مشرف
09-06-2022 - 08:11 am
كثير من الناس يرحلون لطلب الطبيعة الحسناء أو التسوق أو مشاهدة الآثار وهذه العينة قليلة من العرب وبعضهم لهم مأرب أخرى....لكن لم أر أحداً كتب عن مراكز التطوير التي قفزت بماليزيا هذه القفزات حتى صارت أحد النمور السبعة والتي ينتظرها غد مشرق أين خطط لهذ النهضة ما المشاريع القائمة ما الأفكار التي من الممكن أن نستفيد منها في بلادنا ما الأفكار التي ربما استطاع الأفراد نقل فكرتها بحيث تستفيد منها بلادنا........مراكز التدريب ... الجمعيات .....هل لكم أن تذكروا هذا؟
حياك الله اخوي مشرف وسؤالك جميل
الظاهر انك مسؤول ببلادنا عسى الله يعزها ويرفعها .
بغيت تعرف كيف وصلوا ...تقابل مع بنت صغيرة ماليزية
واسئلها عن بلدها وشف كيف جوابها ...رح تقول لك كيف
وصلوا وصاروا ...قبل ما خططوا تعلموا الاخلاص والحب
لوطنهم ...وماتلقى احد يقدم نفسه او اهله على بلده
فنادر ما تسمع اختلاسات او نهب لاموال الدولة .
القائد متعلم واعوانه متعلمين وشعبه متعلم وما احد
يصل لمنصب الا وهو قده ويستحقه .
تكاتفت اياديهم وصنعوا دولتهم بتوفيق الله .
اعراقهم مختلفة لكن قدروا يتجانسوا وبعضنا مازال
في جاهليته وحنا جميعاً مسلمين .
بالله خبرني وش تبغاني اقول ...والله احزن يوم اشوف
كيف مطارهم ومطار اندونيسيا وكيف مطاراتنا
وحنا نجيب اخواننا الاندونيسين يشتغلون عندنا .
هذه واجهة بلدنا وشف كيف شكلها ...والله استحي
استقبل ضيوفي من الدول الاخرى.. واخبرهم اننا بصدد
انشاء مطار جديد ...ميزانيتهم ثلث ميزانيتنا يا عالم .
حضرت مع دكتور جامعي تخطيط لمشروع ببوترا جايا
راح يسونه بعد 20 سنة ان شاء الله ...وحنا فاتحين
قسم التاريخ بالكلية وعارفين الشباب انهم لو تخرجوا
راح يجلسون في بيوتهم لين ما تجي بنت الحلال وتخطبه
ونكلمهم ويقولون طيب دكاترة التاريخ وين يروحون ؟!!
طيب والبشر والخلق هذولي ما فكرتم فيهم لاجل 30 شخص
ضيعتم المئات .....سوء تخطيط في كل شيء .
بعدها تقول لي وش نتعلم منهم ...ماودنا نتعلم ...
اليوم وبكرة يصير خير ...ياشيخ بالله تفكر في بكرة
هذا فكرهم ...شف وش سوينا في جوالات الكاميرا
والله فضائح ...يسئلني الماليزي والسانغفوري
بكم عندكم جوال الكاميرا اسوي نفسي ماسمعت السؤال
لاجل ما اتفشل ...وش اقول لهم ...ممنوعة ..بلا فضايح .
الله املنا ...والله عايش عليها ...والله اعشق بلدي واحبها
موت ...لكن والله من حبي ما ارضى لها اللي فيها ..
لكن وش اسوي ...الدعاء ...ولو اني مسؤول كان سويت .
اقلها احترموا المعاقين واصحاب الظروف الخاصة وخل
لهم مواقف جنب بوابات الاسواق لكن ...
رح لجامعة من جامعاتهم وشف كيف تخطيطهم .
رح لمراكز الشرطة والدفاع المدني وشف طريقتهم
في المعاملة وطريقة حياتهم .
امشي في شوارعهم فقط وستجد الكثير من الفوائد
اللي ان شاء الله ان طبقناها عندنا راح نطور .
يكفيك تروح بوتراجايا ...كل الوزرات جنب البعض
المعاملة تخلصها وانت تمشي برجلك وتتمشى .
والزحام خففوه لتلك المناطق الواسعة والشاسعة .
السر في الاخلاص ...هذه بلد وماهي شركة
واللي يحب يعطي وماوده يأخذ
لك تحياتي وتقديري اخي العزيز ....
والسلام عليكم