احلى وقت واحلى جو واحلى شهر عسل وبالنسبه للزحمه ماتخف كثير عن موسم الصيف لان بعد رمضان يبلش موسم العرب بالاضافه الى الاوروبيين والاسعار ماتتغير بشكل ملحوظ

ألف مبروك مقدماً
وإن شاء الله تنبسط وتهنا
ابو ريفال

شكرا لكم على تجاوبكم
وياليت اشوف ردود اكثر تقنعني
شكرا مقدما

اوقات الله يجعل كل اوقاتك سعاده وهنا شنو تبي تعرف تايلند هي نفسها طول ال 12 شهر مع تغييرات بسيطه يعني الجو في اكتوبر موعد رحلتك يتحسن بشكل بسيط بالنسبه للرطوبه والامطار تصادف بالاسبوع مره او مرتين بشكل متقطع يعني مو مثل موسم الامطار والغرقه من شهر 4 الى 9 وبالنسبه للفنادق واسعارها فتقدر تدخل اي موقع حجز فنادق وتشوف بجانب سعر الغرفه ونوعها - وقت هذا السعر من تاريخ كذا الى كذا مثال : من 110 الى 2511 الغرفه ب 50 دولار ومن تاريخ 2511 الى 512009 يرتفع السعر لان وقت الهاي سيزون للكريسمس واحتفالات السنه الجديده فيكون مثلا بميه او ميه وعشرين دولار وبالنسبه للاكل فالاسعار اصلا مرتفعه من مده بس بشكل مو كبير وآخر شي تسأل عنه بتايلند هو الجو واسأل جميع الاعضاء من رواد تايلند في هالبلد ياما تشوف اربع فصول تمر عليك بيوم واحد بلد العجايب والله

شكرا لك اخوي ناسي جوازي
انا يهمني الجو كثير في ذي الفتره
وايش رايك بشهر عسل في تايلند
شكرا حبيبي

الجو في شهر اكتوبر او الان نفس الشي مناخ استوائي حر ورطوبه على مدار العام مايتغير فقط كمية الامطار
هي اللي تختلف باستثناء المناطق الشماليه
اختيار تايلند كشهر عسل قرار صائب وهي معروفه ومشهورة على مستوى العالم بذلك
تحياتي

اي يا اوقات ويارب تتهنى بشهر العسل وكل ايامكم عسل صافي بعد واختيار موفق لان تايلند يعني مو مثل الدول الاوروبية الحياة فيها هدوء ومنظمه وكل شي فيها يمشي مثل الانسان الآلي وكل حركة محسوبة لا ابدا تايلند غير فالواحد يكون على طبيعته وبساطته ومافي تكلف والحياة ماتتوقف بالليل والشوارع على مدار الساعه دايره وامان والغالي متوفر والرخيص متوفر والجوده مختلفه بكل شي ومافي مانع تاخذ فكره لدوله ثانيه بشرق آسيا وتخليها رحلة شهر عسل لدولتين او 3 دول لكن اذا مصمم على تايلند فقط فأكيد ان اختيار موفق وصحيح وابيك توصل بالسلامه وتتمتع ببلاد الابتسامه الساحره وتزودنا بتقرير بسيط وياريت مع الصور عن الرحله وتقبل تحياتي

اولا مشكور اخوي دولي 9 على تجاوبك معي
ومشكر للتوضيح
اخوي ناسي جوازي
ربي يهنيك ويسعدك ومشكور على لطفك
ياليت لو تعطيني برنامج بخطوط عريضه عشان احطها في بالي
وشاكر جدا لك

1. http://www.thailandgrandfestival.com/


2. http://www.pattayaphotoguide.com/


3. http://www.dininginthailand.com/restaurant12.asp


4. http://www.bangkok.com/shopping-mall/index.html

اوقات حبيبي مشكور عالكلام الطيب وبالنسبه للخطوط العريضه لبرنامج الرحله فالمده اعتقد شهر او اقل شوي وهذا يعني انك غير مرتبط بمده معينه قصيرة او قروب سفر تلتزم معاهم بالروحه والجيه وانك ملك نفسك ومعاك المدام طبعا تشاورها وتتفقون على برنامج كل يوم لحاله وبالنسبه للفعاليات للشهر اللي بتكون فيه هناك وهو اكتوبر فاقدملك هالموقع وهو مختص بالمهرجانات والمناسبات والعطل وماشابه وشوفه قبل لاتروح بيومين او يوم لان دايم التغير والتجديد حسب اليوم والشهر

http://www.thailandgrandfestival.com/

اذا كنتم من محبين الجزر والرحلات البحريه والجت سكي فخلي بوكيت اول وجهتك من اول يوم توصل وتقدر تقعد 10 ايام فيها وتاخذ العناوين والفنادق والاسعار من ساحة استفسارات بوكيت لاني مو من روادها(اخوك ادمان بانكوك وبتايا) وتقدر بعد هالمده تختار بين شنغماي او بتايا - الاولى للراحه والاستجمام أو الثانيه لتكملة مشوار الرحلات البحريه والهيصه مع العلم ان شنغماي مافيها بحر بس طبيعتها حلوه مثل ماسمعت والحين نكون خلصنا اسبوعين 10 في بوكيت و5 في شنغماي او بتايا وهذا موقع لبتايا رهيب وهو من احد الاخوان بالمنتدى الله يسلمه بس غريب وعجيب وكأنك تمشي في شوارعها وراح يسهل عليكم بالتأكيد لاختيار الفنادق المناسبه والاماكن المحببه اللي بتشوفونها

http://www.pattayaphotoguide.com/

واللي بقى من الرحله خلك في بانكوك وتكون منها العوده الى البلاد بالسلامه وبانكوك حلوه عشان تنهي آخر 10 ايام مثلا فيها , فالتسوق ورحلات السفاري والمطاعم العائمه بالنهر العظيم وعلى طاري المطاعم فطبعا المطاعم العربيه وبعض الهنديه تحصلها في منطقة نانا (منطقة العرب) واذا كنت تحب التغيير بمطاعم الوجبات السريعه فالاكل الحلال فقط في كنتاكي والباقي لا , وهذا موقع لمطاعم بانكوك بكل انواعها ولغاتها ومطابخها

http://www.dininginthailand.com/restaurant12.asp

اواخر الايام اكيد بيكون لكم للتسوق والهدايا للاهل والاصحاب وبتشوفون المجمعات الفخمه او المتوسطه او حتى الشعبيه وعشان اريحك هذا الموقع لجميع ماتم ذكره مع العناوين ونبذه عن كل مجمع ومركز تسوق في العاصمه بانكوك

http://www.bangkok.com/shopping-mall/index.html

وطبعا تايلاند بشكل عام كثيرة وسريعة التغيير من سنه وسنه ويمكن من شهر لشهر ولهالسبب انصحك دايما اذا وصلت اي فندق انك تراجع الاستقبال او المكتب السياحي إن وجد وتقولهم اني بشهر العسل واكثرهم عندهم برامج جاهزه ومطبوعه او ان الموظف ينصحك ببعض الاماكن والرحلات الجديده الموجوده عندهم ولاتحط في بالك ان كل الرحلات خارجيه بالعكس فالمتعه بالرحلات الداخليه يعني يجيكم الباص وفيه المجموعه اللي بتطلع الرحله معاكم من الفنادق الثانيه وياخذكم ويرجعكم برسم الخدمه وتقضون نهار كامل لطيف ومفيد بعد سواء للقصور الملكيه او المتاحف الحربيه او الاستعراضات المائيه او مصانع الالماس والمجوهرات والاحجار الكريمه او أي مكان ونشاط يخطر على بالكم فالمكاتب السياحيه هناك محترفه وغايتها توديك اي مكان تحب تشوفه وطبعا الكاميرا معاك لان مو كل يوم شهر عسل ومو كل مره تروح هالاماكن فالسفرات الجايه ممكن تروح مع اصحابك وتختصر الرحله على الجزر والبحر والتسوق والوناسه وعموما ابتعد قدر الامكان عن النرفزه والطبع الحاد لانهم بطبيعتهم يضحكون ويمزحون وروحهم حلوه بس مايحبون اللي يستعلي عليهم او يحط من شأنهم يعني باختصار خلك طبيعي وبالنسبه للشراء اضربلك مثل وانت افهم على اساسه شتسوي بالضبط يعني شفت شغله سألت عن السعر وقالك الف بات قوله 500 ولاتتحرك عند هالرقم وراح تشوفه ينزل معاك مثل ميزان اللحام حبه حبه واذا وصل 700 قوله 550 تبي ولا اروح ؟ تلقاه ياعيني ياخذلك كيس ويحط الغرض اللي تبيه وطبعا مو كلهم فالبعض القليل يكون بلهجتنا نحيس وماينزل لسعرك فتركه وامش عنه تلقى الغرض عند عشرين غيره ويارب اكون توفقت معاك ورحله سعيده وترجعون سالمين بحفظ الله