سؤال ثاني ولاتهونون اخواني الاحبه واخواتي الفاضلات
ممكن رقم سايق محترم يستقبلنا بالمطار ويودينا على طول فندق فرياس بدون لفلفه واستغلال
وكذلك سؤال خاص للاخت الكريمه غدير : شو الاماكن الحلوه اللي تفضلها الحريم في بومباي
لاني مسافر مع الاهل وماريد ام عبدالله تنصدم من الرحله
وبصراحه يكفينا انا والعيال الاستمتاع بالمطر وخيرات الله والاكلات الهدنيه اللي نحبها وخصوصا البرياني
وصلونة السمج الهنديه لكن خبرك الحريم غير وهذي فرصه كلها 4 او 5 ايام وراجعين ان شاء الله بس بغيت
اعرف شوهي افضل الاماكن في بومباي من ناحيه التسوق والتمشيه غير المعابد والمتاحف والحدائق العامه ؟
والسؤال كذلك موجه للعموم ولكل من عنده خبره وحب يساعدنا ولكم منا الدعاء والشكر الجزيل
وابشروا بتقرير طيب بإذن الله واللي يامرنا بشي من هناك لايرده الا لسانه

اخي الكريم ليتك تغير وجهتك الى كيرلا او منطقة هماتشل لان بومباي من وجهة نظري لاتنفع للسياحة

شا شا
اخوي الكريم / اختي الكريمه / شاشاتسلم ويزاك الله خير على النصيحه الغاليه
احنا ودنا بومباي لاننا زرنا بنغلور سابقا وحبينا نغير شوي
بس اخوي الكريم هل سبق وزرت بومباي ؟
لان معظم الاصدقاء اللي سالفت وياهم عن بومباي مدحوها ويقولون احلى من كيرلا من ناحيه الاسواق
والمطاعم وحيويه المنطقه وبالعكس عن كيرلا الي تشتهر بالطبيعه والركود والملل في حالة اطالة مده البقاء
يعني الحيويه والفرفشه ليلا ونهارا موجود في بومباي
والله اعلى واعلم

1. عندك مول اسمه اتاريا ومول اسمه بيج بلازا ومول اسمه بنزر


2. والماكدونلدز موجود بشارع كلابه 5 دقايق مشي من فرياس


3. ومحل البيتزا تروحله بالحنطور على شارع جباتي

ههه احنا بعد راح ننزل بفندق فرياس تاريخ 4/7
اما بالنسبه لبومباي انا ماسرتلها من 13 سنه لكن سويت بحث جامد عند صديقاتي بالنسبه لاماكن التسوق دقيقه اييب النوته وارجع
يبتها ،،،
رووح ييبلك ورقه وقلم واكتب وياي
بسم الله الرحمن الرحيم
عندك للعود ودهن العود والجلابيات العربيه: محل اجمل، محل هريس، محل عطاري، المدينه، ولاتحاتي هالمحلات كلهم حذال فرياس يادوب خطوتين، محل اسمه ان شاءالله ماشاءالله (هذا اتذكره عدل يوم كنت صغيره).
للبس الهندي الساري والبنجابي ولبسات كاجوال: شيتل يبعد عن الفندق والروحه بالتكسي تقريبا نص ساعه
للشوز والصنادل المحلات راح تلقاها على الشوارع اللي على حذال ميترو بلازا بعد تسيرله مشي حذال الفندق.
بالنسبه للمولات إذا ام عبدالله تحب الماركات فعليها بفندق التاج لانها راح تلقى محلات فندي وبربريز ويقولون اسعارهم اقل من اسعار الماركات بدبي

عندك مول اسمه اتاريا ومول اسمه بيج بلازا ومول اسمه بنزر

ومحل آمر سنس وهو فالاصل اسمه عامر سنس (يعني اولاد عامر) هذا المحل اتذكره عدل فيه اشياء روعه للصوغه والهدايا من اكسسوارات وشنط ولبس اطفال والله العظيم اتذكر اني اشتريت اكسسوارات في سنة 97 كنت بالاعدادي ولين اليوم لونهم ما تغير كانهم ذهب صدقي.
اما بالنسبه للمطاعم عندك: كافيتريا جبل النور (نظام الكافتيريا العاديه اللي عندنا سندويجات وعصاير)
مطعم خيبر صاحب المطعم ايراني عايش في الهند اكلهم حلو
مطعم دلهي دربار هذا معروف عند كل الامارتيين احلى ماعندهم( البرياني والتشكن كاري، والبراتا، والفالودا)
مطعم ايديل شكله مايشجع بس اكله نظيف تاخذ الطلب من عنده وتروح الفندق القعدات اللي عندهم مش ولا بد بس احلى ماعندهم الدياي المشوي وخبز البراتا

والماكدونلدز موجود بشارع كلابه 5 دقايق مشي من فرياس

ومحل البيتزا تروحله بالحنطور على شارع جباتي

واجمالياً بومباي للتسوق والعلاج الله يبعد عنكم الامراض، ممتازه جداً واللي يحب يروح يشوف الاماكن السياحيه كطبيعه يروح كندالا ساعتين وشوي تقدر تروح مع عائلتك من الصبح وترجع المغرب،، ان شاءالله تستانس ام عبدالله ويستانسون الاولاد واذا عندك اي سؤال انا حاضره

ماركة دبي
اختي الغاليه ماركة دبي
عسى الله يوفقج ويبارك فيش ( فيك ) ههه
ماشاء الله من 13 سنه وللحين في الذاكره ماقصرتي ماخليتي شي الا واطريتيه
اتمنى لكم سفره سعيده والله يكون معاكم ويرجعكم بالسلامه
شجعتيني الصراحه حسبت اني الوحيد في بومباي الله يهداه اخوي شاشا روعني
الحين خلاص معزمين وبنكتب الي قلتيه كله وبنسيره واحد واحد ان شاء الله
مشكوره وماقصرتي

هلا اخويه ههه عيبتني (فيش نحنا ننطقها بالجيم مو بالشين يعني فيج)
موفقين ان شاءالله
وسلامي لاختي ام عبدالله

الله يسلمج اختيه ماركة دبي
وام عبد الله تبلغج تحياتها الحاره وتتمنى تشوفج لو صدفه في بومبي ههه
سلمي على الشيبه والله يوفقكم ان شاء الله

تمام انتوا سايرين قبلنا خبر يارتي ام عبدالله تترياني ههه

ماركة دبي
يارتج تترياج في فرياس ومجهزه لكم حلوى من شويطر ههه
بس لاتنسونا بالمالح قباب من دبا الحصن او الفجيره
سعيد بمرورج اختي الله يطول بعمرج