1. 2- توفير المواصلات والوجبات لشمولها بالبرنامج السياحي المعد مسبقا


2. 3- حجوزات الفنادق والخطه كلها مرسومه مسبقاً.


3. وقعدنا على طاولة .. (( لاوالله عيل العاده وين الناس يقعدون )) :112:


4. المهم

--------------------------------------------------------------------------------
بسم الله الرحمن الرحيم
وبه نستعين ....
بعد تفكير طويل وتقليب المنتديات بدون اتخاذ قرار معين لاي بلده سنسافر كنا محتارين اين وكيف نسافر ..؟
واخيرا وبما ان الوقت مر بسرعة من دون ان نقرر الى اين نسافر ... قررنا ان نذهب مع قروب سياحي
1- نوفر الوقت الخاص بالبحث عن معلومات واماكن سياحيه

2- توفير المواصلات والوجبات لشمولها بالبرنامج السياحي المعد مسبقا

3- حجوزات الفنادق والخطه كلها مرسومه مسبقاً.

المهم ... كلمنا مسؤل الرحلات وبالغصب حصل لنا مكان لرحلة عنوانها (( افضل مافي النمسا وسويسرا))لمشاهدة الرحلة كاملة بدأً بالنمسا ارجاء الضغط هنا (( هو بيني وبينكم احسن تروحون تشوفون السالفة كاملة من البداية https://artravelers.com/p/re/219105 (( رحلة اليوم السادس ((إلى سويسرا ))
مخطط الرحلة اليوم كالتالي ...
الخروج من سالزبورغ والتوجه الى المانيا مدينة انسبورغ ثم الدخول الي سويسرا والى مدينة سانت مورتز ..بالمناسبة .. نسيت اخبركم بمعنى اسم مدينة سالزبورغ ....
كلمة اصلها الماني تتكون من شقين سالز - بورغ = قلعة الملح
سالز = ملح
بورغ = قلعة او قصراليوم كان الجو بارد ... و طول مااحنا نمشي نشوف درجة الحرارة في الشاشة الي في مقدمة الباص تنخفض ...
الطريق يعتبر اسهر و اقرب ان دخلنا المانيا ومنها الى سويسرا (( سانت مورتز)) .. كانت وجهتنا الاولى الى مدينة انسبرغ الالمانية .. والطريق كان كلماله يزين ويحلى ..

والمطر بدأ ينزل ويزيد .. والجو كلماله ويبرد ... شيء رائع واخيرا بنستخدم المضلات

واخيرا وصلنا الى انسبرغ .. والجو بارد وممطر شوفونا شلون ماشيين بالمظلات ..

عبود اخوي مااخذ مظلته معاه .. فتبرعت له بمضلتي .. مب حباً فيه او حباً في التضحية ... بل لان عندي فقر مطر...

مشينا في الممرات متجهين جهة السطح الذهبي المشهور في هذه المنطقة .. الى ان وصلنا له وانا بصراحة لهيت مع المطر والبرد والسوالف ومانتبهت للمرشد شيقول عن السقف الذهبي وايش المميز فيه ..

اتجهنا الى محل شوارفسكي وعطونا كوربون هدية مجانية عند شراء اي شي ..

دخلنا المحل .. والكريستالات تهبل حلوه اشكال والوان اعجبوني جدا جدا جدا

بعدين تمشينا في المدينة وشرينا اشياء و شوكلت والمطر تقولون رشاش يصب على راسنا (( ماشاء الله عالتعبير )) ... بعد ماتجولنا جوله حره في انسبرغ .. ركبنا الباص وواصلنا مسيرنا اتجاه سانت مورتز ..

والجو كل ماله يبرد اكثر واكثر والطبيعه تزين ازين وازين ... توقفنا عند مطعم مثل المطعم القديم الي اكلنا فيه معكرونه لذيذه ...

المطعم من داخل ..

وعاد احنا طمعنا نبي معكرونه مثل ذاك اليوم .. بس مالقينا معكرونه بصلصة المشروم .. فيه بالصلصة الحمراء .. قلنا يالله نجرب وحطينا عليهامشروم ..

بس طعمها كان كلش مب حلو بس الحمدالله عالنعمة ..
وبعد الاكل و اصلنا المسير والمناظر الحلوه تهل علينا ..

شوفو القمة .. يوجد برج ..

وهذه الصور الاخيره قبل دخول سويسرا الرائعة ..

يا سلام

الله ياسويسرا مازلتي في خاطري ..

كانت درجة الحرارة 6 سليزي الجو بارد ومطر وشي حلو .. وصلنا سانت مورتز .. الى فندق مونوبول Monopol الفندق حلو جدا وموقعه حلو بس فيه عيب رسمي ... كانت غرفتنا مطله على الشارع الامامي للفندق وفي الليل السكارا الله ياخذهم ماخلوني انام .. داقين هالخمر ويصارخون في الشارع ويغنون سندروني الله يسندرهم .. ولا الفندق رائع
هاي صورة لغرفة النوم

كلمة راس :- الحمام وانتو بكرامه رائع ...
هاي الفندق من الخارج

هاي المنظر من دريشة الغرفة (( الشارع الي كانو السكارا فيه واذو خلق الله النايمين ))

بعد ماقعدنا شوي في الفندق نزلنا .. نتمشى تحت المطر في شوارع وبين محلات سانت مورتز السويسريه الرائعة ..

مادري ليش حبيت هالمدينة وايد احسها مثل الخيال ..

شفنا محل شوكلت ودش في خاطري ادخل واشتري واذوق الشوكالا السويسريه ... م يميميمييمي شوكلتهم لذيذ احبه

ياربي خاطري اطب وسطه واكله كله بلقمة واحده

الخنفسانه الشهيه

احب الكافي (( يعني شوكلت بالقطري **))

هاي النوع .. ايهبل شريت لي ولربعي بس كلته كله حتى الي حق ربعي كلته ..

آآآآآآآآآآآآآآآآآآه ليتني شاريه كيلو من هالكافي الزين ... طلعنا من هالمحل اللذيذ الشهي وكملنا تمشي بين البوتيكات والمحلات و الشوارع والحواري

الساعة صارت ست ونصف واحنا عندنا حفلة عشاء الساعة 7 .. فرحنا الفندق صالة الطعام ..
ودخلنا وهم يصورون الا اقول لهم ستوب ويت فور مي .... وصفيت معاهم ويالله صورو ..
كان الكل تقريبا موجود ..

وقعدنا على طاولة .. (( لاوالله عيل العاده وين الناس يقعدون )) :112:

المهم

قعدنا على طاولة وحدة مع الدكتور الهندي وزوجته و في هاليوم عبرو لنا عن مشاعر الابوه والامومه الي يكنونها لنا .. و سولفو لنا ابنائهم الي بنفس اعمارنا وتكلمنا عن الممثلين الهنود وعن حياتهم في كاليفورنيا وعن مدى تشابه ثقافاتنا وعاداتنا في الهند والخليج ومدى ترابطنا منذ الازل

كان العشى عباره عن خنزير × خنزير .. بس احنا مخبرين مدير الرحلة ايريك مسبقاً ان احنا ماناكل خنزير .. فجهز لنا وجبة خاصة عباره عن دياي مشوي وشوربة طماط لنا وللمعاريس السعوديين بس سهمهم راح للدكتور الهندي وزوجته الي قاعدين معانا بنفس الطاوله و المعاريس كلو خنزير ياحرام .. بس ماكملوه كلو لقمة واكتشفو الظاهر انه خنزير وطلعو من المطعم ..
ماعلينا منهم ...
هاي الشوربه ..

وهاي الطبق الرأيسي دجاج مشوي باباربكيو سوس وفلفل التاباسكو من بابو جي الدكتور الهندي هو الي طلبه وعلمنا عليه ماقصر

واخر شي السويت ..

وبعدين رحنا ننام ... بس ماقدرت انام والسبه السكارا (( اذيتكم معاهم صح لانهم ماخلوني انام بسعاده ))
وللحديث بقية ... بس في قسم سويسرا ...