بالنسبة للفندق ممتاز .. من ناحية الموقع قريب من مطعمين عربين على الاقل .. ومطعم صيني مسلم ..
وقريب من سوق الحقائب و10 دقايق لشارع بكين لو ..
وفيه خدمات غسيل ملابس في الطابق الأخير بتحصله .. وفيه بقالة ...
وقريب من صراف مسلم
من ناحية الغرف والخدمات الي فيه بتحصل من كل شي .. بس ما فيه محول كهربا لو تشتريه افضل .. بو ثلاث فتحات نفس الي عدنا في الإمارات ..
أما من ناحية النظافة جيد جداً ..
فيه موقع كنت احجز منه اسمه http://www.ctrip.com ..
بالتوفيق..

بيض الله ويهك يا بو خلي

بس بو خلي
عندي استفسار بالنسبه للموقع هل هو مضمون ؟ ومجرب ؟
وهل الخصم من خلال بطاقة الفيزا أو بس تحجز وتدفع كاش للفندق من توصل ؟
وتسلم

ويهك أبيض ...
انا جربت الموقعين وكلهم ما عليهم كلام .. ما يخصمون اي مبالغ بس يضمنون حقهم اذا انت ما حضرت يخصمون .... لكن دفع الحجز يكون كاش لما تسوي شيك آوت
بس اذكر انه واحد من الموقعين ما ياخذ الفيزا يمكن ctrip..
يعني صار مرة حجزت وما رحت الفندق لسبب ما اتصلوا بي الموقع وقالوا انت حجزت وما حضرت صحيح ولا .. قلت لهم نعم .. قالوا بس تخبرنا مرة ثانية من وقت انه ما تبى ...
اهم شي تحفظ عندك رقم الحجز .. أول شي تحجز الغرفة وكم ليلة وعدد الاشخاص ..
بعدين تسجل البيانات تأكد انك تكتب نفس اسم الجواز بالضبط ..
بيطرشوا لك -الموقع- رسالة تأكيد بتحصل في أولها رقم التأكيد احفظه عندك .. هذا الرقم رسبشن الفندق بيسألك عنه وبيشوفون الجواز حتى يتأكدون أن الحجز باسمك ..

السلام عليكم ...
مثل ماقال بوخلي ... موقع ctrip ... يعطيك الخيار بين انك تستخدم الفيزا او لا ....
الشي الوحيد ... اذا كنت راح توصل الفندق بعد 6 مساءاً .... في هذي الحالة .. مايتأكد الحجز الا ببطاقة الائتمان ...
ماعدا ذلك ... فالامور طيبة ...

أنا فعلا حجزت عن طريق موقع ctrip على حسب مشورتكم الرائعه
وعطيتهم الفيزا كارد لأن موعد وصولي مساء.
وتم تاكيد الحجز بسعر جدا رائع في فندق (بارك فيو سكوير) Parkview Square Hotel
والأمور طيبه بفضل الله وفضل مشورتكم الحلوه .
أنزين بالنسبه للمواصلات من المطار الى الفندق ؟؟؟
هل ينفع اني اركب باص رقم 5 من المطار وانزل عند فندق شاينا هوتيل (ماريوت) أو المكان بيكون بعيد ؟؟
أو اني أخذ تكسي ؟؟ مع العلم بأننا شخصين فقط
في الأنتظار

بوسيف
ممكن تاخذ الباص وتوصل لشاينا هوتيل وبعدين تاخذ التاكسي .. هم قريبين من بعض .. بس انته شوف الراحة لكم .. يمكن في الذهاب انتوا خفاف وما عندكم مشكلة بس الرجعة بالتاكسي أشوف أفضل ..
وعلى العموم التاكسي من كوانزو بالتحديد فندق سينو -في نفس منطقة بارك فيوإلى المطار ..في وقت النهار .. خذته -طبعاً بعد ما خليت صديق صيني يكلم التاكسي- بسعر 120 رمبي بالضبط .. بس لو طلبت تاكسي بنفسي ما بياخذ اقل عن 200 رمبي ..
وما أنصحك نهائي تأخذ من أي شخص لا يسوق سيارة أجرة ... لا تأخذ من شخص عنده سيارة خاصة لأنه بينهبونك بيزات .. حتى بيزات الضرايب بيدفعوك اياها .. ويتفقون عليك وانت في الخط يغيرون رايهم ..

Bu5ale
تسلم أخوي Bu5ale
بس بالنسبه للتاكسي من المطار هل فيه شركه معينه أو تكاسي معينه من المطار وتكون معترف فيها (رسميه) ؟؟؟
لأني ما اذكر اني شفت شي خلال سفرتي الأخيره في عام 2007

بوسيف
نحن بالنسبة لنا استأجرنا سيارة خاصة بتحصل شركة في المطار .. ما رحت مع تكسي للأسف ..