1. بسم الله الرحمن الرحيم


2. نكمل ,,

بسم الله الرحمن الرحيم

الرحله هذي كانت قبل شهر تقريباً وتوني أطرحها الآن بسبب المشاغل والسفر..
كنت في رحله خاصة لمدينة الدمام قبل شهر تقريباً لحضور مناسبة .. وكان برفقتي العائله بعد حضورني للمناسبه أقترحت على الأهل بزيارة سريعه للبحرين بحكم اننا في نهاية الأسبوع يعني إجازة وصيف وما أتوقع يكون زحمه لأن الناس كلها مسافرة برا
الأهل أيدو الفكره وقبل ما أطلع أحد الأقارب من أهل الدمام قال نصيحه أحجز من هنا على أحد الفنادق أريح لك من الدوران على الفنادق .. قلت له وش تنصحني فيه قال .. انه يعرف رقم الدبلومات رادسون ساس .. قلت توكلنا على الله .. أتصلت على الفندق وحجزت غرفتين وبسعر 45 دينار بدون إفطار وقالو لي أن آخر موعد للحضور هو الساعه 2:00 ليلاً بعدها تنتهي صلاحية الحجز .. وعطوني رقم الحجز وكل حاجه ... مع العلم ان الحجوزات هذي سويتها بعد نهاية المناسبة الساعه 11:00 مساء ,, قلت لهم انا اساساً جايكم في الطريق ...
طلعت انا والأهل ومسكنا الجسر وكالعاده التأخير والمرمطه في الجانب السعودي والعذر بطء النظام في الجوازات والجمارك .. نصيحه اللي بيسافر بأهله ومعاهم تصاريح للسفر يصورون التصريح لأن التصريح اذا مو مصور يسحبون الأصلي وأنصح تصورونه من مدينتكم لأن المحل اللي يصور في الجسر يصور الورقه الواحده ( بخمسة ريال )
بعد ما وصلنا للجوازات وطلب الصور لتصريح الأهل أفدته ان ما مامعي إلا الأصل فقال أرجع صوره وإلا بأسحب الأصل وقال روح للمحلات اللي جنب الجامع اللي عل الجسر رجعت للمحلات ولقيت المحل اللي يصور ومعي تصريحين .. بعد ما صور كم الحساب قال ( 10 ) ريال قلت ليش 10 قال الصوره هنا بخمسة ريال .. التصوير داخل المدينه العشر صور بريال واحد .. قال هذا سعرنا .. حاسبته وتوكلت على الله
وهذي صوره وانا في السيارة قبال المحلات ومن ضمنها المحل اللي فيه آلة تصوير
المهم خلصنا من التصوير ومشينا والحمدلله دخلنا دولة البحرين و ومشيت حتى وصلت لفندق الدبلومات رادسون ساس وكانت الساعه 12:30 مساءً دخلت الفندق ولقيت موظف الأستقبال في شد ومد مع مجموعة من السكان واحد ساكن من المغرب ولا طلعو له شناطه مع اننا في نصف الليل والثاني يقول طالب أكل للغرفه من الساعه 11 وما وصله إلا الآن يوم انه نام ... وقفت في الأستقبال تقريباً حتى الساعه 1:00 أنتظر الموظف يخلص وما فيه غيره .
خلص الموظف و عطيته رقم الحجز للغرفه ... قام يطقطق على الكمبيوتر 5 دقايق راحت وهو يطقطق وانا أنتظر يوم راح وقت وهو يطقطق قلت هذا شكله خاش تشات ونساني , يالحبيب خلصنا ( للعلم الموظف من الجنسية الآسيوية ) .. قال ما فيه غرف فيه فقط سويتات والسويت الليله ب 150 دينار( 1500 ريال ) .. قلت له انا حاجز غرفتين وهذا رقم الحجز .. قال معليش ما فيه إلا سويتات تبي ولا ما فيه غير كذا ... صراحة تضايقت .. وهاوشته قلت تخليني انتظر كل هالوقت وانا حاجز وآخر شي تقول ما فيه إلا سويتات ,, ( بدأ بالكذب ) قال أساساً صلاحية الحجز تنتهي الساعه 4:00 العصر وانت جاي آخر الليل .. يوم قال هالكلام بغيت أطمر من فوق الأستقبال وأتفاهم معه صح ,,
قلت له انا حاجز قبل ساعتين يعني بعد 4 يعني صلاحية حجزي إلى بكرة الساعه 4 وانت تكذب مع انه يبين عنده في الكمبيوتر الوقت اللي انا حجزت فيه بس على باله بيلعب علي بهالكلام يوم أرتفع الصوت طلع لي واحد ثاني كان جالس في المكتب الخلفي وقال هدي أعصابك ,, هددتهم بأني بأنقل هالمشكله للصحافه وبوصلها لوزارة السياحة ,, طبعاً انا كنت منزل الشناط ومنزل الأهل ومخليهم ينتظرون لأني كنت حاجز وضامن الحجز لكن فوجئت بهالشي ,,, طلعت وانا معصب إلا فيه واحد من المسؤولين لحقني لحد برى وقال معليش احنا آسفين والغرفتين حنا نجهزها لك خلال 10 دقايق بس تعال .. قلت لا لا ما ابي شي .. شلون الموظف يقول ما فيه غرف وانت تقول أجهز لك .. قال ان الكمبيوتر فيه مشكله ومو واضح عندنا .. قام يتعذر ويتأسف ركبت شناطي والأهل وطلعت من عندهم وكان الله كاتب لي اني أروح لشي أفضل ,,
(( الحركه اللي سواها موظف الأستقبال أكتشفتها فيما بعد من أحد الأخوه خبراء البحرين بأنها حركه دنئيه لإجبار البعض على السكن في الأجنحه لأنها أغلى وبيكون عائدها على الفندق أفضل ويسوون هالحركه مع اللي يحجزون بالذات لأنهم عارفين أنهم يبون الفندق فبيجبرونهم بهالطريقه الدنيئة , مع العلم ان الفندق قديم وسيء وما يسوى ))

نكمل ,,

تذكرت ان فيه فندق جديد جنب السيف ما صار له فاتح إلا كم شهر أسم الفندق ( ميركيور جراند السيف ) وهو عبارة عن أجنحة فندقيه . وصراحة توفقت في هالفندق الرائع اللي أنصح به العوائل اللي طالعه للبحرين
دخلت للفندق وسألت قالو نعطيك جناحين ومسوين عرض صيفي على الجناح بيطلع عليك ب 53 دينار شامل الأفطار يعني 530 ريال والجناح عبارة عن ( غرفه + صاله + مطبخ صغير مفتوح على الصاله + دورة مياه ) أخذنا جناحين وطلعنا وصراحه كان الأثاث جداً جميل وجديد والجناح موفر فيه كل شيء (هيتر وشاي وقهوه مجانيه ) ( مياه مجانيه يومياً ) ( إنترنت مجاني ) ( المطبخ موجود به أدوات كامله بالإضافه للمايكروويف والثلاجه ) ( DVD مسجل و فيديو ) ( جرائد يوميه حسب اللغه اللي تفضلها ) ( إفطار مجاني مع إمكانية إيصاله للغرفه مقابل إحتساب رسوم خدمه فقط ) ( مواقف للسيارات في القبو وتحت حراسه أمنيه )
صوره لواجهة الفندق
معلومات سريعة عن الفندق
يتكون من : 120 غرفه و 121 جناح غرفه وغرفتين و مطعمين وكوفي شوب ونادي رياضي
وأعطيكم صور سريعه من الفندق
غرفة الجناح
الصاله مفتوحه على المطبخ وطاولة الطعام
الكوفي شوب مع بار
المطعم "مطعم نيران "
خدمات متكامله في مركز رجال الأعمال
الإستقبال
صوره أخرى ليليه لواجهة الفندق
صوره أخرى لصالة الجناح
مطبخ الجناح
دورة المياه " أعزكم الله "
جانب آخر من الصاله
وفي نهاية الجزء الأول هذي خريطة الفندق مع ان الموقع واضح
يتبع