هلا بيك أخوي ... وعليكم السلام ورحمة الله وبركاته ...
أول شي .. نرحب فيك في بلادك البحرين .... وحياكم الله انت والمدام ....
بالنسبة لأسألتك ...
فهل تتوقعون ان اجد صعوبات في الطرق مثلا
او يمكنني التغلب مشكلة الطرق باستخدام نظام ال gps في موبايل N95
أبدا ما بتحصل أي صعوبة ... البحرين بلد صغير ... وحميم .... وممكن تسأل أي حد في أي مكان ... وبتلقى كل الترحيب في إنه يدليك أي مكان ... ولو في بالك مكان معين ... تفضل اسألنا وان شاء الله بندليك بالتفصيل الممل ...
وسؤال آخر اريد فندق يكون رخيص لايزيد عن 400 ريال سعودي
ويكون بعيد عن اجواء الشباب العزوبية
ممكن بهالسعر ... تشوف الشقق الفندقية ... شوف المواضيع والتقارير المصورة عن بعض الشقق الفندقية ... وان شاء الله بتلقى اللي يرضيك ...
وسؤال آخر هل العملة السعودية تمشي حالها ام لازم اغير العملة الى بحرينية
العمله السعودية ماشي حالها أكيد ....
وحياكم الله ...

حياكم الله اخي الكريم في بلدكم الثاني البحرين انت والمدام بالنسبه للطريق الله يسهلها عليكم وبالسوالف ما راح تحسون بالوقت وكلها 5 ساعات وانت في البحرين ومادام عندك gps ما راح تضيعون ,اما بالنسبة للفندق اشوف اليت سويت ناس وايد تمدحه وترى هو فندق عوايل وما فيه خرابيط ولا شيئ وموقعه قريب كثير من المجمعات ((مجمع السيف و مجمع البحرين و مجمع الدانه ومجمع العالي )) وسعره اظن مثل ميزانيتكم .
حياكم الله مرة ثانية

الله يجزاكم خير
والله سعدت بترحيبكم
فعلا قرأت تقارير الان عن اليت سويت واهم شيء عندي يكون بعيد عن خرابيط الشباب الله يهديهم
طيب ممكن رقم هاتف اليت سويت
وشكرا لكم

هلا أخوي الأخت الغالية ما قصرت ،،
بس وينك عن البحرين؟؟
إسأل السعوديين عن البحرين ،،
وبالنسبة لإليت سويتس، نعم لا يوجد به شباب وما شابه والفندق إسلامي حيث لا يوجد نوادي ليلية وبارات ،،
وهذا رقمهم 17558888 ،،

يعطيكم الف عافية
انا الان متواجد في الخبر وصلت امس تعبان حجزت في فندق ليلة
عندي استفسارات
متى افضل وقت اجي للبحريين ؟ من ناحية الزحمة التي على الجسر
ماهي افضل مطاعم في البحرين
وشاكر لكم يا أهل البحرين
((تم تعديل المشاركة من قبل الإدارة))

Warrior Within
اتصلت فيهم
وللاسف الفندق فل لاتوجد غرفه فاضية وسعر الغرفة ب 70 دينار

1. الجفير هي المنطقة الموجودة خلف مسجد الفاتح


2. طريقة الوصول لها بسيط

اخي الكريم روح لشقق الفندقية الموجودة في الجفير
اغلى واحد فيه لغرفة بصالة ومطبخ مايطلع عن 350 ريال
دور في المنتدى بخاصية البحث بكلمة الجفير لأن هو الحي الجيد وقريب من شارع المعرض ان بغيت شي منه من مطاعم وبعيد عن الأماكن الغير مرغوب بها للعوائل

الجفير هي المنطقة الموجودة خلف مسجد الفاتح

طريقة الوصول لها بسيط

بعد ماتدخل البحرين من الجسر تروح على طول وتركب الكبري الي يوديك ضاحية السيف ، خليك على طول ماشي وبيجيك مجمع السيف على يسارك واستمر سيده ، بيجيك لوحة مكتوب عليها الحي الدبلوماسي يمين لاتدخل يمين سيد بس بعد الملف بأشارة بالضبط لف يمين ، بيكون الشارع كبير وهو الدايري حق البحرين (اذا مالفيت يمين بيجيك على طول كبري وبيوديك منطقة اخرى اذا غلطت وركبته عود واول ماتنزل عن الكوبري في اول اشارة لف يسار) المهم بتسيد مع الشارع الين يجيك مسجد على يدك اليسار كبير هو مسجد الفاتح اول اشارة بعده لف يسار ،،،،،المنطقة الي على يسارك ويمينك كلها شقق بس لاتروح لأخر الشارع وتلف معه يمين وتدور في المنطقة ذيك لأنها ماتصلح للعوائل في المساء بس ماهيب ذيك الدرجه من الخراب فلاتخشى شئ.
ان بغيت مساعدة على الهواء ارسل لي رقمك الحين على الخاص وبأتصل بك واعلمك لأن شكل وقتك قصير مايميدك
بعدين اطلع للجسر قبل الساعة 2 او بعد الساعة 6 لأن اليوم الخميس
ملاحضة : اذا قال لك راعي الشقه سعر نزل ابوه على طول خمسين ريال واصر وبتمشي امورك ، ماعليك منهم سعرهم ماهوب رسمي وبعضهم ان عرفك اعطاك اياها بسعر 200 بعد بس بعد تكرار الزيارات عليهم
((تم تعديل المشاركة من قبل الإدارة))
الله يستر عليك

الف شكر لك كلهم حلوين
والله استفدت كثير من مشاركتك
وكان ودي ترسل لي رقم هاتفك بس المشكلة نظام المنتدى مقفل خاصية ارسال على الخاص
اخوك Developer10g

اولا اشكر ادارة المنتدى على التصحيح الغوي .....لأني ماشفت شي محذوف يالله لك الحمد
بالنسبة لك يا اخي ماجد ، ارسلت لك اكثر من مره ةالرد يجي كالتالي :
# Majed.Net لم يوافق على استلام رسائل خاصة ، أو ليس لديه صلاحية الاستفادة من هذه الخدمة حتى الآن .
بعدين ماقدر افتح ايميلي لأرسال رسالة لك لأن جهازي عام واخاف ينسرق الباس ورد الخاص بالأيميل