وكيل المدرسة
30-08-2022 - 05:48 pm
ردي السابق الذي كتبته تحت موضوعي ( رحلة السعودية إلى كوالا الليلة تأخرت ) من الصن واي لاقون بصراحة فندق رائع وفخم والانترنت شي ما يعلى عليه 24 ساعة مفتوح وسريع فقط 35 رنقت ، أهم شي تأكد ان كمبيوترك المحمول موجود فيه منفذ شبكة Lan الي سلكه مثل المودم لكنه أعرض شوي لكن بقية المرافق في الصنواي والخدمات ما اقدر اعطيكم عنها صورة كاملة لأني أنا وعيالي جلسنا هاليومين في صن واي بس نوم بسبب فارق التوقيت انقلبت روسهم لدرجة ان ولدي جلس يومين ما عرف يطبق أسماء الوجبات على أوقاتها الصحيحة ( الفطور صار غدا والعشا فطور والغدا . . الخ ) حتى انتقلنا إلى بينانغ بالسيارة وانا قررت السيارة بسبب أني أريد ان أشاهد المناظر على الطريق رغم علمي بطول الطريق بل وأن السيارة أغلى من الطيران فأنا أخذت سيارة بالاتفاق مع السائق ب600 رنقت وتحركنا الساعة التاسعة والنصف ووصلنا بحمد الله الثانية ظهرا ، لكن للأسف كان السائق ينعس شوي وكنت احاول أن أسولف معه ( خلص الانقليزي الي عندي وحنا ما وصلنا ) وكلما أنعس نغزتني حرمتي وهي راكبة ورا عشان أتكلم معه وأطير النوم عنه حتى مليت منه وطريقته بصراحة مع انه مسلم وحبيب ويعرف عربي ( دارس في باكستان بس مابعد حج ) لكنا قلنا توبة من السيارة ورجعنا اليوم للعاصمة في الطيارة ( ليس في بنامجي لنكاوي ) لأنهم يقولون انها للعرسان والحبيبة ( بتشديد الباء الأولى ) وحنا الله يخلف
وصلنا بينانغ وما أدراك ما بينانغ
والله شي يبكي جبال وغابات وبحر , , , بصراحة فوق الوصف ما أدري الديرة فعلا روعة والا أنا مشفوح ولا عمري شفت خير لأن هاذي أول مرة أسافر برا ، ما اقول الا حسافة لأني ما سافرت هناك في بداية زواجي :112:
السكن كان في موتيارا ومع ان بعض الزملا ما كانو يمدحونه بس الي شفته انه فندق كبير وزين مع انه يبدو انه مجدد قبل فترة لأن فيه ملامح قديمة شوي مثل المفتاح حق الغرفة ( ما عندهم كرت مثل الباقين ) وبصراحة أفضل ما اعجبني في الغرفة الحمام ( وانت بكرامة ) ما فيها شي حنا جينا المنتدى نتبادل خبرات لأنه كبير ومقسم المروش في جهة وعليه باب قزاز والمرحاض أعزكم الله في جهة وله غرفة صغيرة ( حمام داخل الحمام ) وفيه مغسلتين لليدين ( ذكرتني بمغاسل بيتنا ) وفيه بانيو مستقل ( الي وده ينجطل في المويه الحارة بعد عناء التمشية ) والله الي منتب حاس بالتعب في ذيك الديرة ( تصدقون يالربع اني اطلع بعيالي نتمشى وندور ونرجع وهم دايخين وجايعين وانا ما ودي اكل شي بس ودي اتمشى واحلل هالايام الي قعدتها هناك ) وياكثر الي عرفتهم هناك مغير امشي واتصدد هذا يسلم وهذا يسلم والله لو اننا في يوم العيد
مع اني جلست في بينانغ خمسة أيام ( من الخميس حتى غادرت إلى العاصمة صباح هذا اليوم وأنا الآن فيها ) إلا أنني لم أخرج من الفندق إلا يومين هما السبت والأحد وانت كما يلي :
السبت : حديقة الفراشات ثم مطعم علاء الدين ( تحت فندق اسمه راسا سراي شكله شقق مفروشه ما يجيه الا اهل الديرة ) ثم حديقة التوابل وهذه الحديقة لمن لا يعرفها تقع على الطريق بين منطقة ( باتوفنرقي ) وهي المنطقة التي تحوي الفنادق المشهورة مثل الهوليدي ان والبارك رويال و بي فيو بيتش وغيرهم ومنطقة ( تيلوك باهانج ) وهي قرية ذات أغلبية مسلمة وفيها الموتيارا بيتش ( على فكرة : قال لي صاحب تكسي ركبت معه ان موتيارا باللغة الماليزية تعني اللؤلؤة ) لدرجة أني أسمع أكثر من مسجد يؤذن وأنا في غرفتي في الدور العاشر بالفندق وأيضا سمعت درس بين المغرب والعشاء يوم أمس الأثنين من أحد المساجد !! بلغتهم طبعا . .
وتحوي حديقة التوابل على مسارات ملونة بأسهم ( أحمر وأخضر وأصفر ) كل مسار يمر بك على نوعية معينة من النباتات ، أنا تمشيت فيها ابتداء بالأحمر ثم دخلت في المنتصف على الأخضر ثم تعبوا عيالي وأردنا العودة ونزلنا وحينما وصلنا البوابة ومكتب الاستقبال اشترينا علبتين من طعام الأسماك وأخذنا نطعم الأسماك ( ترا علبتين بريال قصدي برنقت ) ثم ناداني أحد العمال وقال يوجد رحلة على عربة تجرها حراثة داخل الحديقة ، قلنا يله معكم ( أحسب أن العربة بتاخذ بنا لفة ثم ترجعنا !! ) ويوم ركبنا وكنا بس أربع عوائل تقريبا 3 عرب 1 أجانب ويقلع بنا راعي الحراثة في راس الجبل من جديد ويوقف وقال انزلو !! خير ان شاالله قلنا ننزل احسب انه بيلف وينتظرنا نتفرج على المتحف الصغير الموجود في الجبل ثم نرجع معه ويوم نزلنا ديور وعشق ومشى !! وخلانا عند ذا المتحف تقول الجنادرية أباريق سود لاعب فيها الحطب وتوابل وتحف مدري وش تبي المهم طلعنا من الباب الثاني ولقينا كوفي شوب بصراحة رايق الولد أخذ ايسكريم وانا اخذت تشيزكيك حلو مرة والموقع ممتاز تشوف البحر تحتك تقريبا وتسمع صوت السيارت والدبابات يمرون من تحت الكوفي شوب لأنه مرتفع وعلى حافة الجبل ويوم انتهينا رحت للكاشير في الكوفي شوب وانو حرمتين وحده هندية والثانية صينية قلت لهم وين حراثتنا ؟ قالو اطلب الله ، شف ذا الباب اقضبه وبتلقا درج ينزلك إلى الاستقبال حق الحديقة :112: ويوم قلت للمدام ذا الحكي بغت ترميني من فوق بس الله ستر
وغدا ألقاكم مع تمشيتنا في حديقة الطيور والحديقة النباتية في بينانغ
الحمد لله على سلامة الوصول الى ماليزيا...
ولا تقول مافيه صور ترى نزعل بعدين...لا وما دام انت هناك الا نبغى صور
مباشرة ....ههه
وترجع الى وطنك سالماً غامناً ان شاء الله..
تقبل تحياتي...