مساء الخير بالنسبة للسويكت مثل ما قالوا الاخوه يبداء من الخبر بلازا وبالنسبة للشرح المفصل بعد دخولكم من الجسر اذا وصلتوا عند مجمع الراشد يكون على يسارك وتوقف عن الاشاره الاولى اللي عند فينيسيا مول امشي على طول بعد ذي الاشاره لين توصل عند امارة محافظة الخبر تصير يمينك في مفرق لليوتيرن وبعدين يسير محل الكهرباء سوني والبا حق الساعات على يمينك بعده لف يمين بيجيك اواني ربات البيوت على يسارك تقريبا وسانيو وبعده بشوي حلويات سعد الدين على يمينك خلاص كذا وصلت هذا اول شارع السويكت بعد حلويات سعد الدين بيجيك مستشفى الدكتور فخري والراجحي بعده الخبر بلازا وهكذا انت وصلت الحمد لله على السلامه ....
السويكت يتميز = العبايات - الذهب - الاقمشة - الخياطين للملابس النسائية - خياطين للثياب الر جالية تقريبا قرب صيدلية الدواء - وطبعا محلات يابلاش ومشوار اشهر من نار على علم هذي محلات ابو ريالين واكثر وعليها دايم الزحمه - وطبعا الملابس والاحذية
وفي محلات طابا هذا كل شي بالسويكت تحت ظل محل واحد كبير مكيف واسعاره في متناول الايدي
وهذا موقعه خط الخبر الدمام بعد مفروشات العصفور وممكن توصل له اذا تعرف طريق الخبر - الدمام اللي يبداء من ابراج السبيعي وبنك البلاد تطلع على طول وخليك من تحت الكبري افضل لمن تجي اول اشاره بالخط بيجيكمDhl شركة النقل على يسارك لف مع الاشاره يسار وطبعا بسير الشركه يسار طبعا من ظهر الشركه وتطلع على طول في شركة سفريات هناك امشي على طول لين تشوف طابا على يسارك .
اسفه طولت بس حبيت اخدمكك يا اهل البحرين الحبيبه وبالنسبه للدمام ما عرفها والله

mzoon
مشكورة إختي على الوصف الدقيق والمفصل ،
هذا من طيبش ماقصرتين والله ، هذا عشمنا فيكم يا أهل السعودية على طول تحبون تساعدون ، وبالنسبة لمحل طابا أتذكر سمعت عنه وإنه أسعاره مناسبة أتذكر جفته لما كنا طالعين من كوبرشندني وواصلنا سيدا وكان على يسارنا وكأنه جرير بلازا على اليمين
على نفس الشارع !

شارع سويكت مشهور بالعبايات والقماش
قماش العبايات روعه عندهم خصوصا محل الاميره روعه روعه روعه واسعار خياليه وايد رخيص
اذا بتروحين حبيبتي قوليلي بوصيج على كم وحده
والموضه هالسنه العبايات لي فيهم حياكه والمخرمين والموديلات تكون بالاكمام بس
ما ادل مكانه لاني من لكويت وفيه محل قهوه عربيه روعه اسمه البايوني اخذي منها ماراح تتحسفين

على كثرر روحاتي للخبر والدمام اول مره اسمع عن هالشارع

ههه بنت لندن أنا صبي مو بنت
بس نستفيد من هالمعلومات لبعض الأشخاص مشكورة
+
وليد سلطان : إن شاء الله تعرفه عما قريب

السلام ،
اليوم حبيت أستفسر منكم عن أسواق الخبر و الدمام ( الشرقية ) :
بالنسبة للخبر ياما سمعت عن شارع السويكت وعن الأماكن المختلفة فيه وإنه أشهر من نار على علم ،
بس موقعه وين بالضبط ؟ أنا عندي خبرة لا بأس فيها بشوارع الشرقية بس ممكن يتسهل الوصف لأنه سمعت أنه الخبر بلازا يوجد بشارع السويكت ولما سويت سيرج في الnokia maps حصلت الخبر بلازا
يعني أقدر أقول أمشي على الخريطة وبوصل للسويكت أو إذا بتشرحون لي موقعه على راحتكم وإذا فيه معلم مشهور قريب منه يقدر يدلني عليه ؟ إذا وصلت للخبر بلازا شلون أعرف وين يبدي الطريق ( سؤال ههه يضحك ) !
شنو بالنسبة لأسعار هذا السوق ؟
أقدر أحصل فانيلات وبانطلونات جينز بأسعار مناسبة ، أدري مو ماركات بس المهم جديدة
وتكون حلوة ؟
في أماكن في شارع السويكت تنصحون فيها ، وشنو الأوقات اللي يكونون فاتحين فيها في رمضان ؟
الصبح ، الليل مع الوقت بالضبط ؟
في سوق غير السويكت ، وغير سوق الدمام المعروف يعني يكون مناسب ومتوفر فيه أنواع الملابس
( أقصد خاصة مناطق الشرقية ) !
ومشكورين يامسافرينا ومسافراتنا !

الخبر بلازا موجود في شارع السويكت .. و يعتبر اوله تقريباً ..
بس السويكت مشهور بالعبايات .. و ما اعتقد فيه ملابس الا يمكن كم محل عادي ..
الخبر بلازا يمكن فيه محلات زي ما تبي بس مو متأكده لاني من زمان ما دخلته ..
بالنسبه لباقي المحلات الرجاليه ان شاء الله يفيدونك فيها الشباب

بالنسبه للسويكت مشهوور بمحلات الأقمشة وخاصة أقمشة السهرات

هلا بالبحرين وأهلها
أخوي كأنك تدري أن سؤالك يضحك
لأن مجمع الخبر بلازا على شارع السويكت نفسه
بالنسبة لمحلات الملابس
نصيحتي لك روح لمجمع الدانة في الدمام
عند سوق الدمام
راح تحصل هناك محلات بأسعار مناسبة
فيه محل هناك بالدور الثاني لأصحاب المقاسات الصعبه :112:
Xxx......إلخ
المهم ياخوي لاتنسى وانت داخل السوق تقول دعاء السوق فالأجر المترتب عليه كبير جدا
ودعاء السوق هو ما ثبت في سن الترمذي وغيره أن رسول الله صلى الله عليه وسلم قال " من دخل السوق فقال لا إله إلا الله وحده لا شريك له له الملك وله الحمد يحيي ويميت وهو حي لا يموت بيده الخير وهو على كل شيء قدير كتب الله له ألف ألف حسنة ومحا عنه ألف ألف سيئة ورفع له ألف ألف درجة " .
ألف ألف يعني مليون
وتخيل مليون حسنة تجيك
ومليون سئية تمحا عنك
ةمليون درجة ترفع لك
ما أحلمك وأرحمك ياربي