قررت اغير لانه مافيه امان هنا ولا اسقرار ولا مرتاحين في اكل وشرب مع انها دولة مسلمة ولا شي من هذا القبيل .. واسمع بعد سؤال عن الافضل ويدلوني عن نيوزيلندا واقرا في المنتدى هذا بعد واعزم عليها جعل مستقبلي فيها ان شاء الله والله يوفقنا وياكم فيها وفي غيرها والان انا في ماليزيا وابي اروح لنيوزيلندا
1 ولا ادري متى؟ ولكن ابيها بأسرع وقت لان وقتي ضاع وانا هنا
2 وكيف وعلى اي خطوط جوية تكون دايركت ورخيصه
3 كم اخذ معي ؟
4 كيف موضوع الحوالات هناك من اي بنك؟ وكيف
5 ماهو المعهد المناسب والرخيص جدا وفي نفس الوقت كويس ؟ لاني وضعي المادي مش ولا بد والحمد لله على كل حال
هذا واسف على الاطاله ولكم جزيل الشكر والعرفان