- دلوقتي اللي عايز ينزل الإسماعيلية لو هيزور مصر ....
دلوقتي اللي عايز ينزل الإسماعيلية لو هيزور مصر ....
طبعا لو هتنزلوا في مطار القاهرة ... والوجهة انكم تنزلوا الاسماعيلية مباشرة فالأفضل هو الأتوبيس ( البولمان ) لأنه انظف واحسن وسيلة واكترها راحة من بين كل وسائل السفر . .. تقريبا سعر التذكرة بين السبعة والعشرة جنيهات .. ده كان من سنة ونص .. مش فاكر دلوقتي التذكرة بكام بس اكيد هتكون في نفس السعر ..
اول ما هتنزلوا في محطة الأتوبيس في الإسماعيلية .. هتلاقوا امامكم مجموعة تاكسي .. اختاروا اي تاكسي وطبعا لو هتنزلوا في فندق مش هيكون هناك احسن من فندق ميركيور .. لانه احسن واشهر فندق في الإسماعيلية .... تكلفة التاكسي مش تزيد عن 3 جنيهات ... ولو طلب اكتر اياك توافق لانها مش هتتكلف اكتر من 3 جنيهات .. .
طبعا هتوصل الفندق .... والمسافة بين محطة الأتوبيس والفندق بالسيارة مش تزيد عن خمس او عشر دقايق ..
بعد ما تنزل بالفندق وكله يكون تمام ... طبعا هتكون عايز تعرف اماكن الخروج ... في نوادي وكافيهات لذيذة اوي اوي ... بالنسبة للنادي من اجمل النوادي .. نادي اسمه نادي الشاطئ .. احنا بنطلق عليه هنا لقب نادي الدانفا .. . يعني لو هتروح بتاكسي اقوله نادي الدانفا مش نادي الشاطئ ... وبصراحة الي هيكون في فندق ميركيور مش لازم يركب تاكسي ليه خالص .. لان الفندق والنادي في طريق واحد وهو طريق النمرة 6 ... والمسافة بينهم 10 دقايق مشي على الاقدام ... وده احسن للتمتع بالخضرة والهواء النقي ... وهي رياضة كمان .. ولا انتوا ايه رأيكم ؟
لو في بالكم انكم تزوروا متحف الإسماعيلية ... فهو قريب جدا جدا جدا من فندق ميركيور .. والمسافة بينه وبين الفندق خمس دقايق برده على الأقدام .. بس في الإتجاه المعاكس لاتجاه الدانفا ... يعني الفندق موقعه كويس جدا جد جدا . . وهو في طريق مقاطع مع طريق النمرة 6 اسمه شارع محمد على ..
دلوقتي ... انتم عايزين تنزلوا تتسوقوا او عايزين تنزلوا تشوفوا البلد وأهل البلد ... والله مش في أحسن من مكانين في رأيي علشان تشوفوا البلد كويس :
1 - شارع السلطان حسن ... المسافة بينه وبين ميركيور 15 دقيقة على الأقدام وفي نفس اتجاه المتحف .. لكن المتحف قبله . ونصيحتي ان شارع السلطان حسين بيكون في أحسن حالاته يوم الخميس ... لان كل الناس بتخرج يوم الخميس.. فتحسوا ان في حياة في الطريق ..
بالنسبة لشارع السلطان حسين .. هتلاقوا فيه مطاعم ومحلات ملابس .وتلات سينمات ( هنتكلم عنهم ) وطبعا كراسي جلوس .. وهتلاقوا شهر محلين تصوير . كوداك وفوجي فيلم هناك .. وفي فندق كمان بس مش في شهرة ميكيور . وفيه كمان اكبر سوبر ماركت في الإسماعيلية وهو مترو ماركت وهناك في كل شئ ممكن تحتاجوه من اكل وشرب . بإختصار .. عصب الإسماعيلية هو السلطان حسين .. على فكرة اسمه القديم السلطان حسين .. ودلوقتي اسمه شارع الثورة .. بس ولا واحد يعرف انه اسمه الثورة ...
2 - طريق البلاجات .. وده طريق مخصوص في الشواطئ على بحيرة التمساح .. وفيه الكافيهات ..بالنسية للشواطئ مش ارشح اي شاطئ منها لانها مش هتكون كويسة ... انا مش احب اروحها ...فما بالكم انتم يا سياح ؟؟؟
وبالنسبة للكافيهات فهي معظمها ان مش كان كلها جميلة اوي اوي .. وتنقسم حسب الحالة ... يعني لو كنت عايز تجلس في كافيه للهدوء فقط ..يعني يكون كافيه هادئ .. فهناك العديد من الكافيهات هادئة ... ومن اشهرها كافيه .. مون لايت .. جاك .. فونتانا .. فيينا
ولو كان الإختيار لكافيه تجمع شبابي .. فهناك اكتر من كافيه منهم : cute cafe' ... الساقية ... الشلال ..
طبعا في اكتر من عشر كافيهات هلى طريق البلاجات لدرجة اني مش فاكر اسمائهم كلهم ..
في اخر طريق البلاجات ... في نادي البولينج وهو مكان يعتبر كويس اوي لهواة البولينج ..
المهم دلوقتي .. التكلفة للتاكسي من شارع السلطان حسين لطريق البلاجات 5 جنيهات .. ولو هيكمل للبولينج يبقى ممكن يوصل لسبعة جنيه .... بس حاولوا ان يكون الذهاب للبولينج في النهار لأن بالليل ممكن مش يكون هناك تاكسيات .. لانها تعتبر في اخر طريق المدينة يعني بالأصح اصبحتم خارج المدينة ...
بالنسبة للجري والمشي .. هناك اكتر من مكان مخصصين للجري مثل ما قلت في موضوع سابق ... ومن اشهرهم طريق النمرة 6 .. ومجموعة حدائق اسمها .. جناين الملاحة ... وجناين الملاحة دي مثل central park في نيويورك .. من حيث المساحة ومن حيث الخضرة فيها .. يستحسن ان الواحد مش بحاول انه ينزل الملاحة بالليل لان بالليل الإنارة مش عالية اوي .. وبيكون مش هناك اي حد موجود .. يعني نسبة الأمن بالليل مش عالية اوي ...
بالنسبة للسينما .. أحسن سينمتين في الإسماعيلية هم .. سينما رينسانس وسينما دنيا .. وان كانت سينما رينسانس هي الأحسن والأشهر من حيث النظام والراحة والصوت الصورة عاليين جدا جد جدا ... التذاكر في رينسانس للفرد الواحد 10 جنيهات ونفس السعر في دنيا ....
سعر التاكسي من السلطان حسين لرينسانس 2 جنيه .. ومش يوجد لدنيا اي تاكسي .. لانها في نفس السلطان حسين .. بس اسألوا اي واحد ماشي في السلطان حسين على سينما دنيا وهو هيقولكم ... وبالنسبة لرينسانس المسافة على القدم حوالي خمس دقايق من شارع السلطان حسين بس طبعا انا مش هعرف اقولكم عليها لانه معقدة مش طريق مباشر ...
دلوقتي أتمنى اني اكون أفدتكم في الموضوع ده وأتمنى فعلا ان أي واحد لو هيزور مصر يحاول انه ينزل الإسماعيلية انها فعلا تستحق لقب باريس الصغرى عن جدارة .. لانها اجمل بلد في مصر كلها من شمالها لجنوبها ومن شرقها لغربها ..
ودلوقتي دي صور لمجموعة مناطق في الإسماعيلية :1 - مجموعة من البيوت على شارع محمد على : (ومن ضمنها صورة لمسجد ابو بطر الصديق اكبر مسجد في الإسماعيلية ) :
2 - شارع السلطان حسين وميدان الممر :3 - ميدان عرابي ومحطة القطار : http://www.ismailiaonline.com/images/ismailia/8small.jpg
4 - صور سمجد أبو بكر الصديق :5 - حديقة الملاحة : http://www.ismailiaonline.com/images/ismailia/2small.jpg
6 - قصر ثقافة الإسماعيلية :7 - نادي البولينج : http://www.ismailiaonline.com/images/ismailia/22small.jpg
8 - فندق ميركيور :ودوقتي انا خصلت كلامي ومش لاقي حاجة تانية . . وعذرا للإطالة ... أتمنى اني اكون افدتكم وما أكون قصرت في شئ
مسجد أبو بكر الصديق