- وبالاخص عشان كيكة التمر
- وانا الصراحه منهم
السلام عليكم ورحمة الله وبركاته
ان شاء الله الجميع بخير وبصحه
حخوش بالموضوع عدل من غير لف ولا دوران
صراحه شي يقهر اللي قاعد يصير
لما نروح كوفي نحبه ودايم نحرص على زيارته مهما كانت اسعاره عاليه اوفوق العاديه
وفجأه تصير الخدمه فيه دمار وما تنفع
ولا تحس ان القرسونات او الويترس اللي فيه اغبياء ويسدون النفس وكنهم بيوكلونك بلاش
اوغير متفهمين او ودهم من باب الاولى يطردونك من المكان
مع ملاحظة ان ممكن يكون الطلب فيه شي غلط
وممكن يجيك مش زي ماتعودت عليه ,يعني فيه شي غلط
انا اقصد بكلامي كوفي اموري بالراشد
واكيد كثير اللي يحبونه ويزورونه دايم
وبالاخص عشان كيكة التمر
وانا الصراحه منهم
لكن مؤخرن صارت تجي مش فرش+ بارده+ مره+انك لاقلتلهم سخنوها ابطو+انهم لا سخنوها جاك الايس كريم ذايب+انك لاقلت طيب بدلو الايس كريم صار ماينفع قالو ادفع ريالين+يرفض تماما انه يبدله+ ينفخ عليك ولو يقدر يقول اطلعي من غير مطرود اطردك
مهما بينت استيائك
مافيه
بكيفك
بالطقاق
تبي تاكله ولا اتركه واطلع:112:بس تعال تعال
قبل تطلع لاتنسى تدفع 15% على الخدمه الزفت اللي خدموك فيها والطلب اللي بغيت تدوخ من الانتضار وهو ماهلت هلايله
ليش ندفع مقابل خدمه رديئه, بس للاسف مضطرين ندفع لانه فشله!!!
ولانه المكان مليان ناس اهم شي ياكلون ويدفعون ويطلعون وما يهمهم وش لهم ووش عليهم
عاد تاخر الطلب ....جا بارد....جا بايت...نفخ عليه القرسون....نهبوه بالخدمه...مش مهم اهم شي انه دربى راسه وكلا وشبع ونقص عليه
انا صراحه احب هالكوفي واحب اكله ومكانه لكن بس حبيت انبهكم للخدمه الرديئه والمستوى المتدني اللي قامو ينهبونا فيه بالفاتوره ولجودة الاكل اللي بدت تصير معدومه
ممكن اكثر من احد يقول لا بالعكس تونا مجربينه وياسلام يهبل وماعليه والقرسونات عسل
بقوله ايه ايه صح عليك اكيد انته تقصد الفلبيني الوحيد اللي كان يبتسم :8888:بينما الاخرين ودهم يذبحونك او يتخلصون منك باي طريقه
واذا اعجبتك الاطباق الرديئه والخدمه البطيئه والسيئه مؤخرا فسمحلي انت اجل تجهل كيف تكون الكوفيهات والمطاعم الراقيه
فقط للتنبيه :wink: ,,,,,,,, وشكرا
الصراحه انا عندي مبدا ... اكل مر واشرب مر بس مااقابل مر ... عسى فهمتوا