أعتقد اسمها فاكهة الدوريان اذا ماني غلطانه أخوي فيصل
تحياتي ................

السلام عليكم ...
حياك الله اخوي الحبيب فيصلووه
وجابتها اختنا الفاضلة الغالية الباحثة
اسم الفاكهة (دوريان) durian .
اخوي فيصلووه هذه قصتها قصة ويسمونها ملك الفواكه
عندهم بماليزيا رغم انهم يعشقون طعمها ولكن يكرهون ريحتها
وانا عن نفسي صرت اكثرماليزية واعشق طعمها وريحتها
تصدق لو في منها عطر كان اشتريتها وعطرت بها السيارة
وكنت يومياً اشتريها واخليها لين قبل النوم واخبطها صح
لين ما ادوخ ويرتفع الضغط وبعدها اتشهد وانام
وصاروا الملايو ان بغوا يزوروني يجيبون معاهم دوريان
اه ياالدوريان يا اطعم فاكهة ذقتها بحياتي
خبرنا اخوي فيصلووه وش قصتك معاها تراها طيبة
سلمك ربي اخوي فيصلووه وترانا ننتظرك
لك تحياتي وتقديري اخوي فيصلووه واختي الباحثة والجميع .
والسلام عليكم

وعليكم السلام ورحمة الله وبركاته
يا سبحان الله وأنا أكتب كنت اقول الله يذكرك بالخير أخوي الشعيبي ياما تكلمت ومدحت بهالفاكهة .
على فكره اخوي الشعيبي لقيت موقع يتكلم عن الدوريان واكتشفت انهم يسوون منها أطباق مالح وحلو
فعلا عشق الماليزيين لهالفاكهه غريب .. ومدري علي شنو
وهذي صوره لفاكهة الدوريان وهي بعدها بالشجر .

تحياتي ..........

يقولون عنها :
@ طعم الجنه ورائحة جهنم @
وقد صدقوا في ذلك ولكني لم اكلها بل تذوقتها فقط وكله علشان الشعيبي !

ياهلا والله بأختي الغالية الباحثة
وتصدقين وقت ما كتبت ردي الاول تذكرت كلامك وكلام اخونا ياماس
واختنا زهرة القمر عن الدوريان
لازم تأكلين وصلة صغنونة اختي الباحثة
ونعطيكِ وصلة صغيرة تحطينها في نايلون وتعلقينها في
السيارة
مرة جبت اكلة من ماليزيا خليت عائلة من حجاجنا يسونها
اسمها تامبوياء (tampoyak) واصلها من الدريان
وتكون مثل الاجار ... تقدري تقولين فاتح شهية مثل الطرشي .
حطوها في علبة وجبتها معاي جدة .. وكل شنطي مرت
وما وقفت الا على الكرتون اللي منهم المهم الموظف
قال وش هذا ؟ قلت له اكلة ملايوية واحذرك انك تفكها
عاد سمع التحذير اشتغل حب الاستطلاع وفكها وبغى
يدوخ لأنه سحب نفس قوي ودخلت الريحة من خشمه وخبطت
في نفوخه وبغى يطيح العلبة من يده انفجع الرجال
قلت له تراها مش مخدرات المهم انتشرت الريحة
في الصالة وجاء صاحبه وشمها وانكتم وقالوا مشوها
لا يكون كيماوي ونفس القصة صارت يوم فكيتها
في بيت ابوية وبغوا ناس يغمى عليهم وبخروا البيت
هذا ملك الفواكه ومش اي كلام ... ان حضر يقول انا
وترى من جد ترى هذه الفاكهة لا يكثروا منها مرضى ضغط
الدم ... وحتى الناس اللي ماعندهم شيء لا يكثروا منها
وان كثرت وحسيت انه جسمك صار حار فحلها سبحان الله
كما علموني شياب الملايو انك تحط موية بقشر الدوريان
وتشربها وتراني جربتها وفادت
وفاكهتين لا تجتمع ابداً اللي هي الدوريان والمانغيس .
مشكورة اختي الباحثة على الصورة الجميلة للحبيبة
الفاتنة واللذيذة الساحرة الدوريان
والله يعطيكِ العافية ولكِ تحياتي وتقديري

سلمك ربي اخوي سعودي روعة
وتسلم اللسان اللي ذاقتها
وش رايك يا ولد بلدي في طعمها ولد بلدي وش رايك فيها
تحسها عنصرية ولا حلوة ومطلوبة
نرجع لموضع ملك الفواكه .. عجبتك ولا لا .. ترى الكثير
ينتظرون رأيك للاقدام على التجربة
احرجتني يوم كتبت انك ذقتها لاجلي ... كيف ارد عليك دحين
تصدق ورطتني في البحث عن اجابة
سلمك ربي اخوي سعودي روعة على ردك الجميل
ولك تحياتي وتقديري اخوي الغالي .

ضحكتني يالشعيبي حكايتك مع الدوريان كأنها قصة قيس و ليلي ..
بالنسبة لي عادي آكلها و أستسيغ طعمها و أحب الحلوى تبعها لكن زوجي ما عجبته أبدا ..
فعلا ما قلت لنا رأيك يا سعودي روعة لا تجامل عادي قول ...

1. اقول لكم سالفتي ......:

بسم الله الرحمن الرحيم
ما شاء الله ..... ما شاء الله ...... مستانسين وانتوا تقولون .. دوريان .... لا والاخت الباحثه لقت موقع عنها بعد .... ما اقول الا .... الله يغفر لكم .....

اقول لكم سالفتي ......:

طبعا قبل لا اسافر ماليزيا وانا اسمع عن هالدوريان ... وما ادراك ما الدوريان ... وطبعا لما وصلت ماليزيا وقررت اروح الكاميرون ... الله لا يوريكم ... الكل يوصيني عن الدوريان ... لازم تذوقها ... لا تفوتك ... لدرجة اني من كثر ما سمعت دوريان ... قمت احاتي شلون آخذها معاي اذا رديت لكوالا ... والله حاله ... لا وابو غدي يوصيني ... لا تنسي الدوريان .... المهم اول ما وصلت الكاميرون .. وبعد ما ارتحنا ... خذيت العائله ورحنا .... وين ؟ ..... طبعا نبي نذوق الدوريان ..... وطبعا طول الطريق واخوكم يمدح ويشرح للمره والعيال ... بعد شوي وانا ابوكم راح تذوقون الدوريان .. وهذي يقولون عنها فاكهة الجنه .... وخذ من هالحجي ....
المهم وصلنا .... طبعا ما سالت عن سعرها ... وعطوني اذوقها .... والله لا يوريكم ..... شصار !!!! .... باختصار ... الطعم خا ايس..... حسبي الله علي عدوكم ...الله لا يوريكم ... طول اليوم وانا والمدام ... حالتنا حاله ... اشوه اني ما لزمت علي العيال ..... هذي فاكهة الجنه ... الصراحه ما صدقت قلت يمكن قاصيين علي ... علشان جذي سالتكم ...
الشعيبي .... مستانس وانت تقولي ملكة الفاكهه ... آآآآآآخ ....تبي منها عطر بعد .... حسابي معاك بعدين .... الحين نفسي انسدت بس وانا قاعد اكتب عنها .... لا واخوكم كان يقنع راعي التاكسي علشان آخذ منها حق ابو غدي في كوالا .... !!!!!
الباحثه ... بعد هذا االي ناقص ... موقع علي الانترنت ... واطباق مالح وحلو ... الله يزيد النعمه .....
سعودي روعه .... طعم الجنه ورائحة جهنم !!! .... الا جهنم بجهنم .... انا داري كله من الشعيبي ... قاص علينا
الشعيبي ... مره ثانيه ... انت من صجك ولا تغشمر .... فاتح شهيه !!! ... وبعدين توك اللحين تقول عن العلاج ... ((وان كثرت وحسيت انه جسمك صار حار فحلها سبحان الله
كما علموني شياب الملايو انك تحط موية بقشر الدوريان
وتشربها وتراني جربتها وفادت)) .... تو الناس ... انا يوم دخت الله ستر ما طحت من الوادي ... خبرك الكشك علي طرف الوادي ... الله ستر ... زين وصلت التاكسي ..!!!
العربيه ... حنا ما خلصنا من الشعيبي ... طلعتيلي انتي .... يعني علشان صرتوا خبراء بماليزيا .. تبون تذبحون الناس .... العربيه انتي والشعيبي ... احمدوا ربكم اني ما اقدر اطولكم ... !!!

الفاكهه هذي
من شكلها الواحد يتردد يجربها