اصبح وامسي بين مطرقة T i w n xوسندان Awal_7abib ونفحات بارون وسنديري والطائر الجريح
وسمسم وابو مضاوي وغيرهم غيرهم الكثير من ابناء هذه البوابه البارين
:bounce8:
اللي يطامرون في الصوره اللي فوق يمثلون اشكالنا المذكورين سابقا في ردك
( فرحانين انك مبسوط ...ومرتاح للبوابه وما قدمته لك )
اخوي والله نسعد كثيرا اذا وجدنا من يقدر ما يقوم به الاعضاء كافه هنا
سبب تواجد جميع الاعضاء هو للفائده اولا منكم ( حق مشروع للجميع ) ومحاولة افادت الجميع بأي شكل من الاشكال
والله يعيننا جميعا لنكون عند حسن الظن بنا
وبالنسبه للتقرير سجل عندك ...بارون متابع متابع

.... ... ...
,,,,

اسف جدا جدا على التاخير ومشكورين كلن بأسمه على الردود الله يسعدكم ياحبيلكم والله
الجزء الاول
بداية المشوار كانت من المدينه المنورة بتاريخ 20/7 /2005 وهو يوم الاربعاء حجزنا هالرحله المباركه بالقوة وبواسطات عن طريق مكتب الزمان اللي بكل صراحه وبدون مبالغه الرائد في اسعار التذاكر بالمدينه
ليلة الاربعاء يعني بكرة السفر رحنا الى اسواق مندرين اسواق كبيرة واشترينا اغراضنا كلها من معلبات وبهارات وارز الشعلان (مدري ليش اغلب الاعضاء يحبون رز ابو كاس )
المهم كانت من الاشياء اللي حاطينها بالقائمه المهمه القهوة والهيل والشاي والنعناع المجفف اللي مايصبرون عنه اهل المدينه والمعلبات بأنواعها وبعض الكريمات المرطبه للبشرة المشكله اننا مانستخدمها يوم نكون بالسعوديه
وحرصنا ابضا على اخذ بعض الادويه والمسكنات والمضادت الحيويه وهذي انصح بها الجميع
في يوم الثلاثاء ليلا اجتمعنا في احد الاستراحات :gathering يتخلل الاجتماع وجبة عشاء وكان عددنا اربع اشخاص اللي هم اعضاء الرحله الاول وقائد الرحله هو مهندس كهربائي في شركة سيمنس والثاني محسوبكم وهو مدرس لغه انجليزيه ومترجم متعاون مع لجنة التنسيق والمتابعه بامارة منطقة المدينه
والثالث مدرس رياضيات بالمعهد الثانوي الصناعي والرابع اللي اعتبره ملح السفره كلها عسكري بالجيش :1224:
هذا الاخير كان من سنه كامله وهو ينتظر السفره هذي ويحلم بها ليل نهار من قوة عشقه لبلاد العمه .... بيته يكاد يغص بمنتجات اندونيسيا من تحف ومناظر طبيعيه لدرجة حتى صور التنبل (المعابد) يحتفظ بها
يتكلم ولايمل عن عشقه لاندونيسيا هو من اصر علي بمرافقتهم واقنعني بتغيير وجهتي من لبنان الى اندونيسياليلة السفر لم ينم ولا دقيقه كل ساعه يتصلبي ويقول هاه مستعد والله ياتبي تشوف جنه الله بالارض ياوجيه
قلت له خلاص يابو عبدالله ازعجتني كلها ساعات ونكون بالمطار واشوف كلامك صح والا .... المهم الرجال لو ماسافر اندونيسيا اعتقد راح يطق فيه عرق ويفطس علينا
بدأ يوم الاربعاء وذهبنا بعد صلاة المغرب الى المطار واخينا ابو عبدالله (العسكري ملح السفرة) يكاد يطير من الفرح وبصراحه ماالومه.... يقفز هنا ويطمر هناك حتى في صالة الانتظار يقدم لنا القهوه الفرنسيه على حسابه الخاص احتفالا بقرب موعد المغادره جاء العامل اللي يشيل (الترولي ) عربة نقل العفش واعطاه ابو عبدالله 20 ريال بخشيش من فرحته وسعة صدرة قلت له يابو عبدالله بدينا ..؟؟؟؟؟ يااخي من الان تبي تبخشش ترا عاد مصختها قالي والله لو يجي احد يطلبني كل اللي بجيبي اعطيته بدون تردد من شدة فرحتي باجتماعنا هذا اعز الناس معاي في اعز ديرة شفتها بحياتي
اعلن المذيع الداخلي (تعلن السعوديه عن موعد اقلاع رحلتها رقم..... والمتوجهه بمشيئة الله ورعايته الى جاكرتا فعلى الساده المسافرين التوجه الى البوابه رقم .... استعداد لركوب الطائرة ) وفعلا توجهنا الى كاونتر الجوازات بمطار المدينه لكي يختمون جوازاتنا ونركب الطائرة لان اغلب الركاب اصبحوا بالطائرة ولم يبقى الا نحن وبعض الشباب ....
حمل محمد (المهندس )جوازاتنا بيده وتوجه للكاونتر واستلمها منه موظف الجوازات وقام بختم ثلاث جوازات وبقي جواز واحد فقط وهنا كانت الطامه الكبرى ..... لااستطيع ان ااجل لكم هذه الطامه واقول لكم بعدين اكمل في الجزء الثاني لاني عندي احساس واعلم مدى تشوقكم لمعرفة الطامه
ماهي الطامه ؟؟؟؟ اللي وقعت علينا ....... تخيلو ماذا يقول موظف الجوازات ؟؟؟
وين راعي الجواز هذا ؟؟؟؟ اسمه ..... واذا به (ابو عبدالله) ملح السفره العسكري المجنون بالعمه ... من سهر ليله ونهاره لكي يقنعني بالذهاب معهم .... الشخص اللي احتفل بتوزيع القهوه على حسابه لاننا اجتمعنا ... تخيلو ماذا قال له موظف الجوازات ؟؟؟؟؟؟
انت يااخي لايمكن تسافر .... وثيقتك العسكريه صحيح فيها اجازة الى اندونيسيا ولكن الوثيقه غير مختومه من الشؤون العسكريه ... كانت كلماته كالخنجر في صدري تذكرت عدة اشياء ومواقف
تذكرت ضحكاتنا في السوق ليلة البارحه ونحن نجمع العده والعتاد .... تذكرت اتصلاته كل دقيقه لكي يجعلني اشعر بما يشعر هو به تجاه عشقه لبلاد العمه ... ومازادني غصه في قلبي وجرح انني تذكرت اننا حجزنا على هذه الرحله بالواسطات وبحب الخشوم
صرخ ابو عبدالله من الصفوف ووجهه يملأه الاسى واليأس ... قائلا ... ايش ... ايش ؟؟ لا لا والله صحيحه الاجازة .... ارجوك تكفى ... اقسم بالله اني نظامي ... الله يفقدني اعز مااملك اني نظامي ... يلتفت الى اليمين ... الى الشمال .... يصرخ ياناس ... ينظر لي ويقول ... ابو فارس (اللي هو انا) ... ووجهه يعلوة الحزن والياس ينظر الى المهندس ويقول (محمد) تسمع ايش يقول .... منظرة وقتها يقطع القلب حزنت لموقفه وحاولت بقدر المستطاع ان اجري اتصالاتي بمن اعرفهم بالجوازات لكي يساعدونا ولكن للاسف كل المحاولات بائت بالفشل .... ياتي موظف الخطوط وينادي ياناس اركبوا الطائرة مابقي الا انتم بسرعه والله مابقي الا ثواني ونقفل البوابه .... صراخ هنا وهناك لمحاولت اقناع موظف الجوازات دون جدوى
الان وقد تعبت من الكتابه ............ استبيحكم عذرا التوقف واكمال الجزء المتبقي في وقت اخر
ارجوكم اعذروني
وجيه

افا ماتوقعت مرور بدون ردود مدري يمكن ماتعاطفتو مع قصة ابو عبدالله