احلى حكايه
10-09-2022 - 08:22 am
احبتي المسافرون السلام عليكم ورحمة الله وبركاته .....
انطلاقا من ثقتي المفرطة بخبراتكم ...... ارجو منكم تقديم الرأي والمشورة فحجزي انا وعائلتي إلى ماليزيا يوم 24 اكتوبر وعودتي 5 نوفمبر ..... ارجو من اصحاب الباع الطويل في هذا المجال تقديم جزء من خبراتهم في :
1- توزيع ايام الرحلة .
2- المساعدة في اختيار الفنادق في تلك المدن.
3- تحديد ابرز الفعاليات .
4- نصائح عامة وارشادات.
5- تكلفة الفنادق والمعيشة والتنقلات التقريبية .
مع خالص شكري وتقديري..
إذا إقلاعكم يوم 24 اكتوبر و عودتكم يوم 5 نوفمبر معناه عندكم 11 ليله
لو زودتوها ليله كان تقسم الجدول مظبوط و 14 ليله احلي
عموما الجدول الأفضل يعتمد عليكم ماحددتوا وش المدن او الجزر اللي ترغبون فيها
ليلتين سيلانقور -- فندق الصن واي لاقون
ثلاث ليال لنكاوي -- فندق الويستن
ثلاث ليال بينانق -- فندق البارك رويال او القولدن ساندس
ثلاث ليال كوالالمبور -- فندق تريدرز غرفه مطله علي البرجين او الويستن وسط شارع العرب والأسواق والمطاعم
اما لو مابتلعبون في سيلانقور في الألعاب المائيه و تبون فندق ببركة سباحه خاصه داخل الغرفه
فالجدول ممكن يصير
ليله بورت ديكسون -- فندق قراند ليكزس كان اسمه وترهومز إنترناشيونال
ثلاث ليال لنكاوي -- فندق الويستن
ثلاث ليال بينانق -- فندق البارك رويال او القولدن ساندس
اربع ليال كوالالمبور -- فندق تريدرز غرفه مطله علي البرجين او الويستن وسط شارع العرب والأسواق والمطاعم
وهو الجدول اللي اشوفه انسب لكم
والخيارات كثير ممكن تلغون بينانق لو ماتحبون الشواطئ والأنشطه البحريه
و تكتفون بلنكاوي هدؤ خاصه في الليل ولا حركه بس في الفندق
بالنسبه للمواقع اللي تسحتق الزياره
شوف الرابط وموجود فيه جميع المواقع و الأماكن اللي تستحق الزياره
وانا بأقولك أهم الأماكن وأكيد فيه غيرها الكثير
في سيلانقور
ملاهي الصن واي لاقون المائيه وسوق البيراميد هذي أهم مافي سيلانقور
ولو عندك وقت ممكن تمر الماينز ويندر لاند مع انها عاديه وممكن بعد تزور مدينة الأضواء
لنكاوي
أهم شي رحلة المناقروف البحريه تحجزها من المطار او من نفس الفندق او من مرسي السفن
قارب خاص من 250 الي 300 رنقت تقريبا لمدة ثلاث الي اربع ساعات
وعندك في لنكاوي تلفريك لنكاوي وقريب منه شلالات الأبار السبعه الطلوع لها شوي متعب بس رياضه
وبعد عندك ميدان النسر وحديقة ليجندا والأسواق القريبه منه ممكن تروح له علي نهاية العصر وتشوف الغروب
وحديقة الفواكه وتاخذ جوله في المدينه لو حبيت
وقريب فندق البلانجي بيتش عالم تحت البحار ولو بتزور اللي بكوالالمبور فهو يكفي وافضل اقصد اللي بكوالالمبور
وفيه أماكن ثانيه مثل التماسيح وغيرها نصيحه انا أعتبرها مضيعة للوقت والمال فخلك بشاطئ الفندق وفعالياته افضل
وبالنسبه لبينانق
اهم شي في بينانق شاطئ الباتو فرنجي خلك فيه عصريا
من بعد صلاة العصر الي بعد صلاة المغرب كل الفعاليات والألعاب البحريه موجوده فيه ومسابح الفندق
وفي الليل عندك السوق الليلي هو سوق عادي جدا لكن التمشيه بالشارع في الليل مش بطاله
وعندك في بينانق هضبة بينانق وفي طريقها فيه محل لبيع القهوه والشوكلاته السواق بيوديك اصلا لأن له عموله
وفي بينانق حدائق مثل الفراشات والتوابل والقرود لو انت من محبي الحدائق وفيه مجمع وسوق جيرني بلازا
قريب منه بيتزا هت ومطعم تشيليز وعندك مجمع كوينسبي بعيد من شاطئ الباتوفرنجي وجيرني بلازا يغني عنه
وفي بينانق بعد رحله بحريه لشاطئ القرود مع الغداء ورحلة المانقروف في لنكاوي تغني عن اللي ببينانق
ونصيحه محلات مثل الذهب والأقمشه مضيعة وقت ومال مالها داعي تروح لها وفي بينانق حديقة فواكه لو رحت بلنكاوي كفايه
وبالنسبه لكوالالمبور
الأماكن كثير عندك اهم شي البرجين ومجمع سواريا وحديقة البرجين بعد العصر جميله جدا جدا
وفي نفس منطقة البرجين عالم تحت البحار لو مارحت للي بلنكاوي تروح له وهو افضل
وفي كوالالمبور شارع العرب في الليل أسواق ومطاعم ومقاهي وحركه ووناسه
وتخصص يوم لجينتنق من الصبح للمساء وعندك مجمع التايم سكوير يستحق الزياره سوق والعاب وفندق وعندك برج المناره
وبالنسبه للحدائق لو تحبها عندك حدائق الفراشات والطيور والزهو تروح لهم بنفس الوقت مع حديقة بردانا
وفيه ياطويل العمر حديقة الحيوان حلوه مش كبيره ولو بتروح لها تروح لشلالات تمبلر بارك مو بعيد مره منها
وهي شلالات مريحه الطلوع لها سهل مو متعب
وعندك منطقة بوتراجايا منطقة الحكومه الجديده لو عندك وقت فاضي ممكن تروح لها منطقه جميله وهادئه اغلبها مباني
حديثه حكوميه وفي الرجعه ممكن تنزل بمجمع الميدفالي ميقامول من اكبر المجمعات في آسيا
وعندك أفاموسا انا والله ماحبها ولكن ممكن تعجبك فيها عروض كابوي وسفاري وحديقه بسيطه وحاجات ثانيه
يبي لها يوم كامل وهي خارج كوالالمبور بحدود ساعه ونص
وفيه اماكن كثيره اكيد اني ناسيها ولكن انا ذكرت الأهم
https://artravelers.com/p/re/452938
بالنسبه للتكلفه المعيشه والتنقلات والأكل والألعاب يعتمد علي الواحد بس
المتعارف عليه من 300 الي 600 رنقت يوميا مرات تزيد ومرات تنقص كل يوم يختلف
وشوفوا هالرابط ممتاز جدا جدا بتستفيدون منه إن شاء الله
https://artravelers.com/p/re/620514