بسم الله نبدأ
رحلتي 15 يوم
0في النمسا _ 4 سويسرا_ يوم اخير في المانيا
احاول اذكر بعض الامور اللي حصلت لنا يمكن احد يستفيد ويتفاداها
:: الخطوط القطريه نظامهم باصات ما عندهم خرطوش متصل بالطائره. تنزل درج تركب الباص يوديك للطياره وبعدين تصعد سلم الطائره. نظام قديم ومتعب
:: موقع القطريه على النت ممتاز فيه خدمة اصدار البوردنق قبل 36 ساعه من الاقلاع ويسمح باختيار المقاعد واذا معك طفل رضيع يختار لك بشكل تلقائي في الصف 10 المعد للرضع .
:: في مطار ميونخ الشنط تطلع في سير حسب رقم الرحله الا الاغراض الكبيره مثل عربة الاطفال الحجم الكبير تطلع في سير رقم 7 أ . يعني اذا ماطلع لك غرض رح السير 7أ تلقاه هناك
::موظف شركة سكست لتأجير السيارات شاف الاغراض قال السياره الوسط اللي اخترها بالنت ماتشيل اغراضك واقترح علي سياره اكبر شوي وقير اتوماتيك بزياده 10 يورو وافقت. وفعلا يادوب دخلت الاغراض بالسياره
:: الاطفال اللي طولهم اقل من 150 سم بغض النظر عن العمر يحتاجون قطعه سفنج ترفعهم شوي لمن يستخدمون الحزام العادي . هالقطعه يأجرونها عليك ب 4 يورو باليوم. ممكن توفر هالمبلغ وتجلس الطفل على اي منشفه عندك او ملابس ترفعه تقوم بالواجب
:: التأمين الشامل اللي لو ترجع لهم السياره معدومه ولا تتحمل شي ( صفر) قيمته عند كاونتر سكست ب 500 يورو. وعندهم نوع ثاني تدفع 270 يورو واذا صار على السياره شي اكثر مبلغ تتحمله 800 يورو. بالنسبه لي ما ناسبني ولا عرض . ربنا يعديها على خير . امين
:: السياره اودي اي 4 ديزل جديده ماشاء الله عداد 11كم لكن المشكله خبرتي بالالماني صفر ماعرفت اشغلها ولاحد حولي يشرح . بعد ربع ساعه من المحاولات شافني واحد عامل بالمواقف وعلمني كيف تشتغل. بنفس الوقت تضغط المفتاح مع البريك تشتغل. والهاند بريك زر جنب القير لازم النور الاحمر يختفي قبل لا تسوق.
:: بعد ماعرفنا كيف تشتغل الاودي ومشيت مسافه وقفت عن اشاره والا طفت السياره لحالها وابتدا القلق اش فيها السياره؟! . وجلست على هالموال كل ما طفت ارجع اشغلها بالطريقه الاولى بعدين عرفت من نفسي ان بس ارفع رجلي من البريك تشتغل لحالها. بديت احب التقنيه الالمانيه يعني وقت الانتظار عند الاشارات ليه تصرف دراهم وتلوث البيئه؟ كلام كبير
:: لازم توقف في محطه قبل لاتدخل النمسا وتشتري ستيكر الطريق وتلصقه بشكل واضح والشرطه يشيكون عليه اكيد في نقاط التفتيش ما ادري بكم بس اقل من 10 يورو وصلاحيته 10 ايام
هذا اللي عندي للان وباذن الله اذا جد جديد اذكره هنا