عذرا على العنوان بس بغيت اشد انتباه المشرفين واصحاب الخبره - ياجماعه انا خلال اسبوع ناوي احجز
باذن واحد احد لكن اللي قريته البارحه واليوم صراحه شي ماينسكت عنه ولا اتقول يالله مافي بلاد تخلى من
هالسبليات لكن الصراحه هالسلبيه اتلوع بالجبد وتكرهني بالبلد كلها وانا سبب من اسباب اختياري انها بلاد
اسلاميه تستاهل اللي ينصرف فيها والموضوع صراحه هو موضوع الصراصير .
انا ناوي احجز في جينتنغ اربعة ايام ولا اقرا مواضيع عن كثرة صراصير في الغرف وواحد يتشكى انه ما
طفى نور الغرفه لانه يوم يطفي النور يمشن على جسمه وشعره ، والثاني في فندق تايم اسكوير اللي فيه
السوق حصل صرصورين في استقباله بالغرفه !! انا شخصيا يوم مريت ماليزيا قبل ثمان سنوات يوم كنت
جاي من استراليا مسكتلي واحد بغرفة الفندق والصراحه ماعرفت اسمه بالانجليزي بس اتصلت وقلتلهم
اميرنجسي بليز كويكلكي كام ((زين ماجابوا طفاية حريق )) وظليت ماسكنه لين جتني ادارة الفندق
وعطيتهم اياه ملفوف ابكلينكس وقتلهم هديه عربون محبتنا لفندقكم ((هاهاها لا وعزف قيثارة مادري بيانو
باللوبي ))
صراحه مريت على مجاري مفتوحه ببانكوك ماشفت جنبها صراصير بس ابماليزيا تحصلهم ويا
مفاتيح الغرفه :112: زين بعد مايسألونك عنهم لما اتسوي جيك اوت يقولولك احنا امسلمينك
خمسه اثنين وينهم
ارجوكم ارجوكم ارجوكم ارجوكم بعد ارجوكم مصير سفرتي بايديكم اختارولي
1- شقق فندقيه محترمه في كوالامبور بشارع العرب خمسه نجوم اواربع
2- فندق محترم ابجينتغ مشهود له مافيه صراصير خمس نجوم
3- منتجع راقي على البحر اوفندق خمس انجوم في لنكاوي
واوعدكم وعد تقرير مفصل من المطار الى المطار ومالايقل عن 150 صورة ويمكن اكثر بس ارجوكم
عطوني روابط فنادق او شقق فخمه تكون مضمونه مافيها ال (ياي )
والله انا في بلادي اخر صرصور شايفنه قبل سنه يعني ساير ودافع تذاكر وفنادق خمس نجوم وكاميرا ديجتال هاه!! ورحله مابين السحاب واخر شي صراصير في السحاب ( قصدي جنتنغ )
شاكر مروركم جميعا واسف على الاطاله واتريا ردودكم لاخلا منكم