السلام عليكم ورحمه الهه وبركاته
ارحب بجميع القراء
هذا تقريري عن رحلتنا لسويسرا من الفتره
30/6/2007 الى 19/7/2007
مده الرحله 19 يوم
وحنا أثنين بالغين وطفلين 4و5 سنوات
اولا خط السير
الرياض-ابو ظبي-جنيف-انترلكن-جنيف-ابوظبي-الرياض
على طيران اتحاد الامارات
صراحه هالطيران رهيب
احسن من الخطوط السعوديه بكثير
وش تبي بس عشان يخدمونك مو مثل السعوديه
بس انه متعب خاصه اذا جلست في المطار ترانزيت 8 ساعات وانت دايخ وفيك النوم تعب
كان موعد الاقلاع من الرياض الساعه اربع ونصف صباحا بعد صلاه الفجر مباشره واطفالي معي نايمين من الساعه ثلاث
وكانت مده الرحله تقريبا ساعه وشوي
وصلنا لأبوظبي تقريبا الساعه7 صباحا بفارق التوقيت

وجلسنا على الكراسي للانتظار
وبناتي ناموا جنبي وانا راسي كل شوي مايل اسرق الغفوات
وحنا كنا نبي ناخذ اوتيل ننام فيه بس اوتيل المطار كان فل
ونخاف اذا طلعنا لابوظبي اننا نتاخر على الرحله وتفوتنا
لان المطار بعييد عن وسط المدينه
قلنا نجلس ونوكل امرنا لله
والساعه الثانيه عشر ظهرا
قمنا وصلينا الظهر والعصر
ورحنا تغدينا في مطعم بالمطار
والاقلاع لجنيف الساعه الثانيه والنصف ظهرا
ركبنا الطائره بس ما جانا النوم أنا وزوجي مدري ليه؟؟
استمرت الرحلة 6 ساعات
وصلنا جنيف وأخذنا الشنط
وطلعنا من المطار والساعة ثمان ونصف مساء بتوقيت جنيف
وكان الجو مشمس وحلو
واخذنا تاكسي وذهبنا للفندق
فندق الشرشل

هذا هو من برى

وهذا اللوبي
بصراحه حليو
ثلاث نجوم
بس نظيف ومرتب
واخذناه ب570ريال

ماخذين غرفتين لنا وللبنات
وهذا دوره المياه الله يكرمكم نظيفه وحلوه

وكانت الصدمه ان المكتب في الرياض ماقالو لهم اننا نبي كونكت
وعطونا غرف منفصله
الفندق مليان ولافيه غرف مفتوحات على بعض
وفاضيه
والمكتب اللي في الرياض يقول حاجزين كونكت وانهم ردو وقالو ايه موافقين وهم نصابيين
وكلنا امرنا لله
ونمنا من التعب والارهاق
اليوم الاول
رحنا نفطر(الفطور تبع الفندق)
ونتمشى على البحيره
وكان يوم الاحد والجو حلو والشمس طالعه والناس كثير
ورحنا وشافوا البنات البط وانبسطوا

واخذنا جوله بالقطار الاحمر اللي عند البحيره
وصورنا وعرفنا المنطقه اللي حولنا وشفنا العاب اطفال
وبعدين رحنا لكشك يبيع هوت دوق وبنيني
زوجي اخذ هوت دوق بيف
وانا اخذت بنيني
وشفت وجه مهوب غريب علي ياربيه من هذي اعرفها زين مين؟؟واتذكر واتذكر
صارت المضيفه اللي معنا بالطائره
وجهي بوجهها ست ساعات حفظت وجهها
وجلسنا اكلنا سندويشاتنا
بس قعدت افكر بعدها بيوم
زوجي يوم بغى يطلب الهوت دوق قالها وت از ذا ميت هوت دوق
قالت بيف وبورك
انت تبي بيف صح عرفت بالحجاب اللي علي اننا مسلمين ولا ناكل الخنزير
بس البنيني اللي انا طالبته سندويشه فيها جبن شرايح وشرايح مرتدلا بس ما ادري وش نوع لحم المرتدلا هو بقر ولا خنزير
بس زوجي قعد يطمني يقول لو خنزير كان قالت لنا مثل ما قالت عن الهوت دوق
والله ياخوفي اني ما كله خنزير
وتمشينا وركبنا الباخره وشفنا النافوره من بعيد
والمناظر الحلوه والخضره

ورجعنا للفندق
صلينا المغرب والعشاء
ونمنا
اليوم الثاني
افطرنا
وطلعنا واخذت معي خبز
عشان يوكلون بناتي البط
وجلسنا نتمشى على البحيره وبجانب النافوره

وشوي الا المطر ينزل وبغزاره
يالله امدانا نرجع للفندق الساعه وحده
وجلسنا حبيسين الفندق الى الساعه تقريبا اربع توقف المطر
وطلعنا وتغدينا
في مطعم عربي يشتغل فيه عراقي واخذنا منهم شاورما
ولقينا عندهم خبز لبناني واخذناه
ورحنا لحديقه حلوه قدام العاب الاطفال

ورجعنا للفندق الساعه 6 ونص
وتقهوينا وريحنا من المشي
وصلينا ونمنا
اليوم الثالث
افطرنا ورجعنا للغرفه
ما طلعنا لان المطر ينهمر بغزاره
جلسنا الين وقف المطر تقريبا الساعه ثنتين الظهر
وعلى طول رتبت الاغراض في الشنطه واخذنا المظلات
ورحنا للالعاب اللي بناتي شافوها يومنا في القطار الاحمر
وشافتني بنيه كبر بنتي الصغيره وشكلها خايفه مني لاني منقبه
ولعبت هي وبنتي
بس كل شوي تناظرني تقول شيلي هذا (قصدها اللثمه)
يوم خلصوا
رحنا نمشي نبي نروح لمحطه القطار نبي ندلها
لاننا بنروح لانترلكن بالقطار واخذنا من المحطه السويس سيفر باس لشخصين لمده 15 يوم
وقلنا يالله نجرب ورحنا للوزان بالقطار
وكان الجو ممطر
ورجعنا ثانيه لجنيف
وشفنا في محطه القطار ماكدونالدز
ورحنا وتغدينا فيه
ورجعنا وللفندق
والمطر مستمر في النزول
اليوم الرابع
افطرنا
وطلعنا بناتي يبون يوكلون البط بطاطس من ماكدونالدز مبقينه امس يبون يوكلوهم ولا قدرو من المطر
ويوم خلصوا رحنا وركبنا باخره ورحنا لايفيان الفرنسيه وكان الجو ممطر
والطريق تقريبا ثلاث ساعات
الجو كان بارد بناتي لابسين جاكيتات من البرد
بس زوجي عادي نص كم
وتمشينا في ايفيان ولعبنا البنات في الالعاب

وجلسنا واخذنا ايس كريم للبنات
وهوت شوكليت لنا
كان الجو بارد جدا في ايفيان
ما جلسنا فيها كثير من البرد ورجعنا
للوزان بالباخره لانها مقابله لايفيان في البحيره والطريق فقط نص ساعه
وتنقلاتنا الباخره والقطارات فقط بالسويس باس
ما نقص تذاكر ولا شي
ورحنا للوزان
ومشينا فيها شوي ورحنا لمحطه القطار بالباص
ورجعنا لجنيف
وجلست ارتب الاغراض بكره بنروح لانترلاكن
اليوم الخامس
افطرنا
واخذناالشنط
ورحنا لمحطه القطار
وطلعنا لبيرن بالقطار
و وصلنا وراح زوجي وجاب لنا اكل من ماكدونالدز
وجلسنا واكلنا
وجاء لنا رجل كبير بالسن
ياحليله ذاك الرجال
وقال لزوجي:وش جنسيتكم
قال زوجي:السعوديه
قال الشايب:انا ايراني
وشكله فرحان انه شاف مسلمين مبسوط
وخلصنا اكل وبعد شوي جاء القطار لانترلاكن
ويمسك يد بنتي هالشايب ياحليله وجكيتها بيساعدنا لاننا معنا الشنط
وعيت بنتي لا تمسكه الله يفشل العدوتقول منهو هذا الجد انا ما اعرفه
وركب قبلنا يدور مكان لنا الله يجزاه خير
يدور لنا مكان مالقى شي فاضي
ولقى حرمه لحالها قال بليز ماي فاميلي يقصدنا اننا عائلته
وجلس معنا في نفس الكراسي المتقابله
وجلس يسولف علينا
يقول انا كنت ادرس في امريكا ودرس معي سعودي اسمه ماجد الشبل مذيع
وانا هنا من اكثر من ثلاثين سنه عايش في سويسرا
متزوج سويسريه وعنده بنت عمرها ثلاثه وعشرين
ويروح لايران كل سنه
واسمه هدايه الله
وساكن في قريه جنب مدينه تون
وورانا كوخه من القطار
والله لو ما معنا العفش كان رحنا معه
يقول انترلاكن جنه الله
ونزل في مدينه تون
وواصلنا لانترلاكن
ونزلنا واخذنا تاكسي للفندق
فندق ماتي نوف
فندق صراحه سيئ للغايه
بعيد عن محطه القطار ووسط المدينه وبعيد عن كل شي
وكله طلاب الثانويه
وازعاجهم
واللي يخوف بعد ان عندهم كلب كنه بقره من كبره

يشبه برنارد كلب جد هايدي
كسول وكبير وقبله نايم
والى قام خوفنا بسم الله
بنيتي الصغيره تخاف منه مرره ودايم يلاحقها
وعطونا غرف منفصله برضوا
قالو بس اليوم مافيه غرف فاضيه اليوم بكره نعطيكم كونكت
وحطينا الشنط وريحنا
وطلعنا نمشي وشرينا ايس كريم
ورحنا لمطعم واخذنا سندويش لحم شكله زي المرتدلا
بس انا كنت شبعانه ولا اكلت
ورجعنا للفندق ونمنا من التعب