1. يوم واحد وطلعنا منه خ رحنا ناخذ أبو 1300

السلام عليكم
استفسار مدري وش يبي ومفروض احل الموضوع بيني وبين نفسي بس قلت اخذ مشورتكم افضل
انا حاليا مخططه لسفره لماليزيا بإذن الله على نهايه اغسطس ( بعد العيد بكم يوم )
طبعا شخصين .. انا وابو الشباب
والمده 15 يوم
انا للحين ماحجزت تذاكر ولا شي .. على امل انها ترخص شوي
بس اني جالسه اجمع معلومات عن مناطق وعن فنادق والخ ( كشكل مبدئي )
الصراحه الفنادق اغراء لابعد درجه أشياء تفتح النفس وأسعار معقوله ..
سؤالي بما ان السفره كلها فوق راسي ولازم أرتبها وأخلصها وأجيبها على طبق من ذهب
شرايكم هل تكون السفره اقتصاديه او فلة حجاج ؟
بمعنى .. هل احاول اقتصد في حجوزاتي للفنادق وتمشياتي او افلها ؟
ماليزيا لشخصين مقتدرين تكفيهم 20 ألف بالراحه شامله كل شي ( فله بس بشويش )
أنا الحين محتاره وبنفس الوقت مابي أغامر وأتوهق لأسباب :
الأول .. ان الواحد مهب مسافر الا في السنه حسنه .. هذا ان ماكان كل عشر سنين مره يعني راتب شهر مايضر يروح على الفرق اللي بوفره بين الاقتصاد والفله والفلوس وصخ دنيا
الثاني .. انها أول سفره لي مع رجلي برا الخليج ودي تكون غير ومتميزه
الثالث .. انا سبق وسافرت قريب سواء بالسعوديه او برا السعوديه .. واخر تجربه كانت مع فندق بالكويت سعره معقول 450 وجيد كفخامه بس مايوصل مستوى الفنادق الفخمه

يوم واحد وطلعنا منه خ رحنا ناخذ أبو 1300

مستوانا المادي عادي جداا بس نفسيا كذا ما احب اسافر واسكن بشي عادي وهو نفس الحكايه .. واصلا مافيه احد مايخق مع الفنادق الخقه بس حنا نعطي نفسنا وجه شوي
الثالث : ماتسوى اضيق ع نفسي بالسكن والبحث عن شي رخيص ومستواه عادي ودورات مياه تجيب الهم .. وسراير ومفارش مهدود والدي والدينها .. واخرتها الفرق 200 ريال على الليله .. صحيح انها تفرق في المجموع بس النفسيه اهم
بنفس الوقت .. انا سبق وسافرت مع اهلي لسيرلانكا وسكنا بفنادق 4 نجوم ( لانها هي المتوفره ببعض المناطق ) وكانت ولا أروع واسعارها بحدود 400 ريال
فما ادري هل ماليزيا نفس الحكايه ؟ يعني لو اسكن ب 3 نجوم بتكون فخمه وحلوه ؟
احيانا افكر يكون الحجز مابين وبين .. يعني مثلا بلنكاوي احجز شي معقول ويفتح النفس .. مهب لازم فورسيزون وطقته
وبكوالا فندق مرتب وسعره رخيص وعلى شارع العرب " بحكم ان جلستي فيه بتكون للنوم بس " ( اهم شي اذا خلصت من الدوران ارجع لشي يفتح النفس ويرد الروح )
والمناطق اللي بتكون جلستي فيها بالفندق اكثر من برا مثل الكاميرون مثلا .. اخذ شي متوسط سعره ..
وهكذا ....
فلذلك ..
لو فرضا قلت بسكن بفنادق الحد الأعلى لها 300 ريال شامله الضرايب والفطور وكل شي بيصير يكلفنا 4200 ريال
ولو خذنا فنادق ب500 إلى 600 ريال بتكلفنا الفنادق 8000 ريال
يعني فرق 4000 يسوى أو مايسوى ؟
ادري بتقولون هالشي راجع لميزانيتك والخ
اذا ع الميزانيه عز الله ماسافرنا الا للطايف
بس انا احسبها لان السفر مهب فنادق وبس .. التكاسي احس بتاكلنا اكل ... ودي اشحن سيارتنا اوفر
والاكل هين .. الفطور ع الفندق وبالعاده غدانا هو عشانا بالسفر .. والعشا احيانا نروح شي كشخه ونفلها واحيانا اشياء بسيطه نواشف وكذا ..
التمشيات ورسوم الدخول .. بما اننا ماراح ندخل مسابح وخرابيط فبيوفر علينا كثير .. وباقي الاماكن اشوف ان سعرها معقول مثل التلفريك وغيره
التسوق الحمد لله مانيب مفتونه فيه بس عاد لازم الواحد ياخذ من هناك الشي الغريب والحلو وهدايا للاهل
خلاص صجيتكم شكرا لصبركم علي لين نهايه الموضوع ..

• سؤال اخر شي

طيران الاتحاد حاليا التذكره لشخص 2800 ريال تنصحوني أصبر أو ماعاد فيه سعر أرخص من كذا ؟
لأني مشيكه ع الخطوط قبل كم يوم وكلها فوق 3200 للشخص :/
بس مدري ليش احس بعد كم يوم بتوصل لأقل من 2500 ريال !!!
خلصت