1. حتى يوم من الايام فطرنا فوق الطاوله ههه ..

السلام عليكم ..
اخواني اخواتي ..
التقرير عن رحله الى مراكش ..
لم يكن لها حساب ولم تكن هناك اي خطط تجاه هذه السفره اتت مفاجئه خبط لزق ههه وهذي حلاتها بيني وبينكم ..
كان يزن على صديق عزيز مثلكم وشرواكم على السفر الى المغرب وانا كنت متردد واتفقنا انا وهو على تاريخ معين لنفترض بعد 20 يوم ..
ذهبت وكان صديقي معي الى مكتب الخطوط الجويه الاماراتيه وكان في النيه السفر بعد 20 يوم ونريد الحجز لكي نضمن الرحله ذهاب وعوده ..
هنا الصاعقه كان اليوم المساء ودون اي حساب او تخطيط اصبحت الرحله غدا ههه يعني شي يصرقع وين يمديك تضبط الشنطه وتودي الملابس الغسيل ..
وفي ذاك اليوم دخل اسمي في موسوعت قنس حيث انجزت جميع اعمالي في ضرف 4 ساعات ههه اكيد حق السفره لو تقولي حق البيت او الاهل اقول بعدين يوم ثاني ..
اتصالات صاحبي على مراكش تم حجز الشقه مع المواصلات من المطار الى مراكش لانه صاحبي زار مراكش اكثر من مره ولاكن انا الجديد على المغرب بكاملها ..
اقلعت الطائره من مطار الكويت الدولي الى مطار دبي الدولي في الساعه 4 صباحا وكان هناك ترانزيت ساعه ونص ومن دبي الى كازا ولاكن تفاجئة بشئ ..
هو خط سير الرحله من دبي الى كازا صدمني والله حيث اقلع من دبي في اتجاها ايران ومن بعد تركيا ومن بعد بلغاريا وبعدين اثينا وبعدين روما وبعدين تونس الجزائر كازا مدة الرحله 9 ساعات طلع براسي فقع ..
وصلنا الى مطار محمد الخامس وانا من النوع اللي احب استكشف قالي صاحبي عطني جوازك قلتله لا خلني انا اتعامل معاهم قال بكيفك ..
اخذت الجواز ورحت حق اللي يختم الجواز قالي شنو هديتي ياخي قلتله مو جايب معاي هديه لاني اول مره اجي المغرب وماعرف فيها احد علشان اجيبله هديه طالعني وسكت ..
ختم الجواز وطلعت حق اللي يشيك على الجواز وراه وصاحبي يقولي يامجنون لا يعطلونك قلتله ماعليك فيني او ماوصلت خذا الجواز قالي ختمته قلتله ايه قالي وهديتي قلتله نسيتها مره ثانيه ذكرني علشان لا انسى قالي شلون اذكرك وانا ماعرف رقمك تيلفونك ولا اعرفك ويضحك يعني انا بنظره غبي قلتله خلاص يعني ماتعرفني ليش اعطيك هديه واحلى تأخيره في المطار ساعتين ههه وصاحبي يسبني من بعيد ويقولي انا اعلمك ..
المهم مشاني لانه لازم يمشيني مو بكيفه وشايل هم النجره اللحين مع صاحبي #
طلعنا من التفتيش بعد معاناة التفتيش ..
رحنا الكافي اللي برى وقعدنا نشرب قهوه لمن جانا صاحب الشقه اللي يبي يوصلنا الشقه في مراكش وكان اتفاقنا معاه 800 درهم لتوصيله الى مراكش اعتقد سعر معقول لبعد المسافه قليلا ..
وصلنا مراكش ههه ودي انزل من الطاكسي على قولت حبايبي المغربين واتمشى لقيت كافي حلو قلت وقف خلنا ناخذ قهوه قالي صاحبي لاحقين يا حبيبي قلتله انت شلون اهلك يحبونك غريبه غثيث ههه ..
وصلنا الشقه وركض انا اول واحد دخلت شكله قال صاحب الشقه شنو الاهبل هذا انا وين ابتلشت فيه تدرون ليش اركض علشان احجز الغرفه الحلوه وفعلا لقد كانت من غنائمي اجمل غرفه ههه ..
كانت الشقه في قليز اقامة ناديه دور ارضي فيها حديقه حلوه وغرفتين وحمام اعزكم الله ومطبخ وصاله وطاولة بلياردو ..

حتى يوم من الايام فطرنا فوق الطاوله ههه ..

اكتشفت شئ خطير في الشقه وهو سخان الماء كان مايمديك تتحمم 5 دقايق يخلص الماي الحار قلت للساخن تعال ابيك بسالفه حبيبي ..
رحت المطبخ جبت سكين لا تخافون ماكنت ابي اذبحه لا كنت ابي افتح التماتيك من تحت فتحته فيه جوك مثل الدقمه حمره هذي التماتيك هم يحطونها على اقل شي علشان توفر كهرباء ولعيون الشباب خليتها تصفق الميه شارع قليز كل يتحمم عندنا وللحين السخان يقول جيبولي هاتولي ..
نومت ثلاث ساعات انا مسميها نومت المطرود وقمت عيوني عيون السروق احوم بشقه خذيتلي دش وطلعت ملابسي من الشنطه وكلمت الحارس قلتله جيبلنا عشاء قال اوكي قلتله ابي خفايف جبن وبيض قال خلاص وجابلنا ..
تعشينا ولبسنا وكشخنا وربي مطربين مو سياح كويتين قيمت ملابسي في الشنطه اكثر من فلوس السفره كلها ..
طلعنا العطر بط راس الحارس قال صاحبي يالله نبي نروح النخيل في التحديد # قلتله لا لا اليوم نبي نروح مكان ثاني ههه قالي انت اول مره تجي واول يوم اي مكان ثاني تبيه لا تجنني وضحكت بوجهه قلتله ياخي ابي اثبت وجودي بس مو اكثر ..
رحنا # حيث انني من عشاق السهر دخلنا # اه اه اه # وخذينا طاوله وقاعد مبتسم انا تقول حاظر مسرحيه وتمسك معاي ابي اغنية مانيش ريداه لصباح وغناها المغني وبعد شوي قلت للمغني ياخي غني غنيتي قال غنيتها قلتله ماسمعتها كنت اشم هواء بره غناها وطلبتها بعد ثالث مره انجن قالي بس كافي قلتله ابي احفضها صاحبي فصل ضحك طلع الببسي من خشمه ههه ..
طلعنا من # على الشقه ونحن مبتسمين والسبب من الابتسامه غير معروف الى هذه اللحظه السبب مجهول ههه ..
صحينا من بكرا الساعه 3 العصر وبدلنا ملابسنا وطلعنا طبعن لبسنا ملابس رياضيه بلوفر ودرنق رياضي وطلعنا حرقنا شوارع مراكش مشي زين ماوصلنا مكناس ههه لدرجة نوقف في الماي يطلع دخان ..
ورحنا جامع الفنا وانا كلي حذر من السحره امشي واتلفت وراي صورت الحيه قالي راعي الحيه عطني فلوس قلتله انا صورت الحيه ماصورتك قالي الحيه مالتي قلتله اعطيك فلوس بس بشرط تعطيها الحيه قالي اوكي عطيته الفلوس قلتله حطها عند الحيه اللحين صاحبي فاقد ضحك حطهم عند الحيه قلتله بعد شوي اجيك قالي خلاص اتوقع سبني لاني حسيت ضهري يحكني ..
رحنا تمشينا وانا راد مريته وانقز من بين الناس واطالع ولا الفلوس مو موجوده قلتله وين الفلوس عصب علي والله لو ماهديت الموقف ومشيت كان هد الحيايه اللي عنده علي ..
انا والله ماقصد اني انرفز اللي جدامي بس يعني من باب المداعبه مو اكثر ..
رجعنا الشقه طبعا اعزكم الله بدلت زيت وفلتر للجوتي مالي ههه اللعن خيره مشي ..
ريحنا شوي وقعدنا اخذنا دش جميل ورائع طبعا مع الشامبو الرائع دوف وصابونت ديتول ههه وفرش اسنانك واللبس وحط عطر ومر على الحارس وبط راسه بط في العطور والمسكين مغير عيونه تلاقط ..
اليوم طلعنا بكير شوي ورحنا مطعم الصراحه حلو حلو لبعد حد شئ راقي وجميل هو ديجي ومطعم وبار كل شي اسمه # ..
وبعده على # ونحن نبتسم والاسباب ايضا مجهوله .. ههه ..
وبعدين الشقه ومن بكرا اتصل علينا واحد عجيب انا مسميه كنز المعلومات في وقت وزمان قلنا روحو السكره قلناله اوكي رحنا السكره وكانت الصراحه عامره وحلوه القعده فيها واحلى قهوه في الحليب والشاي المغربي # ..
وطلعنا من السكره ورحنا الشقه قلنا اليوم نبي دسكو ورحنا # في فندق # وكان الصراحه عامر لانه كان يوم الويك اند واحلى الدوده والرجعه مالت مايكل جاكسون ههه لا اتغشمر معاكم ..
طلعنا الشقه وعلى الموال هذا سهر العصر تمشي المغرب قهاوي نرجع الشقه نبدل والى السهره ونرجع انام ومن بكرا نفس العمليه ..
احبائي ..
الاماكن الحلوه هناك في مراكش ..
سهرة # ..
مطعم وبار # ..
مطعم وبار # ..
ديسكو # ..
قهوة السكره ..
جامع الفنا ..
واماكن اخرى ولاكن لا تحضرني الان ..
وفي الاخير اطلب منكم السموحه اذا قصرت او زودتها شوي في التقرير بس حبيت اني ماخلي شي في السفره الا واذكره لكم ..
على العموم هذه سفرتي الى مراكش بين يديكم ..
اخوكم : سندباد كويتي