مساء الخير
اسأل الله سبحانه وتعالى ان يتقبل من الجميع الصيام والقيام والدعاء
جاء على بالي اني احرك البوابة شوي بس مو بتقرير ولا موضوع
لا
بشيء مختلف بس محبوب لدى الكثير من محبي وزوار الأردن الشقيق وهو
المنسف الأردني
حبيت اعرض عليكم طبخي للمنسف بس على طريقتي
وعساه يعجبكم
إقتراح
.. يا ليت الدخول يكون بعد الفطور لأني غير مسؤول عن اي إضطرابات في البطون او سيلان في اللعاب ..
المنسف
اكلة لذيذة وهي معروفة ومشهورة في ديار الهاشميين
واهم مكوناتها هو
الجميد او البقل او الإقط
وافضل جميد للمنسف هو
الجميد الكركي ( نسبة إلى محافظة الكرك الأردنية )
اطيب وألذ منسف ممكن الواحد يأكله بالأردن عند واحد من اهل الكرك الكرام وخاصة اذا اللي تطبخه ختيارة او عجوز البيت
اوف
تقعد يومين ما تشتهي الأكل ولا تدوره ههه
انا ولأنه ما عندي من هالجميد اخذت بقل من الديرة وهو يعني تقدرون تقولون انه قريب من الجميد شكلآ وطعمآ
وهذا هو
في البداية لابد من تنقيعه بماء فاتر حتى يتفتفت ويرجع لمواده الأولية ( السائلة )
وممكن بعد ما تنقعه بساعة ( اكثر اقل ) تدخله الثلاجة وتخليه لثاني يوم ما عليه خوف
ثاني يوم
( يعني اذا إشتهيت المنسف لازم تشتهيه قبلها بيوم عشان تقدر تطبخه )
تطلع الجميد من الثلاجة تفتفته تفتفت وتفغصه تفغص وتتوطاه توطي وتدوس فرته دوس
طبعا كل هالحركات باليد
ثم تضربه ضربة معتبرة واخيرة بالخلاط حتى يصبح سائل كاللبن
وعاد على كيفك اذا تبيه ثقيل او اذا تبيه خفيف تزود الماء وهو جالس بالخلاط حتى يطلع مثل ما انت تبي
وهذا هو الأفندي بعد ما ضربته الضربة اللي انتم خابرينها بالخلاط
وانا خليته ثقيل شوي
الرز
نبدأ بالطبخة
اللحمة بالقدر
وبعد ما تقلبها شوي مع البصل تضيف البهارات والماء
وفيه ملاحظة مهمة وهي
انك ما تكثر الملح لأن الجميد اللي راح تصبه على اللحم هو بالأصل مالح ويمكن يكون جدآ جدآ مالح
لذلك خفف من الملح واذا نقص ممكن تزيده بس بآخر شيء
بعد شوي تشيل من الزفر
وهذا الرز بقدر ثاني
نطل طلة محترمة على اللحيمات
طيب نشوف الرزيزات
اوه
تمام التمام
والرز لا بهارات ولا مطيبات ما غير
ملح وشوية كركم
ما دام الرز خلصنا منه واللحم قرب يستوي
خلونا نسخن الجميد السائل لأنه من الأفضل تصبه على اللحم وهو ساخن
وبرضوا وانت تسخنه اذا تبيه اكثر سيولة بس زود عليه كم نقطة ماء دافية
وبعد ما يبدأ الجميد يطبخ تشيله وتبدأ تصبه على اللحم والقدر فوق النار
بس تصب بشويش ورجاءآ بدون إزعاج
اقصد شوي شوي لما تشوف الماء بدأ يثقل خلاص وقف صب وخل الباقي عند التقديم
وكذا راح يصير لون مرقة اللحم
ويبدأ اللحم يأخذ من لون ونكهة وطعامة الجميد
نبدأ بتزيين طبق التقديم
وهذا عندي امر ضروري ومهم ويمكن اهم من الطبخة
وعلى قولة المثل الشامي
العين بتاكل أبل التم
وبصحن التقديم تفرش خبزة صاجة متعوب وموصى عليها
وطبعا على حسب صحنك مد خبزتك
وفيه خبيزات صاجات اكبر من كذا ويمكن كبر هذي مرتين
بس للأسف هذي صرنا ما نشوفها إلا في بلاد الأردن لأن صحون التقديم عندهم كبيرة
ثم تسكب الرز وفوقه اللحم والمكسرات
وبصحن عميق تصب باقي الجميد السائل وتضيف له
نقطتين زيت زيتون وشوية بقدونس ناعم
وهذا الصحن لابد منه عشان تصب منه على الرز
لأنه هو سر نكهة المنسف ويعطيه طعم غير
وهذا طبق المنسف صار جاهز
يا خوي شيل خبزتك
وش هالحركات
ابشروا لعيونكم بس
راح اشيل هالخبيزة اللزيزة
وهذا المنسف يطل عليكم
طلة ولا احلى
طيب قرب بس شوي
وهذا هو سر النكهة
صحن الجميد بزيت الزيتون والبقدونس
اصبروا ما خلصنا
هذا منسف ثاني بيوم ثاني بس بدون خبيزات وتراه فوق البيعة يعني ما هو محسوب
اتمنى يعجبكم ودمتم سالمين