- بصراحه قرب موعد السفر وجا على بالي مواقف كثيرة واجهتني في الطياره
بصراحه قرب موعد السفر وجا على بالي مواقف كثيرة واجهتني في الطياره
قلت اطرح هذا الموضوع في المنتدى ونشوف وش أهم وأخطر وأطرف المواقف اللي مرت على المسافرين لأني بصراحه خذت موقف من الطياره بعد سالفه صارت لي الصيف الماضي , أنا ببدأ في موقف صارلي وأنتظر من الأعضاء تسجيل مواقفهم في هذا الموضوع .
الموقف صارلي الصيف الماضي وتحديداً في شهر أغسطس/2006م طلبت مني زوجتي نسافر أسبوع للقاهرة ورفضت بسبب إنها حامل في شهرها الرابع وكان هذا أول مولود لي , قلتلها فيه خطر عليك في الطياره وحنا مو مضطرين لها السفره خليها بعد ما الولادة .
المهم صارت تحاول فيني وقالت طيب وش رايك ناخذ رأي الطبيبه اذا قالت ما فيه مانع سافرنا قلت طيب وانا متأكد ان الطبيبه بترفض المهم سألناها قالت عادي الشهر الرابع مسموح السفر فيه :112:
بعدها رتبت السفر وطلعنا على الخطوط السعوديه ( قوتني ووافقت ) لما أقلعت الطياره بعد 10 دقائق اعلن الكابتن عن مطبات هوائية كثيفه ستواجه الرحله ( هنا بدأ الخوف ) وصارت الطياره تهتز في الجو بشكل مو طبيعي وأنا يدي على قلبي عشان الجنين , وفعلاً صارت زوجتي تتألم ( وتستفرغ اعزكم الله ) وصا يجيها زي الدوخه المهم على هذي الحال تقريباً نصف ساعه بعدين هدأت الرحلة ونامت زوجتي
بعد ما وصلنا القاهره كنت ساكن في فندق القراند حياة خليت زوجتي ترتاح على ظهرها يومين كاملة ما تتحرك ( والأهم في الموضوع إن الجنين صار ما يتحرك ولا نسمع له صوت ) لأن هذيك الفترة قبل ما نروح القاهره كان الجنين يتحرك في بطنها , وشلت هم وتحسفت على السفره , لكن بعد يومين الحمدلله تحرك الجنين وكأن الدنيا ضحكت لي من جديد , بس باقي الرجعه والحمدلله رجعت وكانت العودة أخف بشوي
لذلك قررت ما فيه سفر وقت الحمل أبداً .
الأخ الفاضل / قاطع سبيت
الحمد لله ، ربك سترها ، وإن شاء الله نفرح بأصغر مسافر عربي ..!!
من أطرف وأحرج المواقف ، حدثت في أغسطس 2004 على الخطوط الجوية الإيطالية أثناء ذهابي إلى برلين / ألمانيا لحضور مؤتمر دولي هناك ، الطائرة هبطت ترانزيت بإيطاليا ومنها استكملنا الرحلة ، وبعد الوصول لبرلين ، اكتشفت ضياع حقيبة السفر ..!!
قمت بالإبلاغ وإثبات الحالة ، لكن ما الحل وكل ملابسي الرسمية بالحقيبة المفقودة ، والمؤتمر باكر ، أضطررت للذهاب "كاجوال" ..!! ، وقابلت زملائي .. وبعد ماعرفوا قصتي ، كل واحد يريد التبرع يقطعة ملابس ..!! طبعاً شكرت الجميع واعتذرت عن عدم قبول هذه التبرعات لاختلاف الأحجام والمقاسات ، وقمت بشراء بعض المستلزمات البديلة ..
وفين .. وبعد إنقضاء 5 أيام ، وصلت الحقيبة المفقودة وعليها لاصق الشركة الناقلة يفيد بوصولها لكازبلانكا/المغرب .. وردها لإيطاليا .. ثم إرسالها لي بألمانيا ..
ولم تنته القصة هنا ..
بل اكتملت فصولها عند العودة بسبب العفش الزائد ، بسبب ما أضطررت لشرائه من ملابس وأحذية وأدوات شخصية ..إلخ .. وبعد "الهوشة" ، أعتذر المسئول عن الوزن بعدما عرف بالسالفة وأطلع على البلاغ المحرر بمطار برلين ..
شكراً على هذا الموضوع
ونلتقي بكم على خير
تحياتي ومحبتي للجميع