محتاج وطن
15-09-2022 - 04:19 am
السلام عليكم ورحمة الله وبركاته.
أشكر إدارة منتدى العرب المسافرون الممثله بمراقبين ومشرفي قسم ماليزيا...المحترمين
وبعد..
ياأخواني,قبل سنة سافرت مع مجموعة من الزملاء في رحلة سياحية الى تايلند,وكانت الرحلة من جمالها
لدرجة أني حطيت صور جميلة لنا في بوكيت وبتايا كخلفية في كل شي عندي,,,الجوال والاب توب, والسيارة واوراقي ...حتى اذا طفشت من حر وزهق الرياض, اطالع الصور واتبسم...!!
الان يااخواني (العيال كبرت) وكتب الله لي بعد 30 سنه اني اتزوج السنه هذي بإذن الله,وكنت ناوي ومازلت بإذن الله اني اخلي شهر العسل في ماليزيا...!!! يمكن لان ماليزيا اصبحت عادة عند السعوديين .مثل عادات الزواج الثانيه ..(قصر....ملكه وشبكه....عشاء وموكب.....سفرة الى ماليزيا)
لكن يااخوان انا حظي سئ,ومثل ماقال مثل اخواننا السوريين ( يطلع لي بالكرشه عظم).
السنه هذي الريال طايح سعره بشكل كبير...وفترة الزواجات في الصيفية أقل من شهر واحد بس.
والحالة المادية (ديون في ديون) بعد انهيار الأسهم..!!
الوضع هذا فرض علي اني اعيد ترتيب اوراقي...وبصراحه انا الان قدام خيارين احلاهما مر...
وانا والله ماكتبت الموضوع هنا الا رغبة في انكم تساعدوني أو تنبهوني لحاجه يمكن تكون فاتت علي هنا او هناك..
تايلند, أفخم وأرخص وأجمل من ماليزيا...خاصه بوكيت.
ماليزيا,دولة اسلامية,ومهما كانت درجة الامان في تايلند عاليه,مع ذلك ماليزيا يكفيها ديانة الدولة.
لكن ماليزيا التذاكر حقتها الان نار في نار, وفنادقها شبه فل.واكيد راح تكون زحمة سعوديين.وانا ماابي اروح لمكان مااخذ راحتي فيه انا وزوجتي..!!
وش رايكم اخواني.؟؟؟ اطنش ماليزيا خير شر ...او اسافر لماليزيا لكن اروح لبوكيت واقعد فيها اطول مدة.؟؟
بوكيت والله مايكفيها الا أسبوع..
أو اكنسل شهر العسل مرة وحدة واخليه لجدة والطائف, وفي شهر 11 اروح لماليزيا ,لما ترخص الاسعار ويهدا الجو .؟؟
ارجوكم انصحوني ,,والله راح اتجنن..!!
انا بعطيك تجربتي و انشالله الاخوان المشرفين و الخبراء ما يقصرون وياك
انا هالسنة كنت محتار نفسك تايلند لو ماليزيا لاني قبل سنتين رحت ماليزيا وسحرتني و خاطري اروح تايلاند لكن القلب بما يحب اسيرُ
فقلبتها في مخي وطلعت معي كالاتي
بحرين- دوحه-بانكوك-كوالا-بيننق-بانكوك-دوحه -بحرين
وانت بما انك معرس و تحب بوكت راح يكون خط سيرك
ماادري جدة لو الرياض لو الدمام- دوحه-بانكوك-كوالا-بوكيت-بانكوك-دوحه-جدة مثلا
انا راح اروح ليلتين بانكوك
6 ليالي كوالا
3 ليالي بيننق
3 ليالي بانكوك
وفي جدولك اقترح
ليلتين بانكوك( للراحه)
5 ليالي كوالا(ما يحتاج اتكلم عن كوالا الاماكن ماشالله كثيره ومذكوره في المنتدى)
4 ليالي بوكيت( للاستجمام و تذكر الايام الخوالي )
ليلتين بانكوك( للتسوق)
التذاكر على القطريه اخذتها ب 225 دينار بحريني بينما اقل تذكره لكوالا بتطلع لك ب 280 اذا حجزت من وكت و لقيت حجز
التذاكر الداخليه من موقع اسيااير طلعوا ب 90 دينار تقريبا للشخصين وطفل رضيع
يعني بسعر شخصين لكوالا تقدر تروح تايلاند وماليزيا لين رحت عن طريق بانكوك
وبكذا تقدر تضرب عصفورين بحجر و بنفس المبلغ
تحياتي لك