وعليكم السلام والرحمة ..
المناخ في ماليزيا استوائي على مدار السنة وفي شهر 12 قد تكثر الامطار لا اكثر يعني لا تبحث عن البرودة بها
دمت بسلام ..
ابوعمر

ابوعمر يسعد مساك ابي رايك الشخصي بس هل ماليزيا بهالوقت مناسبه
اذا لا وين تنصحني اقضي شهر العسل
الله يعطيك العافيه
ما خاب من استشار

ومساك يا غالي ...
ماليزيا تعتبر حلوة علىمدار السنة لكن يعيبها في شهر 12 غلائ الاسعار وذلك في كل مناطق العالم نظرا لان شهر12 يوافق اخر شهور السنة ((هاي سيزن)) خصوصا الفنادق ...
اي خدمة اخرى حياك الله

صح كلامك بديه السنه الجديده يكون غالي
بس السوال اللي يتوطى في بطن نفسه
من متى تبدى الزياده في الاسعار بالعربي
انا بروح ان شاء الله من 5 الى 20_ 12
هل هذا الوقت يكون غالي والا كيف الوضع تراني مسافر مبتدئ الا مسافر في التمهيدي
يعني قبل بدايه السنه الجديده بكون قد رجعت وش رايك
الله يوفقك يارب
تصدق بديت اعرف سر من اسرار نجاح هذا المنتدى
اكيد السر وجود اعضاء ومشرفين متعاونين وبالهم وسيع مثلك يابو عمر
وشكرا

احرجتني بكريم اخلاقك وانا خالك .. والتميز دايم يكون بتواجد امثالك الطيبة ..
التي دائما تدفعنا لمزيداً من العطاء ..
الهاي سيزن يبدأمن شهر 10 يعني شهر 12 من بدايته مولع بالاسعار مافي فكه ...
واي استفسار اخر حاضر عند مواضيع في توقيعي تفيدك خصوصا لو حاب مزيدا من الاطلاع والاستفسار عندك موضوع (معلومات قد تفيدك قب سفرك ..)) خصوصا لوحاب نكون معك خطوطة خطوة بالرنامج ونشوف لك كم تطلع التكاليف بالتفصيل الملل ..
ابو عمر

ايه والله يابو عمر انا ودي اضبط برنامج عسل لشهر العسل
وانا ما اشتركت في منتداكم الا عشان نستفيد من خبراتكم
بروح للرابط واشوف وما نستغني عن خدماتك تراني شايل هم الموضوع هذا من الحين
مع اني بسافر بشهر 12 وداخل عشان اعرف اكبر كميه من المعلومات قبل اطب هناك
واهم شي التكلفه طبعا انا حاط ميزانيه مليون ريال للسفره هذي
طبعا صرفت منها الحين 500 الف ورديت كم سلف تسلفته تقريبا 300 الف
وسلفت واحد 100 الف وبتزوج بالباقي اذا كفت
واذا جيت اسافر ما في حل الا اتسلف
الله يسهل
من جد الحسابات مهمه عشان الواحد وضعه من البدايه
المنتدى هذا اكيد بيفيدني وما نستغني يابو عمر

c a n d l e
الي يبحث عن البروده لايفكر في ماليزيا ،،
وانا اشوف ان شهر 12 في ماليزيا حلو للعرسان ان شاء الله ،، واغلبية الي يسافرون ماليزيا من الخليجيين في هالوقت يكونون عرسان ،، والباقي اوروبيين ،، خصوصا شهر 1 ، 2 ماتلاقي غير السياح الاوروبيين والعرسان الخليجيين ،،
والله يوفقكم ويهنيكم ،،

Coco Chanel
أولاً ألف مبروك على الزواج والله يوفقك
ثانياً الجو في شهر 12 زي شهر 6 كله جو واحد لأن ماليزيا تقع في منطقة إستوائية يعني الجز رطوبة ومطر على طول السنة
وبالنسبه لأسعار الهاي سيزون وال سيزون فهي متغيرة على حسب الفندق(تقدر تحددلي الفنادق اللي ناوي تروحها وأنا أحددلك إذا كانت هاي أو لو سيزون) لكن الغالب أن الفترة اللي بتسافر فيها تكون الأسعار عادية يعني لو / ودايما الأسعار تكون غالية في الصيف فقط من بداية 6 إلى شهر 9 وتقدر تستفيد من المكاتب اللي تسوي عروض في فترة الو سيزون علشان تحرك السوق الراكد في شهر 12 بس المشكلة إنك راح تلاقي صعوبة في الإمكانية وارتفاع بسيط في ليلة 26/12 ويوم 1/1
أما الباقي فالأسعار عادية
وطبعاُ لاتنسى الأعياد الرسمية والفورملا ون اللي تخلي الأسعار نار

انا سافرت ماليزيا شهر 12 عايله ولا عرسان ولا شي فيها عوايل بس مو كثير ولا شفنا الا الصينيين اللي لوعوا كبودنا بقلة ادبهم وعلى فكره احنا اكلنا مقلب كبير بروحتنا بهالوقت بالذات ولا احد نصحنا!!!!
كثير من اعضاء المنتدى نسوا ينبهون بعض عليه
الا وهو السنه الصينيه الجديده مدري رحنا وكانت ماليزيا كنك في الصين وكنت مستنكره وش ذا محد قال لنا ان الصينيين بالهبل كذا بعدين اغلبهم مراهقين وجايين قروبات وتعال شف من قلت الادب والمصاخه
المهم المقلب حقنا وشو ؟؟؟؟؟ صار العيد حق راس السنه الصينيه واحنا في كوالا والله من زين الحظ كل شارع العرب قفلوه والمجمعات قفلوها وحاطين اوراق على بوابات المولات بمناسبة العيد نقفل 3 ايام وبعضهم 4 ايام
ومافتح الا سوق واحد بس السينما فيه اما الباقي مسكر والله قهر راحت علينا كوالا ماشفنا فيها شي وبيننغ بعد اخر يوم لنا فيها صكت محلاتهم عشان هالعيد وجنتنق الملاهي زحمة صينيين ياكثرهم كنهم نمل رحنا من الصبح لين المغرب والله ماركبنا الا لعبه وحده قرف وقفنا عندها ساعه وربع من طول الطابور وتعبت وجلست بالارض وكانوا يجلسون عيالهم جنبي ويستأذنون يصورونهم معي ؟؟ تحفه يحسبوني معلم عشان العبايه والنقاب وبعد وحده بلنكاوي ابلشتني لين صورت معها بعباتي ونقابي شكلهم اول مره يشوفون عرب على الطبيعه
ويوم عيدهم فجروا روسنا بالجرس حقهم من اول الفجر طخ طخ طخ طخ بالشارع وقرع بهالطبول
اخوي حاول تعرف عيدهم متى وتحاشاه نصيحة مجرب والله قهر