السلام عليكم
نحمد الله وصلنا بالسلامه الى ارض الوطن بعد رحله ممتعه نوعا ما والممزوجه ببعض اوقات الملل لاتستعجلون راح اقولكم ليش بعدين..
على العموم انا قررت اني مااكتب تقرير لانكم ماتستاهلون ابد وكريهين وثقلين دم امزح بسم الله لاتاكلوني..
نجي للجد قررت مااكتب تقرير لسبب انه الاخوان هنا ماقصرو كل تقرير احلى من الثاني وشامل وكافي ووافي واللي فادتني كثير.. والتقارير متشابهه نفس الاماكن ونفس الفعاليات ونفس كل شي عشان هيج ماراح اتكلم بالتفصيل ابذكر بس بعض السلبيات والايجابيات والمعلومات المذكوره هنا واخذناها بعضها نفعنا وبعضها وهقتنا
وبعض القصص الطريفه اللي مرت علينا والمتعبه لكن بالنهايه بعد ماجينا ودي ارجع مره ثاانيه
واول مانبدأ بالنقاط السلبيه:

• كثره الصينيين في البلد مما ادى الى:

الغلاءفي كثير من الاماكن ,التعري ,(لا انصح العوائل اللي معهم شباب مراهقين السفرالى ماليزيا)
ومايشوفون الخليجيين شي وانفسهم شينه لدرجة اكثر من مره نوقف التكسي ولا يركبنا فصرت انقي الهنود لاني اذا شفت وجه الصيني اتشائم..

• كثره الغش ومحاوله تصيد السائحين الخليجيين وكثره الشحاذه (لم اشاهدهم الا في هذه السنه)

واتوقع ان ماليزيا سوف تلحق مصر بالنصب والغش وكثره الشحاذين خلال السنتين القادمتين.

• ارتفاع اسعار التكاسي بشكل مبالغ فيه وشوفو كيف يستغلون الخليجيين لدرجة انه يبي يودينا من التايم سكوير الى شارع العرب ب 25 رنجت ؟؟؟؟ فشغلنا رجيلاتنا بلوشي..

ونصيحه لاتاخذون تكسي من الفندق بتاتا البته لان اسعارهم فوق (كان يبي يودينا للمطار في بينانق ب 90 من الفندق واخذناه من برى 50)

• المبالغه باسعار الملاهي والاماكن الترفيهيه مثل اقوريا واخواتها بشكل خيالي عن السنوات السابقه يعني ندخل ملاهي التايم سكوير 150 رنجت والمره الثانيه عرفنالهم وقلت زوجتي حامل مهب لاعبه ليش ادفع له وعطيناهم 95 رنجت ...مع العلم انه الماليزي له سعر خاص ومكتوب عند باب الدخول..
• مطعم ماكدونالدز وصخ بمعنى الكلمه وطعمه ماله داعي دخلنا ماك اللي في بينانق بذاك السوق اللي عند برج كومتارا والله انه مليان صوارير ..

هذي بعض السلبيات اللي اذكرها اللحين ..انتظر تعليقاتكم
وانتظروا ...
الايجابياات
قصة ضياع عائله سعوديه
قصتنا مع التايم سكوير
قصة العبايه
قصة الدكتور
وغيرها من القصص الطريفه ....
مع التحيه...