بعد عراك طويل مع المنتدى اللي ظليت اقرأ فيه لمده سنه و نص تقريباً
قدرت اكتب مواضيع و ارد ,, و ذلك بخطأي و ليس المنتدى
المهم ,, اليوم جاي و عندي كثير استفسارات عن الصين
بس بكتفي بالقدر اللي بطرحه الحين
و لكي تتضح الصورة ,, راح اقسم الموضوع لثلاث اقسام اهداف و اسئلة عامة
و اسئلة فالاثاث
اهداف الرحلة :1- تجربة بسيطة لعيّنة من بضاعة الصين
2- كسب الخبرة في الكيفية و التعامل قبل الدخول فالعميق
3- الاطلاع عالاثاث
4- سياحة بسيطة ثانوية
اسئلة متفرقه :1- اذا اخذت بضاعة بسعر بسيط لايتجاوز ال 7 الاف ريال ,, هل احتاج لكونتينر اشحن فيه البضاعة ولا تكون معانا فالطيارة ,, مع العلم ان الاولوية الحين ان البضاعة بتكون بين الساعات و النظارات ؟
2- هل نحتاج اوراق او سجل او ترخيص من وزارة التجارة ,, اذا كنت بسوّقها بنفسي (( اقصد بدون ماخليها في دكان تجاري )) ؟
3- انا ماعندي اي واسطه او معارف او اي شي بالجمارك ,, هل بمر مرور الكرام و بأجرائات روتينيه ,, ولا راح تتعقد المسائل ,, لاني اسمع يقولون بعض المرات يسوون فوضى من لاشيء
4- اسعار الكونتنير ,, كنت اقرا موضوع ابو ضرار الله يعطيه العافيه ,, كان التاريخ فال2007 و كانت الاسعار ماتتعدى 3000 ,, و اليوم كنت اكلم واحد يقولي الحين اسعارها وصلت 5000 او 6000 ,, هل صحيح هذي الاسعار الحين !! ؟
5- عندي تخوف من اتفاق مسبق يكون بين المترجم و رواعي المحلات يزيدون السعر فيه و الفايدة مناصفه (( فهل هالتخوف في محله )) ؟
6- السفره بتكون من شخصين (( اعمارنا 21 )) و خايفين ان يشوفونا صغار عالتجارة شويتين مع اني ماحب اقولها ,, بس اتخوف منها بأن مايتعاملون معانا بجديه فالبداية ؟
7- اماكنهم السياحية غالية ولا ,, يعني اذا كنت ساكن في فندق بارك فيو في جوانزو ,, و ابي ازور سور الصين العظيم الرهيب ,, كم بتكلفني من موصلات و دخولات اذا قي ؟
8- المقتنيات الشخصية من لاب توب و كاميرات و جوالات ,, اتوقع تتوفر فيها اللغة الانجليزية ,, بس السؤال عن جودتها و اسعارها ,, هل ممتازة او لا ؟
9- لمأكل و المشرب ,, كم راح يكلفنا في يومية فطور و غدا و عشا فالمطاعم الاسلامية (( كسعر تقريبي لشخصين ))
10- هل تتوفر فالصين اماكن طبيعيه بحته من شلالات و خضرة (( اذا في ياريت تكتبونها لاهنتوا ))
11- بصراحة ودي بقوه ازور التراث الصين ,, و المقصد بالتراث لبسهم المميز و بيوتهم المثلثة الخشبية ,, هل لازالت موجوده ؟
- * باقي اسئلة الاثاث اللي هي حتى الان حول ال 6 اسئلة ,, بس ماراح اكتبها الا بعد ما ألاحظ سعة صدركم لبتدائيتي .
- * ياريت اللي بيتكرم و يجاوب يكون عن تجربه شخصية ( قريبه ) لان الاسعار ياسرع ماتطير فوق ,, او اذا يكون سامع من مجرب (( من وقت قريب )) ,, و يعطيكم الف الف الف عافيه قبل كل شي و بعده
تكفون ياشباب ,, الاسئلة ضرورية ,, ولو بعضها
تكفى ترا تكفى تهز الرجاجيل
لولا ظروف الوقت ماقلت تكفى