tomtit
16-11-2022 - 07:28 pm
السلام عليكم ورحمة الله وبركاته وبعد
يا طويلين العمر
فريت النت لكن مالقيت الاجابه الكافيه
وقالوا لي مالك الا المسافرون العرب
طبعا الموقع مايحتاج ماشالله
نار على علم بمواضيع السفر والاستفسارات
ادخل بالموضوع
انا حاجر لشهر عسل لمدة 16 يوم في ماليزيا
وفيما يلي بحط الفنادق الي حجزتهم هناك
بسم الله
اول فندق: صن واي لاقون ..مدة الحجز3 ايام بلياليهم
الثاني:بيرجايا لنكاوي ريسورت ..مدة الحجز 3 ايام بلياليهم
الثالث:بارك رويال بينانج 2ايام بلياليهم
الرابع:قولدن سندس باي شانجريلايومين بلياليهم
الخامس: كوالالمبور تريدرس 5ايام بلياليهم
ااستفساراتي: : :
بالاول انا اول مره اسافر بطياره
اول ما اوصل لكوالالمبور وين اروح عشان اخذ العفش؟؟ وكم يبيله العفش عشان استلمه؟؟
وطبعا ما انسى المقلب الجميل الظريف من الخطوط الجويه السعوديه
انا حجزت واكدت عليه بالتواريخ وكل شي
وبعد ماحجزت الفنادق ودفعت الفلوس اكتشفت ان حجزي ماخرينه يوم والعوديه ماخرينها 4 ايام ومافي طيارات غيرهم
اظطريت اني اغيرهم واحولهم ترانزيت..رياض ابو ظبي ابو ظبي كوالا كولا ابو ظبي ابو ظبي رياض
حوسه صح؟؟ شنسوي ؟؟ الحمدلله
ماعلينا يا اخوان
استفسارات بالنسبه لماليزيا
اولا: كم المسافه من مطار كوالا الى صن واي وكم متوسط تكلفة التكسي... ووين احصل التكاسي؟؟
ثانيا: بسافر بالطياره عن طريق ايراسيا للنكاوي..فندق برجايا...ابي اعرف كم يبعد الفيري عن برجايا ريسورت؟؟وكم متوسط سعر التكسي؟؟
لأني بسافر عن طريق الباخره لبينانق * ماحجزت لأن مافي موقع لهم فكم اسعار التذاكر وكم تاخذ وقت الباخره للوصول الى بينانق؟؟؟
ثالثا: كم المسافه من فندق بارك رويال بينينق الى فندق قولدن سندس باي شنجريلا؟؟ وكم يكلف التكسي تقريبا؟؟
رابعا:كم المسافه من قولدن سندس شانجريلا الى مطار بينينق؟؟لاني برجع لكوالا
اخيرا:كم المسافه من مطار كولا الى فندق تريدرس؟؟؟
ابي اعرف ياطويلين العمر::هل الفنادق تاخذ تأمين؟؟وكم التأمين؟؟
وابي اعرف الاسواق والاماكن السياحيه القريبه من الفنادق المذكوره
وبالنسبه للتكاسي..وين احصلهم بهالفنادق؟؟
وكم احتاج فلوس معي؟؟ مع اني ماراح اشري هدايا ولا شي..بس اكل وتنقل وملاهي ومشتريات بسيطه!!!
الله لايهينكم
تاريخ رحلتي 21 نوفمبر
كيف الجو هناك؟؟......لحد الان مالقيت احد يجاوبني
الكل يقول مائل للبراد والبعض يقول رطب والي يقول مطر!!!
محتاج رأي الخبراء الله لايهينكم
بليز ساعدوني الله يخليكم
تحياتي
اخوكم المتوهق:tomtit
بالتوفيق