السلام عليكم
نعم اختي يمدي عندنا بالكويت الفيزا تاخذ 3 ايام
وقبل لا طلعين الفيزا لازم تكونين حاجزه الطيران والفنادق لانه هالحجوزات دوكمنت رئيسي للحصول عالفيزا
اعتقد ماراح تلاقين خيارات كثيره للفنادق لانج نوعا ما متاخره بس باذن الله تحصلين
انا صارلي 4 ايام من رديت زرت قارميش مدينة صغيره وجدا هاديه يومين كافيه لها جدا
بادن بادن وايد وايد حلوه وممكن تكون نقطة انطلاق لمدن كثيره مثل ستراسبورغ فرنسا وفرايبورغ المانيا وبازل سويسرا وروست اللي فيها اوربا بارك
زلمسي حلوه ورومانسيه جدا بس من رايي ماتسوي السكن فيها السكن في كابرون وايد احلا واشرح واونس بما انكم عايله
اقتراحي : ميونخ يومين بعدها كابرون او زلمسي اسبوع بينهم ساعتين ونص تقريبا 265كيلو والطريق امان ومريح
بعدها قارميش والمسافه تقريبا 180 كيلو تنقطع بساعتين تقعدون بقارميش يومين
بعدها بادن بادن وهي 300 كيلو تقريبا 4 ساعات والطريق هم وايد حلو ومريح
تقعدون في بادن 4 ايام مثلا
بعدها ليله واحده في فرانكفورت والعوده للبلاد
من بادن بادن الى فرانكفورت 140 كيلو تقريبا ساعتين والطريق جدا مريح
وان شا الله رحلة سعيده

هلا وسهلا ام خلود اشكرك على الرد والحمد الله على السلامه ، اقتراحك جميل جداً بس مثل ما كتبت إحنا عائله وصعب نتنقل كثير فَ عشان كذا قلت هالمدن ال 3 ومنها نطلع نزور المدن المجاورة ... *
كابرون مخططين نسكن فيها ان شاءالله ، وانا ودي اخلي قارمش في الاخير عشان منها اطلع ل ميونخ يوم للتسوق *وارجع قارمش عشان يكون ختامها مسسك*
فَ بالبدايه ابي اعرف من وين الوصول ومن وين المغادرة اذا تشوفون هالتخطيط مظبوط ...*
انا قلت الوصول فرانكفورت ومنها ل بادن بادن ومنها ل زيلامسي او كابرون ومنها ل قارمش والمغادرة ميونخ او فرانكفورت !!!! *
المسافات بين هالمدن كبيره او لا !!*

ياريت لو اتصير البدايه من فرانكفورت والنهايه من ميونخ بيكون خيار ممتاز
من فرانكفورت الى بادن مباشره اذا وصولكم بالنهار .. ثم غارمش ليلتين ثم كابرون واخيرا ميوننخ للتسوق 3 ليالي... دمتم بخير

شكرًا يَ مشرفنا على الرد ، بس ماودي اسكن في ميونخ لان التنقلات بتصير كثير كذا ، وانا ابي اكتفي بَ 3 مناطق سكنيه فَ اخترت قارمش لانها قريه واقدر اطلع منها يوم واحد لميونخ ، فا انا الحين متلخبطه ودي الوصول والمغادرة من مطار واحد وأبي هال 3 المدن فَ من جديد اي مدينه ابتدئ اول من هجري ال3 مدن !!

اختار ميونخ .. ومع هذا لازم اتكون 4 افضل لكم حتى لو تقعدون يوم بالاخير بميونخ
ويكون المخطط الوصول نهارا مطار ميونخ ومنه مباشره الى كابرون ثم غارمش ثم بادن بادن ثم يوم واحد فقط بميونخ للتسوق او يومين ..واذا كنتم مصرين على 3 اماكن للسكن فقط
فيكون الخط هكذا
الوصول نهارا مطار ميونخ منه مباشره الى كابرون ثم 7 ساعات تقريبا الى بادن بادن ثم 4 ساعات الى غارمش وبعدها من غارمش مباشره الى مطار ميونخ للعوده
تحياتي

طيب وش رايك إذا اخترت مخططك الاول وهو نفس مخطط ام خلود الله يعافيها
بس خليت الوصول فرانكفورت الصباح ومنها ل كابرون وبعدها قارمش وبعدها بادن بادن والمغادره فرانكفورت وبكذا نكنسل ميونخ !!!!!

بس فرانكفورت بتكون بعيده اكثر من كابرون .. لكن ممكن
مع اني اميل اكثر لميونخ احسن وبيكون المخطط ارتب
تحياتي

إها الله يعافيك ما قصرت
يعني تقول الوصول
ميونخ ومنها ل كابرون بينهم ساعتين ونص تقريبا.
ومن كابرون ل قارمش بينهم اقل من ساعتين تقريبا
ومن قارمش ل بادن بادن 300 كيلو يعني 4 ساعات
ومن بادن بادن ل ميونخ !!
هالحين كم المسافه بين المدينتين !!
لأني بطلع من بادن ل ميونخ ومن ميونخ على طول للمطار ، ابخلي زيارتي ل ميونخ اثناء تواجدي في قارمش
وهالمسافات الى فوق صححيحه !!
وانا بجلس 16 ليله ان شاء الله كيف توزعها بين هالمدن ال 3

لا انا ما قلت جذيه .. لو تقرا رسالتي مره اخرى افضل ..
اعيد ما ينفع من بادن الى ميونخ مباشره لان المسافه 4 ساعات على الاقل الى المطار .. المخطط الاول لازم يكون يوم بميونخ جلوس قبل السفر.. المخطط الثاني من ميونخ الى كابرون مباشره ثم الى بادن بادن 7 ساعات ثم الى غارمش 4 ساعات ثم الى المطار ساعه ونصف
المسافات لا مو صحيحه من كابرون الى غارمش 3 ساعات تقريبا